ಹೊಸ ವಿಶ್ವ ವ್ಯವಸ್ಥೆಯಲ್ಲಿ ಭಾರತ ಪ್ರಮುಖ ಪಾತ್ರ ವಹಿಸಲಿದೆ: ಮೋದಿ

ನವದೆಹಲಿ: ಪ್ರಸ್ತುತ ಜಗತ್ತು ಎದುರಿಸುತ್ತಿರುವ ಸವಾಲುಗಳನ್ನು ಪರಿಹರಿಸಲು ಹಳೆಯ ವಿಶ್ವ ವ್ಯವಸ್ಥೆಯು ಅಸಮರ್ಥವಾಗಿರುವುದರಿಂದ, ಒಂದು ಹೊಸ ವಿಶ್ವ ವ್ಯವಸ್ಥೆಯು ಉದಯಿಸುತ್ತಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ. ಈ ಹೊಸ ವಿಶ್ವ ವ್ಯವಸ್ಥೆಯಲ್ಲಿ ಭಾರತವು ಪ್ರಮುಖ ಪಾತ್ರ ವಹಿಸಲಿದೆ ಎಂದು ಹೇಳಿದ ಅವರು, ಮಾನವಕುಲದ ಸಾಮೂಹಿಕ ಒಳಿತಿಗಾಗಿ ಕರೆ ನೀಡಿದರು.

ನಿನ್ನೆ ಸಂಜೆ ನವದೆಹಲಿಯಲ್ಲಿ ನಡೆದ ಶೃಂಗಸಭೆಯೊಂದರಲ್ಲಿ ‘ವ್ಯವಸ್ಥೆಗಳ ನಡುವಿನ ಜಗತ್ತು’ (A World Between Orders) ಎಂಬ ವಿಷಯದ ಕುರಿತು ಮುಖ್ಯ ಭಾಷಣ ಮಾಡಿದ ಪ್ರಧಾನಿಯವರು, ತಂತ್ರಜ್ಞಾನದ ಆಗಮನವು ಹೊಸ ಶಕ್ತಿಗಳು ಮತ್ತು ಹೊಸ ಧ್ವನಿಗಳ ಉದಯಕ್ಕೆ ಕಾರಣವಾಗಿದೆ ಎಂದು ಹೇಳಿದರು. ಜಗತ್ತನ್ನು ಬಲಪಡಿಸಲು ಭಾರತವು ತನ್ನದೇ ಆದ ಸಾಮರ್ಥ್ಯಗಳನ್ನು ವೃದ್ಧಿಸಿಕೊಳ್ಳುತ್ತಿದೆ ಎಂದು ಅವರು ತಿಳಿಸಿದರು.

ಬಹುಪಕ್ಷೀಯ ಸಂಸ್ಥೆಗಳಲ್ಲಿ ಸುಧಾರಣೆಗಳ ಅಗತ್ಯವನ್ನೂ ಪ್ರಧಾನಿಯವರು ಒತ್ತಿ ಹೇಳಿದರು. ‘ಗ್ಲೋಬಲ್ ಸೌತ್’ (ಜಾಗತಿಕ ದಕ್ಷಿಣ ರಾಷ್ಟ್ರಗಳು) ಧ್ವನಿಗೆ ಸೂಕ್ತ ಸ್ಥಾನ ಸಿಗಬೇಕು ಎಂದು ಅವರು ಪ್ರತಿಪಾದಿಸಿದರು. ಅಂತರರಾಷ್ಟ್ರೀಯ ಸಹಕಾರವು ಕೇವಲ ಒಳ್ಳೆಯ ಕಾಲಕ್ಕೆ ಮಾತ್ರ ಸೀಮಿತವಾಗಿರಬಾರದು, ಬದಲಾಗಿ ಬಿಕ್ಕಟ್ಟಿನ ಸಮಯದಲ್ಲೂ ಪರಿಣಾಮಕಾರಿಯಾಗಿರಬೇಕು ಎಂದು ಅವರು ಹೇಳಿದರು.

