ಮಂಗಳೂರು : ಮಂಗಳೂರು ಲಿಟ್‌ ಫೆಸ್ಟ್ 6 ನೇ ಅವೃತ್ತಿಯು ಜ.19 ರಂದು ಉದ್ಘಾಟನೆಗೊಳ್ಳಲಿದೆ. ಕೇಂದ್ರ ಸಾಹಿತ್ಯ ಅಕಾಡೆಮಿ ಪುರಸ್ಕೃತ ಲಕ್ಷ್ಮೀಶ ತೋಳ್ಪಾಡಿ ಈ ಬಾರಿಯ ಸಾಹಿತ್ಯ ಹಬ್ಬವನ್ನು ಉದ್ಘಾಟಿಸಲಿದ್ದಾರೆ.
ಕಳೆದ 5 ಆವೃತ್ತಿಗಳ ಮೂಲಕ ಮಂಗಳೂರು ಲಿಟ್‌ ಫೆಸ್ಟ್ ಜನರ ಉತ್ಸವವಾಗಿ ಬದಲಾಗಿದೆ. ದೇಶದ ಮೇರು ಸಾಹಿತಿಗಳ ಮೂಲಕ ಸಂಗ್ರಹವಾದ ಲೇಖನಗಳನ್ನೊಳಗೊಂಡ ʼಐಡಿಯಾ ಆಫ್‌ ಭಾರತ್ʼ ಎಂಬ ಕೃತಿಯು ಉದ್ಘಾಟನಾ ಸಮಾರಂಭದಲ್ಲಿ ಲೋಕಾರ್ಪಣೆಗೊಳ್ಳಲಿದೆ ಎಂದು ಭಾರತ್ ಫೌಂಡೇಶನ್‌ ಟ್ರಸ್ಟಿ ಶ್ರೀರಾಜ್‌ ಗುಡಿ ಹೇಳಿದರು.
ಈ ವರ್ಷ ಕುವೆಂಪು ವಿರಚಿತ ಶ್ರೀರಾಮಾಯಣ ದರ್ಶನಂಗೆ 72 ವರ್ಷ ಆಗುತ್ತಿದೆ, ದ.ರಾ ಬೇಂದ್ರೆ ವಿರಚಿತ ನಾಕುತಂತಿ 65 ವರ್ಷವಾದರೆ, ದಾಟು ಕೃತಿಗೆ 25 ವರ್ಷ ಪೂರ್ಣಗೊಳ್ಳುತ್ತಿದೆ ಎಂದರು. ಈ ಬಾರಿ ಎರಡೂವರೆ ದಿನಗಳ ಕಾಲ ವಿವಿಧ ವಿಚಾರಗಳ ಬಗ್ಗೆ ಚರ್ಚಾಗೋಷ್ಠಿ, ಸಂವಾದ ನಡೆಯುತ್ತಿದೆ. ಉದ್ಘಾಟನಾ ದಿನದಂದು ಭರತನಾಟ್ಯಂ ಕಲಾವಿದೆ ರಾಧೆ ಜಗ್ಗಿ ನಾಥ ಹರೇ ನೃತ್ಯರೂಪಕ ಪ್ರಸ್ತುತಪಡಿಸಲಿದ್ದಾರೆ. ಸಾಹಿತ್ಯ ಗೋಷ್ಠಿಯಲ್ಲಿ ಕೇಂದ್ರ ರಕ್ಷಣಾ ಸಲಹೆಗಾರರಾದ ವಿನೋದ್‌ ಖಂಡಾರೆ, ಈ ಬಾರಿಯ ವಿಶೇಷತೆಯಲ್ಲಿ ಮಹಿಳಾ ಪರ ಧ್ವನಿಯು ಪ್ರತಿಧ್ವನಿಸಲಿದೆ. ಸೇನೆಯ ಮೂವರು ಮಹಿಳಾ ಅಧಿಕಾರಿಗಳು ಲಿಟ್‌ ಫೆಸ್ಟ್ ನಲ್ಲಿ ಭಾಗವಹಿಸುತ್ತಿರುವುದು ವಿಶೇಷವಾಗಿದೆ. ಸೇನೆಯ ಭಾಗವಾಗಿದ್ದ ಅವರು ತಮ್ಮ ಸೇವಾನುಭವದೊಂದಿಗೆ ಅವರ ಕೃತಿಗಳಲ್ಲಿರುವ ವಿಶೇಷತೆಗಳ ಬಗ್ಗೆಯೂ ಚರ್ಚಿಸಲಾಗುವುದು ಎಂದರು.
