ವಿಜಯದ ಬಳಿಕ ಸ್ಟೇಡಿಯಂ ಕ್ಲೀನ್ ಮಾಡಿದ ಫುಟ್‌ಬಾಲ್ ಅಭಿಮಾನಿಗಳು

ಸ್ವಚ್ಛಭಾರತ ಅಭಿಯಾನ ದೇಶದ ಜನರಲ್ಲಿ ಸ್ವಚ್ಛತೆಯ ಬಗ್ಗೆ ಅರಿವು ಮೂಡಿಸುವಲ್ಲಿ ಸಫಲವಾಗಿದೆ ಎಂಬುದನ್ನು ಶಿಲ್ಲಾಂಗ್‌ನ ಸ್ಟೇಡಿಯಂನಲ್ಲಿ ಭಾನುವಾರ ಕಂಡ ದೃಶ್ಯ ಪುಷ್ಟೀಕರಿಸುತ್ತದೆ.

ಆಟ ಮುಗಿದ ಬಳಿಕ ಸ್ಟೇಡಿಯಂಗಳು ಪಾಸ್ಟಿಕ್, ಆಹಾರದ ಪೊಟ್ಟಣ, ಪೋಸ್ಟರ್, ಕಾಗದ ಮುಂತಾದ ಕಸಗಳಿಂದ ತುಂಬಿ ತುಳುಕುತ್ತಿರುತ್ತದೆ. ಆಟ ನೋಡಲು ಬಂದ ಜನ ಕಸಗಳನ್ನು ಹಾಕುತ್ತಾರಯೇ ಹೊರತು ಸ್ವಚ್ಛತೆ ಮಾಡುವತ್ತ ಗಮನ ನೀಡೋದಿಲ್ಲ.

ಆದರೆ ಇದಕ್ಕೆ ತದ್ವಿರುದ್ಧ ಎಂಬಂತೆ ಶಿಲ್ಲಾಂಗ್‌ನ ಸ್ಟೇಡಿಯಂನಲ್ಲಿ ನಡೆದ ಫುಟ್‌ಬಾಲ್ ಐ-ಲೀಗ್‌ನಲ್ಲಿ ಮೀಜೋರಾಂನ ಐಝ್ವಲ್ ಎಫ್‌ಸಿ ತಂಡ ವಿಜಯಗಳಿಸಿದ ಬಳಿಕ ಅದರ ಅಭಿಮಾನಿಗಳು ಕೇವಲ ಸಂಭ್ರಮಾಚರಣೆ ಮಾಡಿಲ್ಲ, ಬದಲಾಗಿ ಸ್ಟೇಡಿಯಂನಾದ್ಯಂತ ಮಿನಿ ಸ್ವಚ್ಛತಾ ಅಭಿಯಾನ ನಡೆಸಿದ್ದಾರೆ. ಅಲ್ಲಿ ಬಿದ್ದಿದ್ದ ಕಸಕಡ್ಡಿಗಳನ್ನು ತೆಗೆದು ಸ್ಟೇಡಿಯಂನ್ನು ಸಂಪೂರ್ಣವಾಗಿ ಸ್ವಚ್ಛ ಮಾಡಿದ್ದಾರೆ. ಈ ಮೂಲಕ ಜನರ ಮನಸ್ಸನ್ನು ಗೆದ್ದಿದ್ದಾರೆ.

ಇವರ ಕಾರ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಶಂಸೆಗೆ ಪಾತ್ರವಾಗಿದ್ದು, ಐಝ್ವಲ್ ಫುಟ್‌ಬಾಲ್ ಕ್ಲಬ್‌ನ ಅಭಿಮಾನಿಗಳಿಂದ ಕಲಿಯಬೇಕಾದುದು ಬಹಳಷ್ಟಿದೆ ಎಂಬ ಅಭಿಪ್ರಾಯಗಳು ಕೇಳಿ ಬಂದಿದೆ.

ಕೇಂದ್ರ ಕ್ರೀಡಾ ಮತ್ತು ಯುವಜನ ಸಚಿವ ವಿಜಯ್ ಗೋಯಲ್ ಅವರೂ ಈ ಅಭಿಮಾನಿಗಳ ಕಾರ್ಯವನ್ನು ಟ್ವಿಟರ್ ಮೂಲಕ ಶ್ಲಾಘಿಸಿದ್ದು, ’ಐಝ್ವಲ್‌ಐಎಫ್‌ಸಿ ತಂಡ ವಿಜಯದ ಬಳಿಕ ಅದರ ಅಭಿಮಾನಿಗಳು ಸ್ಟೇಡಿಯಂ ಸ್ವಚ್ಛ ಮಾಡಿದ್ದಾರೆ. ಅವರ ಕಾರ್ಯ ಹೃದಯವನ್ನು ಗೆದ್ದಿದೆ, ನಿಜವಾದ ಸ್ವಚ್ಛಭಾರತ ಅಭಿಯಾನ, ಇದನ್ನು ನೋಡಿ ಕಲಿಯಬೇಕಿದೆ’ ಎಂದಿದ್ದಾರೆ.