ಭಾರತವು ವಿಶ್ವದ ಮೂರು ಅತಿದೊಡ್ಡ ಆರ್ಥಿಕತೆಗಳಲ್ಲಿ ಒಂದಾಗುವತ್ತ ಸಾಗುತ್ತಿದೆ ಎಂದು ಹೇಳಿದ ಪ್ರಧಾನಿಯವರು, ಜಾಗತಿಕ ಅನಿಶ್ಚಿತತೆಗಳ ನಡುವೆಯೂ ಭಾರತವು ವಿಶ್ವದ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಪ್ರಮುಖ ಆರ್ಥಿಕತೆಯಾಗಿ ಹೊರಹೊಮ್ಮಿದೆ ಎಂದು ತಿಳಿಸಿದರು. ‘ಸಬಲೀಕರಣಕ್ಕಾಗಿ ಶಕ್ತಿ’ಎಂಬ ದೃಷ್ಟಿಕೋನವನ್ನು ಮುಂದಿಟ್ಟ ಅವರು, ‘ವಿಕಸಿತ ಭಾರತ’  ಕೇವಲ ಭಾರತದ ಪ್ರಗತಿಯಷ್ಟೇ ಅಲ್ಲ, ಬದಲಾಗಿ ಉತ್ತಮ ಜಗತ್ತಿನ ನಿರ್ಮಾಣಕ್ಕೂ ಒಂದು ಭರವಸೆಯಾಗಿದೆ ಎಂದು ಹೇಳಿದರು. ಭಾರತವು ಸ್ವಾವಲಂಬನೆಯತ್ತ ಸಾಗುತ್ತಿರುವಾಗ, ಅದು ಜಾಗತಿಕ ಪೂರೈಕೆ ಸರಪಳಿಗಳನ್ನು ಬಲಪಡಿಸುತ್ತದೆ ಎಂದು ಮೋದಿ ಹೇಳಿದರು. ಭಾರತವು ಈಗ ಜಗತ್ತಿನೊಂದಿಗೆ ಕೇವಲ ‘ಬ್ಯಾಕ್ ಆಫೀಸ್’ (ಸಹಾಯಕ ಸೇವಾ ಕೇಂದ್ರ) ಆಗಿ ಮಾತ್ರವಲ್ಲದೆ, ಬೌದ್ಧಿಕ ಕೇಂದ್ರ ಆಗಿ ಸಹಕರಿಸುತ್ತಿದೆ ಎಂದರು.

ವಿಶ್ವದ ಅರ್ಧದಷ್ಟು ‘ಗ್ಲೋಬಲ್ ಕ್ಯಾಪಬಿಲಿಟಿ ಸೆಂಟರ್‌’ಗಳು (ಜಾಗತಿಕ ಸಾಮರ್ಥ್ಯ ಕೇಂದ್ರಗಳು) ಭಾರತದಲ್ಲಿವೆ ಎಂದು ಉಲ್ಲೇಖಿಸಿದ ಪ್ರಧಾನಿಯವರು, ಈ ಕೇಂದ್ರಗಳು ಕೇವಲ ಮೂಲಭೂತ ಬೆಂಬಲ ಸೇವೆಗಳಿಂದ ಮುಂದುವರಿದು, ಈಗ ಸುಧಾರಿತ ಕೃತಕ ಬುದ್ಧಿಮತ್ತೆ (AI), ಕ್ಲೌಡ್ ಕಂಪ್ಯೂಟಿಂಗ್, ಎಂಜಿನಿಯರಿಂಗ್, ವಿಶ್ಲೇಷಣೆ ಮತ್ತು ಉತ್ಪನ್ನ ಅಭಿವೃದ್ಧಿಯಂತಹ ಕ್ಷೇತ್ರಗಳಲ್ಲಿ ಕಾರ್ಯನಿರ್ವಹಿಸುತ್ತಿವೆ ಎಂದು ವಿವರಿಸಿದರು.

