ಸರ್ವವ್ಯಾಪಿಯಾದ ಭಗವಂತನನ್ನು ಆರಾಧಿಸಬೇಕು

ಬಂಟ್ವಾಳ: ಸರ್ವವ್ಯಾಪಿಯಾದ ಭಗವಂತನಿಗೆ ಮೂರ್ತಿ ಸ್ವರೂಪವನ್ನು ಕೊಟ್ಟು ಚೈತನ್ಯ ರೂಪಿಯಾದ ಅವನನ್ನು ಒಲಿಸಲು ಆರಾಧಿಸಬೇಕು. ಕಲಿಯುಗದಲ್ಲಿ ವಿವಿಧ ಕಾರಣಗಳಿಂದ ದೇವತಾರಾಧನೆ ನಡೆಸಿದರೂ ನಿಸ್ವಾರ್ಥ, ಶ್ರದ್ಧೆ, ನಂಬಿಕೆಯಿಂದ ಜ್ಞಾನಿಗಳಾಗಿ ಮೋಕ್ಷ ಮಾರ್ಗಕ್ಕಾಗಿ ನಡೆಸುವ ಆರಾಧನೆ ನೆಮ್ಮದಿ ನೀಡುತ್ತದೆ ಎಂದು ಅಮೆರಿಕಾ ನ್ಯೂಜೆರ್ಸಿ ಶ್ರೀ ಕೃಷ್ಣವೃಂದಾವನದ ಪ್ರಧಾನ ಅರ್ಚಕ, ಉಳಿ ಶ್ರೀ ವಿಷ್ಣುಮೂರ್ತಿ ಗೋಪಾಲಕೃಷ್ಣ ದೇವಸ್ಥಾನದ ಜೀರ್ಣೋದ್ಧಾರ ಸಮಿತಿ ಸಂಚಾಲಕ ಯೋಗೀಂದ್ರ ಭಟ್ ಹೇಳಿದರು.

ಅವರು ಬಂಟ್ವಾಳ ತಾಲೂಕು ಉಳಿ ಗ್ರಾಮದ ನವೀಕೃತ ಶ್ರೀ ವಿಷ್ಣುಮೂರ್ತಿ ಗೋಪಾಲಕೃಷ್ಣ ದೇವಸ್ಥಾನದಲ್ಲಿ ನಡೆಯುತ್ತಿರುವ ಪುನಃ ಪ್ರತಿಷ್ಠಾಷ್ಟಬಂಧ ಬ್ರಹ್ಮಕಲಶ ಮಹೋತ್ಸವದ 7ನೇ ದಿನದಂದು ಜರುಗಿದ ಧಾರ್ಮಿಕ ಸಭಾ ಕಾರ್ಯಕ್ರಮದಲ್ಲಿ ಆಶೀರ್ವಚನ ನೀಡಿದರು.

ಕಷ್ಟಗಳು ಬಂದಾಗ, ಅಪನಂಬಿಕೆಯಿಂದ ಹಾಗೂ ಕೇವಲ ಲಾಭ ದೃಷ್ಟಿಯಿಂದ ಮಾಡುವ ಭಗವಂತನ ಆರಾಧನೆ ಉತ್ತಮ ಫಲ ನೀಡುವುದಿಲ್ಲ. ಭಗವಂತನಲ್ಲಿ ನಂಬಿಕೆ ಇರಿಸಿ ಶರಣಾದಾಗ ಮಾತ್ರ ಉತ್ತಮ ಫಲ ಪ್ರಾಪ್ತಿಯಾಗುತ್ತದೆ ಎಂದು ಅವರು ಹೇಳಿದರು.

ಮೂಡಬಿದಿರೆ ಉದ್ಯಮಿ, ಜೀರ್ಣೋದ್ಧಾರ ಸಮಿತಿ ಉಪಾಧ್ಯಕ್ಷ ಶ್ರೀಪತಿ ಭಟ್ ಅವರು ಅಧ್ಯಕ್ಷತೆ ವಹಿಸಿ ಮಾತನಾಡಿ ದೇವರು ಕಣ್ಣಿಗೆ ಕಾಣಿಸದಿದ್ದರೂ ಪ್ರತಿಯೋರ್ವರಿಗೂ ಅವನ ಅನುಗ್ರಹದ ಅನುಭವವಾಗುತ್ತದೆ. ಅನಿರೀಕ್ಷಿತ ಫಲ ನೀಡಲು ಭಗವಂತನಿಂದ ಮಾತ್ರ ಸಾಧ್ಯ ಎಂದು ಹೇಳಿದರು.

ಉಪ್ಪಿನಂಗಡಿ ದಂತ ವೈದ್ಯ ಡಾ. ರಾಜಾರಾಂ ಕೆ.ಬಿ., ಜೀರ್ಣೋದ್ಧಾರ ಸಮಿತಿ ಕಾರ್ಯಾಧ್ಯಕ್ಷ ವಿಠಲರಾಜ್ ಬರ್ಕಟ್ಟ ವೇದಿಕೆಯಲ್ಲಿದ್ದರು. ಪ್ರಧಾನ ಅರ್ಚಕ ನಾರಾಯಣ ಮುನ್ನೂರಾಯರು, ಬ್ರಹ್ಮಕಲಶ ಸಮಿತಿ ಪದಾಧಿಕಾರಿಗಳಾದ ಕೆ.ಮಾಯಿಲಪ್ಪ ಸಾಲಿಯಾನ್, ಲಲಿತೇಶ್ ಶೆಟ್ಟಿ ಬಳ್ಳಿ, ಸಂಜೀವ ಗೌಡ ಅಗ್ಪಲ, ದಾಮೋದರ ನಾಯಕ್ ಉಳಿ, ಡೀಕಯ ಪೂಜಾರಿ, ದಿವಾಕರ ರಾವ್, ತಿವರಾಜ್, ವಿಠಲದಾಸ್ ಭಟ್, ಜಾರಪ್ಪ ಕೊಡಂಗೆ, ಅಪ್ಪಿಯಮ್ಮ, ಲಕ್ಷ್ಮಣ ಪೂಜಾರಿ, ಮೋನಪ್ಪ ಪೂಜಾರಿ, ಬ್ರಹ್ಮ ಕಲಶ ಸಮಿತಿಯ ಎಂ.ಜೆ.ರಾವ್, ಕಾಂತಪ್ಪ ಪೂಜಾರಿ, ರಘು ಶೆಟ್ಟಿ, ಶಿವರಾಮ ಗೌಡ, ಚೆನ್ನಪ್ಪ ಪೂಜಾರಿ, ವಿವಿಧ ಸಮಿತಿಗಳ ಪದಾಧಿಕಾರಿ ಸದಸ್ಯರು ಉಪಸ್ಥಿತರಿದ್ದರು.

ಬ್ರಹ್ಮಕಲಶ ಸಮಿತಿಯ ಗುರುಪ್ರಕಾಶ್ ಕೊರಡಿಂಗೇರಿ ಅವರು ಸ್ವಾಗತಿಸಿದರು. ಸೇವಾ ಕೌಂಟರ್ ಅಧ್ಯಕ್ಷ ರಾಜ್‌ಕುಮಾರ್ ಬಳ್ಳಿ ವಂದಿಸಿದರು. ಶಿಕ್ಷಕ ಕೃಷ್ಣ ಆಚಾರ್ಯ ಕಾರ್ಯಕ್ರಮ ನಿರೂಪಿಸಿದರು.