ಯುರೋಪ್‌ಗೆ ಶಸ್ತ್ರಾಸ್ತ್ರ ರಫ್ತು ಮಾಡುವ 3 ನೇ ಅತಿದೊಡ್ಡ ರಾಷ್ಟ್ರವಾದ ಭಾರತ

ನವದೆಹಲಿ: ಯುರೋಪಿಯನ್ ಒಕ್ಕೂಟದ ‘ರೀ-ಆರ್ಮ್ ಯುರೋಪ್’ (ReArm Europe) ಉಪಕ್ರಮದ ಅಡಿಯಲ್ಲಿ ರಕ್ಷಣಾ ಸಲಕರಣೆಗಳಿಗೆ ಹೆಚ್ಚುತ್ತಿರುವ ಬೇಡಿಕೆ ಮತ್ತು ದೇಶೀಯ ಉತ್ಪಾದನಾ ವಲಯದ ವಿಸ್ತರಣೆಯಿಂದಾಗಿ, ಯುರೋಪ್‌ಗೆ ಶಸ್ತ್ರಾಸ್ತ್ರಗಳನ್ನು ರಫ್ತು ಮಾಡುವ ಮೂರನೇ ಅತಿದೊಡ್ಡ ರಾಷ್ಟ್ರವಾಗಿ ಭಾರತ ಹೊರಹೊಮ್ಮಿದೆ.

ರಕ್ಷಣಾ ಕಾರ್ಯದರ್ಶಿ ರಾಜೇಶ್ ಕುಮಾರ್ ಸಿಂಗ್ ಅವರು ನಿನ್ನೆ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡುತ್ತಾ ಈ ವಿಷಯವನ್ನು ತಿಳಿಸಿದರು. ಭಾರತದ ರಕ್ಷಣಾ ರಫ್ತುಗಳು ಸಾರ್ವಕಾಲಿಕ ಗರಿಷ್ಠ ಮಟ್ಟವಾದ 38 ಸಾವಿರದ 424 ಕೋಟಿ ರೂಪಾಯಿಗಳನ್ನು ತಲುಪಿವೆ ಎಂದು ಅವರು ಹೇಳಿದರು.

ಯುರೋಪ್‌ಗೆ ರಫ್ತು ಹೆಚ್ಚಾಗಲು ಮುಖ್ಯ ಕಾರಣವೆಂದರೆ, ಪ್ರಮಾಣಿತ ಮದ್ದುಗುಂಡುಗಳು, ಫಿರಂಗಿ ಶೆಲ್‌ಗಳು ಹಾಗೂ ವಿವಿಧ ಗಾತ್ರದ (ದೊಡ್ಡ ಮತ್ತು ಸಣ್ಣ ಕ್ಯಾಲಿಬರ್) ಮದ್ದುಗುಂಡುಗಳಿಗೆ ಅಲ್ಲಿ ಹೆಚ್ಚುತ್ತಿರುವ ಬೇಡಿಕೆಯಾಗಿದೆ ಎಂದು ಅವರು ವಿವರಿಸಿದರು.