ಜಗತ್ತು ಹೊಸ ವ್ಯವಸ್ಥೆಯನ್ನು ಹುಡುಕುತ್ತಿರುವಾಗ, ಕೆಲವರು ಭಾರತದಲ್ಲಿ ಅಸ್ಥಿರತೆಯನ್ನು ಬಯಸುತ್ತಿದ್ದಾರೆ ಎಂದು ಮೋದಿ ಎಚ್ಚರಿಸಿದರು. ಜಗತ್ತಿನಲ್ಲಿ ಇಷ್ಟೊಂದು ಗೊಂದಲ ಮತ್ತು ಅಶಾಂತಿ ಇರುವಾಗ, ಒಂದು ಬಲಿಷ್ಠ ಭಾರತದ ಚಿತ್ರಣವು ಜಾಗತಿಕ ಮಟ್ಟದಲ್ಲಿ ಮೂಡಿಬರಬೇಕು ಎಂದು ಅವರು ಹೇಳಿದರು. ಕೆಲವರು ಭಾರತದ ಘನತೆಗೆ ಮಸಿ ಬಳಿಯಲು ಪ್ರಯತ್ನಿಸುತ್ತಿದ್ದಾರೆ ಎಂದು ಅವರು ಆರೋಪಿಸಿದರು. ಕಾಂಗ್ರೆಸ್ ಪಕ್ಷವನ್ನು ಪರೋಕ್ಷವಾಗಿ ಟೀಕಿಸಿದ ಮೋದಿ, ಕೆಲವರು ವಿದೇಶಗಳಿಗೆ ಹೋಗಿ ಭಾರತವನ್ನು ಅವಹೇಳನ ಮಾಡುತ್ತಾರೆ ಎಂದು ಹೇಳಿದರು.

ಇದೇ ಕಾರ್ಯಕ್ರಮದಲ್ಲಿ ಮಾತನಾಡಿದ ವಿದೇಶಾಂಗ ವ್ಯವಹಾರಗಳ ಸಚಿವ ಡಾ. ಎಸ್. ಜೈಶಂಕರ್ ಅವರು, ಜಗತ್ತಿನಾದ್ಯಂತ ಕಂಡುಬರುವ ಅನೇಕ ಅಶಾಂತಿಯ ಸನ್ನಿವೇಶಗಳಲ್ಲಿ, ತಮ್ಮ ಸ್ವಾರ್ಥ ಅಜೆಂಡಾಗಳನ್ನು ಮುಂದುವರಿಸಲು ಇಂತಹ ಪರಿಸ್ಥಿತಿಗಳನ್ನು ಬಳಸಿಕೊಳ್ಳುವವರಿಂದ ಬಾಹ್ಯ ಪ್ರೋತ್ಸಾಹ ಮತ್ತು ಬೆಂಬಲ ಸಿಗುತ್ತಿರುತ್ತದೆ ಎಂದು ಹೇಳಿದರು. ಪ್ರಶ್ನೆಯೊಂದಕ್ಕೆ ಉತ್ತರಿಸಿದ ಡಾ. ಜೈಶಂಕರ್ ಅವರು, ಜಗತ್ತು ಬದಲಾದಂತೆ, ಗಡಿರಹಿತ ರಾಜಕೀಯ ಬೆಳೆದಂತೆ, ತಂತ್ರಜ್ಞಾನ ವಿಸ್ತರಿಸಿದಂತೆ ಮತ್ತು ವಿಶ್ವ ಆರ್ಥಿಕತೆಯು ಜಾಗತೀಕರಣಗೊಂಡಂತೆ, ಅಸ್ಥಿರತೆ ಹಾಗೂ ಏರಿಳಿತಗಳು ನಿರಂತರವಾಗಿ ಹೆಚ್ಚಾಗಿವೆ ಎಂದು ಅಭಿಪ್ರಾಯಪಟ್ಟರು.