ಲೋಕಸಭಾ ಸೆಕ್ರೆಟರಿ ಜನರಲ್ ಹುದ್ದೆಗೆ ಉತ್ಪಲ್ ಕುಮಾರ್ ಸಿಂಗ್ ನೇಮಕ

ನವದೆಹಲಿ: ಲೋಕಸಭಾ ಸೆಕ್ರೆಟರಿ ಜನರಲ್ ಹುದ್ದೆಗೆ ಹಿರಿಯ ಐಎಎಸ್ ಅಧಿಕಾರಿ ಉತ್ಪಲ ಕುಮಾರ್ ಸಿಂಗ್ ಅವರನ್ನು ನೇಮಕ ಮಾಡಲಾಗಿದೆ.

ಲೋಕಸಭೆಯ ಸ್ಪೀಕರ್ ಓಂ ಬಿರ್ಲಾ ಅವರು ಈ ನೇಮಕಾತಿ ಆದೇಶ‌ವನ್ನು ಹೊರಡಿಸಿದ್ದಾರೆ. ಉತ್ಪಲ್ ಕುಮಾರ್ ಸಿಂಗ್ ಅವರು 1986 ರ ಬ್ಯಾಚ್‌ನ ಉತ್ತರಾಖಂಡ್‌ ಕೆಡರ್‌ನ ಐಎಎಸ್ ಅಧಿಕಾರಿಯಾಗಿದ್ದವರು‌. ಈ ಹುದ್ದೆ ಕ್ಯಾಬಿನೆಟ್ ಸೆಕ್ರೆಟರಿ ಸ್ತರದ ಹುದ್ದೆಯಾಗಿದೆ.

ಡಿ. 1 ರಿಂದ ತೊಡಗಿದಂತೆ ಉತ್ಪಲ್ ಕುಮಾರ್ ಸಿಂಗ್ ಅವರ ಅಧಿಕಾರಾವಧಿ ಆರಂಭವಾಗಲಿದೆ. ಈ ವರೆಗೆ ಲೋಕಸಭಾ ಸೆಕ್ರೆಟರಿ ಜನರಲ್ ಆಗಿದ್ದ ಸ್ನೇಹಲತಾ ಶ್ರೀ ವಾಸ್ತವ ಅವರಿಂದ ತೆರವಾಗುತ್ತಿರುವ ಸ್ಥಾನವನ್ನು ಉತ್ಪಲ್ ಕುಮಾರ್ ಸಿಂಗ್ ವಹಿಸಿಕೊಳ್ಳಲಿದ್ದಾರೆ. ಪ್ರಸ್ತುತ ಇವರು ಲೋಕಸಭಾ ಕಾರ್ಯದರ್ಶಿ‌ಯಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಇವರಿಗೆ 34 ವರ್ಷಗಳ ವಿವಿಧ ಕ್ಷೇತ್ರಗಳಲ್ಲಿ ಸೇವೆ ಸಲ್ಲಿಸಿದ ಅನುಭವವಿದೆ. ಕೇಂದ್ರ ಮತ್ತು ರಾಜ್ಯ ಸರ್ಕಾರ‌ಗಳ ಅನೇಕ ಜವಾಬ್ದಾರಿ‌ಯುತ ಹೊಣೆಗಾರಿಕೆಗಳನ್ನು ನಿರ್ವಹಿಸಿದ ಅನುಭವವೂ ಇವರಿಗಿದೆ.

ಎರಡೂವರೆ ವರ್ಷ ಉತ್ತರಾಖಂಡ್‌ನ ಮುಖ್ಯ ಕಾರ್ಯದರ್ಶಿ‌ಯಾಗಿ, ಕೇಂದ್ರ‌ದಲ್ಲಿ ಕೃಷಿ, ರೈತ ಕಲ್ಯಾಣ ಸಚಿವಾಲಯದಲ್ಲಿ ಹೆಚ್ಚುವರಿ ಕಾರ್ಯದರ್ಶಿ‌ಯಾಗಿಯೂ ಕೆಲಸ ಮಾಡಿದ ಅನುಭವವನ್ನು ಉತ್ಪಲ್ ಕುಮಾರ್ ಸಿಂಗ್ ಹೊಂದಿದ್ದಾರೆ.