ಮಲ್ಲ ಶ್ರೀ ಕ್ಷೇತ್ರದಲ್ಲಿ ಗೋ ಜ್ಯೋತಿ ರಥ ಯಾತ್ರೆಗೆ ಭವ್ಯ ಸ್ವಾಗತ

ಮುಳ್ಳೇರಿಯ : ಬಜಕೂಡ್ಲು ಅಮೃತಧಾರ ಗೋಶಾಲೆಯ ನೂತನ ಕಟ್ಟಡ ಪ್ರವೇಶ ಕಾರ್ಯಕ್ರಮದ ಅಂಗವಾಗಿ ಆರಂಭವಾಗಿರುವ ಗೋ ಜ್ಯೋತಿ ರಥ ಯಾತ್ರೆಗೆ ಮಲ್ಲ ಶ್ರೀ ದುರ್ಗಾಪರಮೇಶ್ವರಿ ಕ್ಷೇತ್ರ ಪರಿಸರದಲ್ಲಿ ಭವ್ಯ ಸ್ವಾಗತ ನೀಡಲಾಯಿತು.

ಮಲ್ಲ ಶ್ರೀ ದುರ್ಗಾಪರಮೇಶ್ವರಿ ಕ್ಷೇತ್ರದ ಮೊಕ್ತೇಸರ ಆನೆಮಜಲು ವಿಷ್ಣು ಭಟ್‌ರವರು ಗೋಮಾತೆ ಮತ್ತು ಶ್ರೀಕೃಷ್ಣನಿಗೆ ಆರತಿ ಬೆಳಗಿ, ಯಾತ್ರೆಗೆ ಶುಭ ಕೋರಿದರು. ಶ್ರೀ ಕ್ಷೇತ್ರದಲ್ಲಿ ಸೇರಿದ ಭಕ್ತರು ಇದೇ ಸಂದರ್ಭದಲ್ಲಿ ಸರದಿ ಸಾಲಿನಲ್ಲಿ ಬಂದು ಕಾಸರಗೋಡು ಗಿಡ್ಡ ಗೋವಿನ ಹಾಲಿನಿಂದ ತಯಾರಿಸಿದ ತುಪ್ಪದಿಂದ ಆರತಿ ಬೆಳಗಿದರು.

ನಿವೃತ್ತ ಮುಖ್ಯೋಪಾಧ್ಯಾಯ ಉಪ್ಪಂಗಳ ವೆಂಕಟ್ರಮಣ ಭಟ್, ಬೇರ್ಕಡವು ಶ್ಯಾಮ್ ಭಟ್, ಗಣೇಶ ಮುಣ್ಚಿಕ್ಕಾನ, ