ನಮೋ ನಮಃ..
ಇಲ್ಲಿಯವರೆಗೆ ಸಂಸ್ಕೃತದ ಫಲ, ಪುಷ್ಪ, ವೃಕ್ಷ, ಛಾತ್ರೋಪಕರಣ, ಮನೆಯ ವಸ್ತುಗಳು ಮುಂತಾದ ಸರಳ ಶಬ್ದಗಳನ್ನು ಕಲಿತಿದ್ದೀರಿ. ಸಂಸ್ಕೃತಭಾಷೆಯ ವ್ಯವಹಾರಕ್ಕೆ ಈ ಶಬ್ದಗಳು ಬಹಳ ಮುಖ್ಯವಾಗಿವೆ. ಪುನಃ ಪುನಃ ಓದಿ, ಅಭ್ಯಾಸ ಮಾಡಿ.
ನೀವೆಲ್ಲರೂ ಸಂಸ್ಕೃತವನ್ನು ಆಸಕ್ತಿಯಿಂದ ಕಲಿಯುತ್ತಿದ್ದೀರಿ ಎಂದುಕೊಳ್ಳುತ್ತೇನೆ. ಸಿಕ್ಕಿರುವ ಅವಕಾಶವನ್ನು ಸರಿಯಾಗಿ ಬಳಸಿಕೊಳ್ಳುವವನು ಬುದ್ದಿವಂತ. ಸಂಸ್ಕೃತವನ್ನು ಕಲಿಯುವೆನೆಂದು ಸಂಕಲ್ಪ ಮಾಡಿದ್ದೀರಿ. ಆ ಸಂಕಲ್ಪವನ್ನು ನೆರವೇರಿಸುವಲ್ಲಿ ನೀವು ಕಟಿಬದ್ಧರಾಗಿರಬೇಕು.
ಈಗ ಸಂಸ್ಕೃತಭಾಷೆಯಲ್ಲಿ ಪರಿಚಯ ಮಾಡಿಕೊಳ್ಳುವುದು ಹೇಗೆಂಬುದನ್ನು ನೋಡೋಣ…
ಮಮ ಪರಿಚಯಃ – ನನ್ನ ಪರಿಚಯ
ಸಂಸ್ಕೃತದಲ್ಲಿ “ತವ ನಾಮ ಕಿಮ್” ಅಂದರೆ ನಿನ್ನ ಹೆಸರೇನು ? ಎಂದರ್ಥ.
“ತವ ನಾಮ ಕಿಮ್ ?” ಎಂಬ ಪ್ರಶ್ನೆ ಪುಲ್ಲಿಂಗ ಹಾಗೂ ಸ್ತ್ರೀಲಿಂಗ ಶಬ್ದಗಳಿಗೆ ಅನ್ವಯಿಸುತ್ತದೆ.
ಉದಾಹರಣೆಗೆ..
ಪ್ರಶ್ನೆ : ತವ ನಾಮ ಕಿಮ್ ?
ಉತ್ತರ : ಮಮ ನಾಮ ಮಾಧವಃ
ಪ್ರಶ್ನೆ – ತವ ನಾಮ ಕಿಮ್ ?
ಉತ್ತರ – ಮಮ ನಾಮ ಸೀತಾ
ಹಾಗೇ ಬೇರೆ ವಿಧದಲ್ಲೂ “ನಿನ್ನ ಹೆಸರೇನು ?” ಎಂದು ಕೇಳಬಹುದು..
ಪ್ರಶ್ನೆ : “ಭವತಃ ನಾಮ ಕಿಮ್ ?” – ನಿನ್ನ ಹೆಸರೇನು..?
ಇದು ಕೇವಲ ಬಾಲಕರಿಗೆ/ಪುರುಷರಿಗೆ..
ಉತ್ತರ : ಮಮ ನಾಮ ಹರೀಶಃ/ಸತೀಶಃ/ಹರಿಃ/ಗುರುಃ/ವಿವೇಕಃ/ನವೀನಃ ಹೀಗೆ…
ಪ್ರಶ್ನೆ : “ಭವತ್ಯಾಃ ನಾಮ ಕಿಮ್ ?” ನಿನ್ನ ಹೆಸರೇನು..?
ಇದು ಕೇವಲ ಬಾಲಕಿಯರಿಗೆ/ಮಹಿಳೆಯರಿಗೆ…
ಉತ್ತರ : ಮಮ ನಾಮ ಲತಾ/ಮಾಲಾ/ಕವಿತಾ/ಗೌರೀ/ಸರಸ್ವತೀ ಹೀಗೆ..
ಹಾಗೇ ನಿಮ್ಮ ವೃತ್ತಿಯ ಪರಿಚಯವನ್ನೂ ಮಾಡಿಕೊಳ್ಳಿ…
ಅಹಂ ಅಧ್ಯಾಪಕಃ
ಅಹಂ ಗೃಹಿಣೀ
ಅಹಂ ಅಭಿಯಂತಾ – ಇಂಜನೀಯರ್
ಅಹಂ ವೈದ್ಯಃ
ಅಹಂ ಚಾಲಕಃ
ಅಹಂ ನಿರ್ವಾಹಕಃ
ಅಹಂ ಕಾರ್ಮಿಕಃ
ಅಹಂ ವಿದ್ಯಾರ್ಥೀ
ಅಹಂ ವಿದ್ಯಾರ್ಥಿನೀ ಹೀಗೆ ಹೀಗೆ….
