ಅಯೋಧ್ಯೆ ಧಾರ್ಮಿಕ ನಗರವಾಗಿದ್ದು ಮದ್ಯ, ಮಾಂಸ ಸೇವನೆ ನಿಷೇಧಿಸಬೇಕಿದೆ: ಯೋಗಿ

ಲಕ್ನೋ: ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ಅಯೋಧ್ಯೆಯ ಧಾರ್ಮಿಕ ನಗರದಲ್ಲಿ ಮಾಂಸ ಮತ್ತು ಮದ್ಯ ಸೇವನೆಯನ್ನು ನಿಷೇಧಿಸಬೇಕು ಎಂದು ಬುಧವಾರ ಹೇಳಿದ್ದಾರೆ.

ಅಯೋಧ್ಯೆಯಲ್ಲಿ ನಡೆಯುತ್ತಿರುವ ಅಭಿವೃದ್ಧಿ ಯೋಜನೆಗಳ ಪರಿಶೀಲನಾ ಸಭೆಯಲ್ಲಿ ಆದಿತ್ಯನಾಥ್ ಈ ಹೇಳಿಕೆ ನೀಡಿದ್ದಾರೆ. ಆದಿತ್ಯನಾಥ್ ಎರಡು ದಿನಗಳ ಅಯೋಧ್ಯೆಗೆ ಭೇಟಿ ನೀಡಿದ್ದು, ಗುರುವಾರ ಬಿಕಾಪುರ ಪ್ರದೇಶದಲ್ಲಿ ಬಿಜೆಪಿ ಆಯೋಜಿಸಿದ್ದ ಸಾರ್ವಜನಿಕ ಸಭೆಯನ್ನು ಉದ್ದೇಶಿಸಿ ಮಾತನಾಡಿದ್ದಾರೆ.

ಮೂಲಗಳ ಪ್ರಕಾರ, ಸಭೆಯಲ್ಲಿ ಮುಖ್ಯಮಂತ್ರಿಗಳು ಅಯೋಧ್ಯೆಯ ಆಧ್ಯಾತ್ಮಿಕ ಮತ್ತು ಸಾಂಸ್ಕೃತಿಕ ಮಹತ್ವವನ್ನು ಎತ್ತಿ ತೋರಿಸಿದರು ಮತ್ತು ಅಯೋಧ್ಯೆಯು “ಧರ್ಮನಗರಿ” (ಧಾರ್ಮಿಕ ನಗರ) ಆಗಿರುವುದರಿಂದ ಸಾರ್ವಜನಿಕ ಭಾವನೆಗಳನ್ನು ಗೌರವಿಸಬೇಕು ಮತ್ತು ಮಾಂಸ ಮತ್ತು ಮದ್ಯ ಸೇವನೆಯನ್ನು ನಿಷೇಧಿಸಬೇಕು ಎಂದರು

ಸಭೆಯಲ್ಲಿ ಭಾಗವಹಿಸಿದ್ದ ಬಿಜೆಪಿ ಶಾಸಕರೊಬ್ಬರು, ”ಸಿಎಂ ಅವರ ಅಭಿಪ್ರಾಯ ಸಮರ್ಥನೀಯ. ಅಯೋಧ್ಯೆಯು ಧಾರ್ಮಿಕ ನಗರವಾಗಿದ್ದು ಭವಿಷ್ಯದಲ್ಲಿ ಆಧ್ಯಾತ್ಮಿಕ ರಾಜಧಾನಿಯಾಗಲಿದೆ. ಇಲ್ಲಿ ಮದ್ಯ, ಮಾಂಸಾಹಾರ ನಿಷೇಧಿಸಬೇಕು’ ಎಂದರು.

ಬುಧವಾರ ಆದಿತ್ಯನಾಥ್ ಅವರು ಅಯೋಧ್ಯೆಯಲ್ಲಿ ನಡೆಯುತ್ತಿರುವ ರಾಮಮಂದಿರ ನಿರ್ಮಾಣವನ್ನು ಪರಿಶೀಲಿಸಿದರು ಮತ್ತು ಅಯೋಧ್ಯೆಯನ್ನು “ನಗರಾಭಿವೃದ್ಧಿಯ ಮಾದರಿ ನಗರ” ವಾಗಿ ಅಭಿವೃದ್ಧಿಪಡಿಸಲು ಅಧಿಕಾರಿಗಳಿಗೆ ನಿರ್ದೇಶನ ನೀಡಿದರು. ಇದಕ್ಕೂ ಮೊದಲು, ಅಯೋಧ್ಯೆಗೆ ತಲುಪಿದ ನಂತರ, ಸಿಎಂ ಮೊದಲು ಹನುಮಾನ್‌ಗರ್ಹಿ ದೇವಸ್ಥಾನದಲ್ಲಿ ಪ್ರಾರ್ಥನೆ ಸಲ್ಲಿಸಿದರು ಮತ್ತು ರಾಮಲಲ್ಲಾನ ದರ್ಶನ ಪಡೆದರು ಮತ್ತು ‘ಆರತಿ’ ಮತ್ತು ‘ಪರಿಕ್ರಮ’ದಲ್ಲಿ ಭಾಗವಹಿಸಿದರು.