ಇದರ ಜೊತೆಯಲ್ಲಿ ಆಧುನಿಕ ಕಾಲಘಟ್ಟದ ವೈಜ್ಞಾನಿಕ ಬೆಳೆವಣಿಗೆಯಾದ ಎಐ ತಂತ್ರಜ್ಞಾನದ ಬಗ್ಗೆಯೂ ಸಂವಾದ ಕಾರ್ಯಕ್ರಮ ಏರ್ಪಡಲಿದೆ. ಚಿಣ್ಣರ ಅಂಗಳದ ಮೂಲಕ ಮಕ್ಕಳಲ್ಲಿ ಸಾಹಿತ್ಯದ ಅಭಿರುಚಿ ಬೆಳೆಸುವ ನಿಟ್ಟಿನಲ್ಲೂ ಈ ಬಾರಿ ಲಿಟ್‌ ಫೆಸ್ಟ್ ಮೂಲಕ ಪ್ರಯತ್ನ ಮಾಡಲಾಗುತ್ತಿದೆ ಎಂದರು. ಇದರ ಹೊರತಾಗಿ ಯಕ್ಷಗಾನದ ಬಗ್ಗೆ ಪರಿಚಯಾತ್ಮಕ ಪ್ರಯೋಗದ ನಿಟ್ಟಿನಲ್ಲಿ ಯಕ್ಷಗಾನದ ವಾದ್ಯಗಳ ಬಗ್ಗೆ ಪರಿಚಯ, ವೇಷಭೂಷಣಗಳ ಬಗ್ಗೆಯೂ ಪರಿಚಯವಿರಲಿದೆ ಎಂದರು.
ಸುಮಾರು 90 ವರ್ಷಗಳಿಂದ ಮಹಿಳೆಯರ ಸ್ವಾವಲಂಬಿ ಜೀವನಕ್ಕೆ ಸಾಕ್ಷಿಯಾದ- ವಿಧವೆ ಮತ್ತು ಬಾಲಕಿಯರ ಶಿಕ್ಷಣಕ್ಕೆ ಮಾದರಿಯಾದ ಧಾರವಾಡದ ವನಿತಾ ಸೇವಾ ಸಮಾಜ ಸಂಘಟನೆಗೆ ಈ ಬಾರಿಯ ಲಿಟ್‌ ಫೆಸ್ಟ್ ಮೂಲಕ ಗೌರವ ಪ್ರದಾನ ನಡೆಯಲಿದೆ ಎಂದು ಭಾರತ್ ಫೌಂಡೆಶನ್‌ ಟ್ರಸ್ಟಿ ಸುನಿಲ್‌ ಕುಲಕರ್ಣಿ ಹೇಳಿದರು.
20 ರಂದು ಸಾಯಂಕಾಲ ಸಂದೀಪ್‌ ನಾರಾಯಣ್‌ ಅವರಿಂದ ಕರ್ನಾಟಕ ಸಂಗೀತ ಕಾರ್ಯಕ್ರಮ ಪ್ರಸ್ತುತಿ ನಡೆಯಲಿದೆ. ಲಿಟ್‌ ಫೆಸ್ಟ್ ಪ್ರಚಾರಾರ್ಥ ಈಗಾಗಲೇ ಬೀದಿ ನಾಟಕಗಳ ಪ್ರಸ್ತುತಿ ಮಂಗಳೂರು ನಗರದ ಹಲವಾರು ಪ್ರದೇಶಗಳಲ್ಲಿ ನಡೆದಿದ್ದು ಉತ್ತಮ ಸ್ಪಂದನೆ ವ್ಯಕ್ತವಾಗಿದೆ ಎಂದು ದಿಶಾ ಶೆಟ್ಟಿ ಹೇಳಿದರು.
ಸಾಹಿತ್ಯಗೋಷ್ಠಿಯಲ್ಲಿನ ವಿಶೇಷತೆಯು ಹೆಚ್ಚಿನ ಸಂಖ್ಯೆಯ ಸಾಹಿತ್ಯಾಸಕ್ತರನ್ನು ಆಕರ್ಷಿಸಲಿದೆ ಎಂದು ಹೇಳಿದರು. ವಿದ್ಯಾರ್ಥಿ ಕೇಂದ್ರಿತವಾಗಿರುವ ಕಾರ್ಯಕ್ರಮಗಳು ಸಾಹಿತ್ಯ ಗೋಷ್ಠಿಗೆ ಹೆಚ್ಚಿನ ಮೆರಗು ನೀಡಲಿದೆ ಎಂದರು. ಪತ್ರಿಕಾಗೋಷ್ಠಿಯಲ್ಲಿ ಈಶ್ವರ್ ಶೆಟ್ಟಿ, ದುರ್ಗಾ ರಾಮದಾಸ್‌ ಕಟೀಲು, ಸುಜಿತ್‌ ಪ್ರಕಾಶ್‌ ಉಪಸ್ಥಿತರಿದ್ದರು.
Admin
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