ಅಭ್ಯಾಸ
ಸತೀಶಃ – ಭವತಃ ನಾಮ ಕಿಮ್ ?
ರಮೇಶಃ – ಮಮ ನಾಮ ರಮೇಶಃ | ಅಹಂ ಅಧ್ಯಾಪಕಃ ಅಸ್ಮಿ |
ಸತೀಶಃ – ಭವತಃ ನಾಮ ಕಿಮ್ ?
ರಮೇಶಃ – ಮಮ ನಾಮ ರಮೇಶಃ | ಅಹಮ್ ಅಭಿಯಂತಾ ಅಸ್ಮಿ |
ಸತೀಶಃ – ಭವತ್ಯಾಃ ನಾಮ ಕಿಮ್ ?
ಲತಾ – ಮಮ ನಾಮ ಲತಾ | ಅಹಂ ಗೃಹಿಣೀ ಅಸ್ಮಿ |
ಲತಾ – ಭವತ್ಯಾಃ ನಾಮ ಕಿಮ್ ?
ಮಾಲಾ – ಮಮ ನಾಮ ಮಾಲಾ | ಅಹಂ ವಿದ್ಯಾರ್ಥಿನೀ ಅಸ್ಮಿ |
ಸಂಸ್ಕೃತವ್ಯಾಕರಣಸ್ಯ ಪರಿಚಯಃ (ಸಂಸ್ಕೃತವ್ಯಾಕರಣದ ಪರಿಚಯ)
ಸಂಸ್ಕೃತದಲ್ಲಿ ಮೂರು ಲಿಂಗಗಳಿವೆ..
ಪುಲ್ಲಿಂಗ , ಸ್ತ್ರೀಲಿಂಗ ಹಾಗೂ ನಪುಂಸಕಲಿಂಗ..
ಪುಲ್ಲಿಂಗ – ಪುಲ್ಲಿಂಗ ಶಬ್ದಗಳ ಕೊನೆಯಲ್ಲಿ ಸಾಮಾನ್ಯವಾಗಿ ವಿಸರ್ಗ : ಅಂದರೆ ಎರಡು ಬಿಂದುಗಳಿರುತ್ತವೆ..
ಉದಾಹರಣೆಗೆ – ರಾಮಃ , ಹರಿಃ , ಮುಕುಂದಃ , ಕವಿಃ , ಹರೀಶಃ , ಗುರುಃ , ಸಾಧುಃ ಹೀಗೆ…
ಸ್ತ್ರೀಲಿಂಗದ ಶಬ್ದಗಳ ಅಂತಿಮ ಅಕ್ಷರಗಳು “ಆ” ಅಥವಾ “ಈ” ಆಗಿರುತ್ತವೆ
ಉದಾಹರಣೆಗೆ : ಸುಧಾ ಎಂದು ಬರೆಯುವಾಗ , ಸ್+ಉ+ಧ್+ಆ ಇಲ್ಲಿ ಅಂತಿಮ ವರ್ಣ(ಅಕ್ಷರ) – ಆ
ಗೌರೀ ಎಂದು ಬರೆಯುವಾಗ , ಗ್+ಔ+ರ್+ಈ ಅಂತಿಮ ವರ್ಣ – ಈ
ಸಾಮಾನ್ಯವಾಗಿ , ಆ ಮತ್ತು ಈ ಅಂತ್ಯದಲ್ಲಿರುವ ಪದಗಳು ಸ್ತ್ರೀಲಿಂಗ ಪದಗಳು..
ಉದಾಹರಣೆಗೆ – ಮಾಲಾ , ನದೀ , ಸುಮುಖೀ , ಜಯಂತೀ , ರಮಾ , ಸೀತಾ , ಪಾರ್ವತೀ, ಮರುದ್ವತೀ ಇತ್ಯಾದಿಗಳು..
ನಪುಂಸಕಲಿಂಗ-
ಸಾಮಾನ್ಯವಾಗಿ ಪದದ ಕೊನೆಯಲ್ಲಿ ಅರ್ಧಮಕಾರ(ಮ್) ಎಂದಿದ್ದರೆ ಅದು ನಪುಂಸಕಲಿಂಗ..
ಉದಾಹರಣೆಗೆ – ವನಮ್ , ಫಲಮ್ , ಕುಸುಮಮ್ , ಪತ್ರಮ್ , ಪುಷ್ಪಮ್ , ಉದ್ಯಾನಮ್ ಇತ್ಯಾದಿಗಳು….
