ಕೆಲಸಕ್ಕೆ ಮರಳಿದ ಕೇಂದ್ರ ಸಚಿವರು

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿಯವರು ಕರೆ ನೀಡಿದ ಬಳಿಕ ಏಪ್ರಿಲ್ 13 ರಿಂದ ಹಲವು ಕೇಂದ್ರ ಸಚಿವರುಗಳು ಮತ್ತು ಹಿರಿಯ ಅಧಿಕಾರಿಗಳು ಸೋಮವಾರ ತಮ್ಮ ಕರ್ತವ್ಯಕ್ಕೆ ಹಾಜರಾಗಿದ್ದಾರೆ.

‘ಜಾನ್ ಭಿ, ಜಹಾನ್ ಭಿ’ ಎಬಿ ಎಂದು ಪ್ರಧಾನಿ ನರೇಂದ್ರ ಮೋದಿಯವರು ಕೊರೋನವೈರಸ್ ಹೋರಾಟದ ವಿಷಯದಲ್ಲಿ ಕರೆಯನ್ನು ನೀಡಿದ್ದರು. ಅಂದರೆ ನಾವು ಜೀವವನ್ನು ಉಳಿಸಿಕೊಳ್ಳಬೇಕಾಗಿದೆ ಮತ್ತು ಆರ್ಥಿಕತೆಯನ್ನೂ ಕಾಪಾಡಬೇಕಾಗಿದೆ ಎಂಬುದು ಅವರ ಅರ್ಥವಾಗಿತ್ತು.

ಅವರ ಕರೆಯ ಬಳಿಕ ಎರಡು ದಿನಗಳ ಹಿಂದೆ ಎಲ್ಲ ಸರ್ಕಾರಿ ಅಧಿಕಾರಿಗಳಿಗೆ ನಿರ್ದೇಶನವನ್ನು ಹೊರಡಿಸಿ, ಕೊರೋನಾವೈರಸ್ ನಡುವೆಯೂ ಕೆಲಸಕ್ಕೆ ಹಾಜರಾಗುವಂತೆ ಸೂಚನೆ ನೀಡಲಾಗಿತ್ತು.

ಈ ಹಿನ್ನೆಲೆಯಲ್ಲಿ ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಖಾತೆ ಸಚಿವ ಪ್ರಕಾಶ್ ಜಾವಡೇಕರ್, ಕೇಂದ್ರ ಹಣಕಾಸು ಸಚಿವೆ ಶ್ರೀಮತಿ ನಿರ್ಮಲಾ ಸೀತಾರಾಮನ್, ಕೇಂದ್ರ ರಾಸಾಯನಿಕ ಮತ್ತು ರಸಗೊಬ್ಬರ ಸಚಿವ ಡಿ. ವಿ. ಸದಾನಂದಗೌಡ, ಸಂಸದೀಯ ವ್ಯವಹಾರಗಳ ಸಚಿವ ಪ್ರಲ್ಹಾದ್‌ ಜೋಶಿ,  ಬುಡಕಟ್ಟು ವ್ಯವಹಾರಗಳ ಸಚಿವ ಅರ್ಜುನ್ ಮುಂಡಾ, ಕೇಂದ್ರ ಪಶು ಸಂಗೋಪನೆ, ಡೈರಿ ಮತ್ತು ಮೀನುಗಾರಿಕಾ ಸಚಿವ ಗಿರಿರಾಜ್ ಸಿಂಗ್, ಗೃಹ ಖಾತೆ ರಾಜ್ಯ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು ಸೋಮವಾರ ತಮ್ಮ ತಮ್ಮ ಕಛೇರಿಗಳಿಗೆ ಹಾಜರಾಗಿದ್ದಾರೆ.

ಸಚಿವರುಗಳು ಒಂದಿಗೆ ಹಲವು ಹಿರಿಯ ಅಧಿಕಾರಿಗಳು ಮತ್ತು ಸಿಬ್ಬಂದಿಗಳು ಕೂಡ ಕರ್ತವ್ಯಕ್ಕೆ ಸೋಮವಾರ ಹಾಜರಾಗಿದ್ದಾರೆ. ಕಚೇರಿಗಳನ್ನು ಶೇಕಡ 50ರಷ್ಟು ಸಿಬ್ಬಂದಿಗಳೊಂದಿಗೆ ಮುನ್ನಡೆಸುವಂತೆ ಸೂಚಿಸಲಾಗಿದೆ.

“ಕೇವಲ ಹಿರಿಯ ಅಧಿಕಾರಿಗಳು ಮತ್ತು ಬೇಕಾದಷ್ಟೇ ಸಿಬ್ಬಂದಿಗಳು ಮಾತ್ರ ಕಚೇರಿಗೆ ಇಂದಿನಿಂದ ಆಗಮಿಸುತ್ತಿದ್ದಾರೆ. ಕೋವಿಡ್-19ಗೆ ಸಂಬಂಧಿಸಿದಂತೆ ಹೊರಡಿಸಲಾಗಿರುವ ಎಲ್ಲಾ ನಿರ್ದೇಶನಗಳನ್ನು ನಾವು ಚಾಚೂತಪ್ಪದೆ ಪಾಲಿಸುತ್ತೇವೆ” ಎಂದು ರಿಜಿಜು ಹೇಳಿದ್ದಾರೆ.

ಕಚೇರಿಗೆ ಆಗಮಿಸಿ ಮೊದಲು ಎಲ್ಲಾ ಸಚಿವರುಗಳನ್ನು ಮತ್ತು ಅಧಿಕಾರಿಗಳನ್ನು ಸ್ಕ್ರೀನಿಂಗ್ ಮಾಡಲಾಗುವುದು. ಇವರುಗಳ ವಾಹನಗಳನ್ನು ಕೂಡ ಸ್ಯಾನಿಟೈಝ್ ಮಾಡಲಾಗುವುದು ಎಂದಿದ್ದಾರೆ.