ಈಗ ಹಸು, ಎಮ್ಮೆಗಳಿಗೂ ಆಧಾರ್ ಮಾದರಿ ಐಡಿ- ಕಾರ್ಡ್

ನವದೆಹಲಿ: ಈಗ ದೇಶದ ನಾಗರಿಕರಂತೆ ಭಾರತದಲ್ಲಿ ಹಸುಗಳು, ಎಮ್ಮೆಗಳಿಗೂ ಸಹ ಆಧಾರ್ ಮಾದರಿ 12 ಅಂಕೆಗಳ ವಿಶಿಷ್ಟ ಗುರುತಿನ ಕಾರ್ಡ್‌ನ್ನು ನಿಯೋಜಿಸಲಾಗಿದೆ.

ಹಾಲಿನ ಉತ್ಪಾದನೆಯನ್ನು ಮತ್ತು ಹಸುಗಳ ಸಂತತಿಯನ್ನು ಹೆಚ್ಚಿಸುವ ಗುರಿಯೊಂದಿಗೆ ಪಶುಸಂಗೋಪನಾ ಇಲಾಖೆ ದೇಶೀಯ ದನಗಳಿಗೆ ಈ 12 ಅಂಕೆಗಳ ಕಾರ್ಡ್‌ನ್ನು ಟ್ಯಾಗ್ ಮಾಡುವ ಅಭಿಯಾನವನ್ನು ಆರಂಭಿಸಿದೆ.

ಜಾನುವಾರುಳಿಗೆ ಕಾಲ ಕಾಲಕ್ಕೆ ಲಸಿಕೆ ಮತ್ತು ವೈಜ್ಞಾನಿಕ ಪರೀಕ್ಷೆ ನಡೆಸುವ ಮೂಲಕ ಉತ್ತಮ ದೇಶೀಯ ತಳಿಗಳು ಲಭ್ಯವಾಗುವಂತೆ ಖಚಿತಪಡಿಸಲು ಈ ಪ್ರಮುಖ ಹೆಜ್ಜೆ ಸಹಾಯವಾಗಲಿದೆ. ಪಶುಸಂಗೋಪನಾ ಇಲಾಖೆ ಜಾನುವಾರುಗಳ ಕಿವಿಗೆ 12 ಸಂಖ್ಯೆಗಳ ಆಧಾರ್ ಮದರಿಯ ಸಂಖ್ಯೆಯನ್ನು ಲಗತ್ತಿಸುವಂತೆ ತಂತ್ರಜ್ಞರಿಗೆ ಸೂಚಿಸಿದೆ.

ಕೇಂದ್ರ ಸರ್ಕಾರ ೨೦೧೭ರ ಅಂತ್ಯದೊಳಗೆ 88 ಮಿಲಿಯನ್ ಹಸುಗಳು ಮತ್ತು ಎಮ್ಮೆಗಳಿಗೆ ಈ ಸಂಖ್ಯೆ ಲಗತ್ತಿಸುವ ಗುರಿಯೊಂದಿಗೆ 148 ಕೋಟಿ ರೂ. ನಿಯೋಜಿಸಿದೆ.

ಸುಮಾರು 1 ಲಕ್ಷ ತಂತ್ರಜ್ಞರಿಗೆ 50,000 ಟ್ಯಾಬ್‌ಲೆಟ್‌ಗಳನ್ನು ಒದಗಿಸಲಾಗಿದ್ದು, ಹಳದಿ ಬಣ್ಣದ ಪಾಲಿಯುರ್‌ಥೇನ್ ಟ್ಯಾಗ್‌ನ್ನು ದನಗಳ ಕಿವಿಗಳಿಗೆ ಲಗತ್ತಿಸಲಾಗುವುದು. 8 ಗ್ರಾಂ ತೂಕದ ಈ ಟ್ಯಾಗ್ ವಿರೂಪ ನಿರೋಧಕ (ಟ್ಯಾಂಪರ್ ಪ್ರೂಫ್) ಆಗಿರಲಿದೆ ಎಂದು ವರದಿ ತಿಳಿಸಿದೆ.