ಅಭ್ಯಾಸಃ
ಈ ಪದಗಳನ್ನು ಪುಲ್ಲಿಂಗ , ಸ್ತ್ರೀಲಿಂಗ , ನಪುಂಸಕಲಿಂಗಗಳಾಗಿ ವಿಂಗಡಿಸಿ –
ಸಿಂಹಃ , ಅಶ್ವಃ , ಲತಾ , ನಯನಮ್ , ಕುಬೇರಃ , ಚಂದ್ರ , ಭಾನುಃ , ಅಧ್ಯಾಪಿಕಾ ,
ಶಸ್ತ್ರಮ್ , ಮುಖಮ್ , ವಾಟಿಕಾ , ಗುಹಾ , ಗ್ರೀವಾ , ವಸುಧಾ , ಗೋಪೀ , ಗೀತಾ ,
ವಸ್ತ್ರಮ್ , ಗೃಹಮ್ , ಪುಸ್ತಕಮ್ , ಮಾರ್ಗಃ , ಮಂಡೋದರೀ ಇತ್ಯಾದಿ.
सुभाषितम् – ಸುಭಾಷಿತಮ್
नरस्याभरणं रूपम्
रूपस्याभरणं गुणः ।
गुणस्याभरणं ज्ञानम्
ज्ञानस्याभरणं क्षमा ॥
“ನರಸ್ಯಾಭರಣಂ ರೂಪಮ್
ರೂಪಸ್ಯಾಭರಣಂ ಗುಣಃ |
ಗುಣಸ್ಯಾಭರಣಂ ಜ್ಞಾನಮ್
ಜ್ಞಾನಸ್ಯಾಭರಣಂ ಕ್ಷಮಾ ||”
ಭಾವಾರ್ಥಃ – ಮನುಷ್ಯನಿಗೆ ರೂಪವೇ (ಸೌಂದರ್ಯ) ಆಭರಣ. ರೂಪಕ್ಕೆ ಸದ್ಗುಣಗಳೇ ಆಭರಣ. ಸದ್ಗುಣಗಳಿಗೆ ಜ್ಞಾನವೇ ಆಭರಣ. ಜ್ಞಾನಕ್ಕೆ ಕ್ಷಮೆಯೇ ಆಭರಣ. ಮನುಷ್ಯನಿಗೆ ಕೇವಲ ರೂಪವೊಂದಿದ್ದರೆ ಸಾಲದು, ಸದ್ಗುಣ, ಜ್ಞಾನ ಹಾಗೂ ಕ್ಷಮಾಗುಣಗಳೂ ಸಹ ಇರಬೇಕೆಂದು ಈ ಸುಭಾಷಿತ ತಿಳಿಸುತ್ತದೆ.
“ಶುಭಂ ಭೂಯಾತ್”
ಪುನಃ ಮಿಲಾಮಃ
ಪ್ರದೀಪ್ ಹೆಗ್ಡೆ
ಸಂಸ್ಕೃತದಲ್ಲಿ ಪಡೆದದ್ದು ಸ್ನಾತಕೋತ್ತರ ಪದವಿ. ಬೆಂಗಳೂರಿನ ಒಂದು ಕಾಲೇಜಿನಲ್ಲಿ ಸಂಸ್ಕೃತ ಉಪನ್ಯಾಸಕ. ಬಿಡುವಿನ ವೇಳೆಯಲ್ಲಿ ಸಂಸ್ಕೃತ ಹಾಗೂ ಸಂಸ್ಕೃತಿಯ ಪ್ರಸಾರದ ಕಾಯಕ. ಹಲವಾರು ದೇಶಿ ಹಾಗೂ ವಿದೇಶಿ ವಿದ್ಯಾರ್ಥಿಗಳಿಗೆ ಸಂಸ್ಕೃತವನ್ನು ಕಲಿಸಿದ್ದೇನೆ. ಸಂಸ್ಕೃತ ಆನ್ಲೈನ್ ಕ್ಲಾಸುಗಳನ್ನು ನಡೆಸುತ್ತಿದ್ದೇನೆ. ಆಸಕ್ತರಿಗೆ ಸಂಸ್ಕೃತಸ್ತೋತ್ರ- ಭಗವದ್ಗೀತೆ,ಪೂಜಾಮಂತ್ರ,ಸಂಧ್ಯಾವಂದನೆ ಮುಂತಾದವುಗಳನ್ನು ಕಲಿಸುತ್ತಿದ್ದೇನೆ. ಸಂಸ್ಕೃತಭಾಷೆಯಲ್ಲಿರುವ ವಿಷಯಗಳನ್ನು ಜನಸಾಮಾನ್ಯರಿಗೆ ಸರಳವಾಗಿ ತಿಳಿಸಲು ಹಲವಾರು ಲೇಖನಗಳನ್ನು ಬರೆದಿದ್ದೇನೆ. ಸುರಭಾರತಿ ಪುನಃ ಸುಪ್ರತಿಷ್ಠಳಾಗಬೇಕೆಂಬುದೇ ನನ್ನ ಬಯಕೆ.
ಹೆಚ್ಚಿನ ಮಾಹಿತಿಗಾಗಿ ಸಂಪರ್ಕಿಸಿ :pradeepkasage@gmail.com
ಮೊಬೈಲ್ ನಂಬರ್ : 8050664384
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