ಕಳೆದ ದಶಕದಲ್ಲಿ ದೇಶದ ರಕ್ಷಣಾ ಉತ್ಪಾದನಾ ಪರಿಸರ ವ್ಯವಸ್ಥೆಯು ಗಮನಾರ್ಹ ಬೆಳವಣಿಗೆಯನ್ನು ಕಂಡಿದೆ ಎಂದ ಸಿಂಗ್‌,  ಈ ವಲಯವು 16 ಪ್ರಮುಖ ಸಾರ್ವಜನಿಕ ವಲಯದ ಕಂಪನಿಗಳು, ಸುಮಾರು 840 ದೊಡ್ಡ ಮತ್ತು ಮಧ್ಯಮ ಗಾತ್ರದ ಖಾಸಗಿ ಉದ್ಯಮಗಳು ಹಾಗೂ ಸ್ಟಾರ್ಟ್‌ಅಪ್‌ಗಳು ಸೇರಿದಂತೆ ಸುಮಾರು 17 ಸಾವಿರ ಸಣ್ಣ ಉದ್ಯಮಗಳನ್ನು ಒಳಗೊಂಡಿದೆ. ಭಾರತವು ಪ್ರಸ್ತುತ 80ಕ್ಕೂ ಹೆಚ್ಚು ದೇಶಗಳಿಗೆ ರಕ್ಷಣಾ ಸಲಕರಣೆಗಳನ್ನು ರಫ್ತು ಮಾಡುತ್ತಿದೆ ಎಂದರು. ಭಾರತದ ರಕ್ಷಣಾ ರಫ್ತುಗಳಲ್ಲಿ ಫಿರಂಗಿಗಳು ಮತ್ತು ಮದ್ದುಗುಂಡುಗಳಿಂದ ಹಿಡಿದು ಸಣ್ಣ ಶಸ್ತ್ರಾಸ್ತ್ರಗಳು, ಹೆಲ್ಮೆಟ್‌ಗಳು, ಬುಲೆಟ್‌ಪ್ರೂಫ್ ಜಾಕೆಟ್‌ಗಳು ಮತ್ತು ಇತರ ಯುದ್ಧತಂತ್ರದ ಸಲಕರಣೆಗಳು ಸೇರಿವೆ.

ಸುಮಾರು 20 ರಿಂದ 25 ಬಿಲಿಯನ್ ಡಾಲರ್‌ಗಳಷ್ಟು ಅಂದಾಜಿಸಲಾದ ವಾರ್ಷಿಕ ರಕ್ಷಣಾ ಬಂಡವಾಳ ವೆಚ್ಚದ ಪೈಕಿ, ಶೇಕಡಾ 75 ರಷ್ಟು ಮೊತ್ತವನ್ನು ದೇಶೀಯವಾಗಿಯೇ ಖರ್ಚು ಮಾಡುವಂತೆ ನೋಡಿಕೊಳ್ಳುವುದು ಸರ್ಕಾರದ ಗುರಿಯಾಗಿದೆ ಎಂದು ಸಿಂಗ್ ಒತ್ತಿ ಹೇಳಿದರು. ಇದರಲ್ಲಿ ಭಾರತದಲ್ಲಿಯೇ ವಿನ್ಯಾಸಗೊಳಿಸಲಾದ, ಅಭಿವೃದ್ಧಿಪಡಿಸಲಾದ ಮತ್ತು ತಯಾರಿಸಲಾದ ಉತ್ಪನ್ನಗಳಿಗೆ ಆದ್ಯತೆ ನೀಡಲಾಗುತ್ತದೆ.

ಭಾರತೀಯ ರಕ್ಷಣಾ ತಯಾರಕರು ಅಂತರರಾಷ್ಟ್ರೀಯ ಖರೀದಿದಾರರ, ವಿಶೇಷವಾಗಿ ಆಗ್ನೇಯ ಏಷ್ಯಾದ ದೇಶಗಳ ಗಮನ ಸೆಳೆಯುತ್ತಿದ್ದಾರೆ ಎಂದು ರಕ್ಷಣಾ ಕಾರ್ಯದರ್ಶಿ ತಿಳಿಸಿದರು. ಸಣ್ಣ ಶಸ್ತ್ರಾಸ್ತ್ರಗಳು, ಬಿಡಿಭಾಗಗಳು ಮತ್ತು ಫಿರಂಗಿ ವ್ಯವಸ್ಥೆಗಳು ಸೇರಿದಂತೆ ವಿವಿಧ ರೀತಿಯ ರಕ್ಷಣಾ ಸಲಕರಣೆಗಳಿಗೆ ಅಲ್ಲಿ ಬೇಡಿಕೆಯಿದೆ.