2023ರ ಯುವಕರು 2047 ರಲ್ಲಿ ಭಾರತವನ್ನು ವ್ಯಾಖ್ಯಾನಿಸುತ್ತಾರೆ: ಜಿತೇಂದ್ರ ಸಿಂಗ್

ನವದೆಹಲಿ: 2023ರ ಯುವಕರು 2047 ರಲ್ಲಿ ಭಾರತವನ್ನು ವ್ಯಾಖ್ಯಾನಿಸುತ್ತಾರೆ ಎಂದು ಕೇಂದ್ರ ವಿಜ್ಞಾನ ಮತ್ತು ತಂತ್ರಜ್ಞಾನ ರಾಜ್ಯ ಸಚಿವ ಡಾ. ಜಿತೇಂದ್ರ ಸಿಂಗ್ ಹೇಳಿದ್ದಾರೆ.

ಶಾಂತಿ-ನಿರ್ಮಾಣ ಮತ್ತು ಸಾಮರಸ್ಯ: ಜಮ್ಮು ಮತ್ತು ಕಾಶ್ಮೀರದ ವಿಶ್ವವಿದ್ಯಾನಿಲಯದಲ್ಲಿ ಯುದ್ಧವಿಲ್ಲದ ಯುಗಕ್ಕೆ ನಾಂದಿ ಎಂಬ ವಿಷಯದ ಬಗ್ಗೆ ಯುವ 20 ಸಮಾಲೋಚನೆಯನ್ನು ವರ್ಚುವಲ್ ಮೋಡ್ ಮೂಲಕ ಉದ್ದೇಶಿಸಿ ಮಾತನಾಡಿದ ಡಾ. ಸಿಂಗ್ ಅವರು, ಸ್ವಾತಂತ್ರ್ಯದ ನಂತರ ಮೂರು ತಲೆಮಾರುಗಳು ಕಳೆದಿವೆ ಮತ್ತು ಪ್ರತಿಭೆ ಅಥವಾ ಸಾಮರ್ಥ್ಯಗಳ ಕೊರತೆಯಿಲ್ಲ ಆದರೆ ಅನುಕೂಲಕರ ಪರಿಸರದ ಕೊರತೆಯಿತ್ತು. ಆದರೆ ಈಗ ಪ್ರಧಾನಿ ನರೇಂದ್ರ ಮೋದಿ ಅವರು ಅನುಕೂಲಕರ ಪರಿಸರ ಲಭ್ಯಗೊಳಿಸಿದ್ದಾರೆ. ಇದು ಉತ್ತಮ ಅವಕಾಶವಾಗಿದೆ ಆದರೆ ಅದೇ ಸಮಯದಲ್ಲಿ ಸವಾಲುಗಳು ಕೂಡ ಇದೆ. ಇದೇ ಯುವಕರು ಭಾರತದ ಮುಖವನ್ನು 2047ರಲ್ಲಿ ನಿರ್ಣಯಿಸುತ್ತಾರೆ. ಇಂದು ಮೂವತ್ತು ವರ್ಷ ವಯಸ್ಸಿನವರು 2047ರಲ್ಲಿ ಪ್ರಧಾನ ಪ್ರಜೆಗಳಾಗುತ್ತಾರೆ ಎಂದಿದ್ದಾರೆ.

ಮೇ 2014 ರಲ್ಲಿ ಸರ್ಕಾರ ರಚನೆಯಾದ ನಂತರ ಪ್ರಧಾನಿ ಮೋದಿ ಅವರು ಬಡವರ ಉನ್ನತಿ, ಮಹಿಳಾ ಸಬಲೀಕರಣ ಮತ್ತು ಯುವಜನರ ಶ್ರೇಯೋಭಿವೃದ್ಧಿಗೆ ಈ ಸರ್ಕಾರವನ್ನು ಮೀಸಲಿಡುವುದಾಗಿ ಹೇಳಿದ್ದರು. 2014 ರ ಮೊದಲು, ದೇಶದ ಪರಿಸರವು ಹತಾಶೆಯಿಂದ ಕೂಡಿತ್ತು. ಪ್ರಧಾನಿ ಮೋದಿ ನೇತೃತ್ವದ ಸರ್ಕಾರವು 9 ವರ್ಷಗಳನ್ನು ಪೂರೈಸಿದೆ, ಮೋದಿ ಅವರು ಮಾತಿನಂತೆ ನಡೆದುಕೊಂಡಿದ್ದಾರೆ ಮತ್ತು ಅವರ ತಂಡವನ್ನು ಮಾತಿನಂತೆ ನಡೆಯುವಂತೆ ಮಾಡಿದ್ದಾರೆ ಎಂದು ಪುರಾವೆಗಳೊಂದಿಗೆ ಹೇಳಬಹುದು ಎಂದಿದ್ದಾರೆ.

ಮೊದಲಿನಿಂದಲೂ ಪ್ರಧಾನಿ ಮೋದಿ ಯುವಜನತೆಗೆ ಸಂಬಂಧಿಸಿದ ಸಮಸ್ಯೆಗಳು ಮತ್ತು ಕಾಳಜಿಗಳಿಗೆ ಹೆಚ್ಚಿನ ಆದ್ಯತೆ ನೀಡಿದರು. ಯುವಕರಿಗೆ ಜೀವನೋಪಾಯ, ಸರ್ಕಾರಿ ಉದ್ಯೋಗಗಳು ಮತ್ತು ಆದಾಯಕ್ಕಾಗಿ ಹೊಸ ಮಾರ್ಗಗಳು ಮತ್ತು ಅವಕಾಶಗಳನ್ನು ಸೃಷ್ಟಿಸಲು ಪ್ರಧಾನಿ ನಿರಂತರವಾಗಿ ಪ್ರಯತ್ನಿಸಿದರು. ನವಭಾರತದ ಭವಿಷ್ಯವನ್ನು ರೂಪಿಸುವ ಜವಾಬ್ದಾರಿ ಇಂದಿನ ಯುವಕರ ಮೇಲಿದೆ ಎಂದು ಡಾ.ಸಿಂಗ್ ಹೇಳಿದರು.