ಕೊರೋನವೈರಸ್ ಪೀಡಿತ ಕ್ರೂಸ್ ಹಡಗಿನಲ್ಲಿದ್ದ 119 ಭಾರತೀಯರ ಕರೆ ತಂದ ಏರ್­ಇಂಡಿಯಾ

ನವದೆಹಲಿ: ಕೊರೋನವೈರಸ್ ಪೀಡಿತ ಕ್ಯಾರೆಂಟೈನ್ಡ್ ಕ್ರೂಸ್ ಹಡಗು ಡೈಮಂಡ್ ಪ್ರಿನ್ಸೆಸ್­ನಲ್ಲಿದ್ದ ಶ್ರೀಲಂಕಾ, ನೇಪಾಳ, ದಕ್ಷಿಣ ಆಫ್ರಿಕಾ ಮತ್ತು ಪೆರುವಿನ 5 ಸದಸ್ಯರು ಮತ್ತು 119 ಭಾರತೀಯರನ್ನು ಹೊತ್ತ ವಿಶೇಷ ಏರ್­ಇಂಡಿಯಾ ವಿಮಾನ ಗುರುವಾರ ನವದೆಹಲಿಗೆ ಬಂದಿಳಿದಿದೆ.

ಜನರನ್ನು ಸ್ಥಳಾಂತರಿಸಲು ಅನುಕೂಲ ಮಾಡಿಕೊಟ್ಟಿದ್ದಕ್ಕಾಗಿ ಜಪಾನ್ ಅಧಿಕಾರಿಗಳಿಗೆ ಭಾರತ ಸರ್ಕಾರ ಧನ್ಯವಾದಗಳನ್ನು ಅರ್ಪಿಸಿದೆ.

“ಏರ್ ಇಂಡಿಯಾ ವಿಮಾನವು ಟೋಕಿಯೊದಿಂದ ದೆಹಲಿಗೆ ಬಂದಿಳಿದಿದೆ, ಶ್ರೀಲಂಕಾ, ನೇಪಾಳ, ದಕ್ಷಿಣ ಆಫ್ರಿಕಾ ಮತ್ತು ಪೆರುವಿನ 5 ಪ್ರಜೆಗಳು ಮತ್ತು 119 ಭಾರತೀಯರನ್ನು ಹೊತ್ತು ಈ ವಿಮಾನ ಇಳಿದಿದೆ. COVID-19 ಕಾರಣದಿಂದಾಗಿ ಡೈಮಂಡ್ ಪ್ರಿನ್ಸೆಸ್‌ ಹಡಗಿನಲ್ಲಿ ಇವರನ್ನು ನಿರ್ಬಂಧಕ್ಕೊಳಪಡಿಸಲಾಗಿತ್ತು. ಜಪಾನಿನ ಅಧಿಕಾರಿಗಳ ಸಹಾಯಕ್ಕಾಗಿ ಧನ್ಯವಾದಗಳು. ಏರ್ ಇಂಡಿಯಾಗೆ ಮತ್ತೊಮ್ಮೆ ಧನ್ಯವಾದ” ಎಂದು ವಿದೇಶಾಂಗ ವ್ಯವಹಾರಗಳ ಸಚಿವ ಎಸ್ ಜೈಶಂಕರ್ ಅವರು ಟ್ವೀಟ್­ನಲ್ಲಿ ತಿಳಿಸಿದ್ದಾರೆ.

Air India flight has just landed in Delhi from Tokyo,carrying 119 Indians & 5 nationals from Sri Lanka,Nepal, South Africa&Peru who were quarantined onboard the #DiamondPrincess due to #COVID19. Appreciate the facilitation of Japanese authorities.
Thank you @airindiain once again

— Dr. S. Jaishankar (@DrSJaishankar) February 26, 2020

ಐಷಾರಾಮಿ ಕ್ರೂಸ್ ಹಡಗಿನಲ್ಲಿದ್ದ 3,711 ಜನರಲ್ಲಿ 132 ಸಿಬ್ಬಂದಿ ಮತ್ತು ಆರು ಪ್ರಯಾಣಿಕರು ಸೇರಿದಂತೆ 138 ಭಾರತೀಯರು ಆಗಿದ್ದರು. ಒಬ್ಬ ಪ್ರಯಾಣಿಕರಿಗೆ ಕೊರೋನವೈರಸ್ ಪತ್ತೆಯಾದ ಹಿನ್ನಲೆಯಲ್ಲಿ ಇಡೀ ಹಡಗಿನಲ್ಲಿದ್ದ ಜನರನ್ನು ಫೆಬ್ರವರಿ 5 ರಿಂದ ಜಪಾನ್‌ ನಿರ್ಬಂಧಿಸಿತ್ತು.

 37 ದೇಶಗಳಲ್ಲಿ 80,000 ಕ್ಕೂ ಹೆಚ್ಚು ಜನರಿಗೆ ಕೊರೊನಾವೈರಸ್ ಸೋಂಕು ತಗುಲಿದ್ದು, ಕಳೆದ ಕೆಲವು ತಿಂಗಳುಗಳಲ್ಲಿ 2,600 ಕ್ಕೂ ಹೆಚ್ಚು ಸಾವುಗಳಿಗೆ ಈ ಸೋಂಕು ಕಾರಣವಾಗಿದೆ. ಚೀನಾದ ವುಹಾನ್ ನಗರ ಕೊರೋನ ವೈರಸ್­ನಿಂದ ತೀವ್ರವಾಗಿ ಬಾಧಿಸಲ್ಪಟ್ಟಿದೆ.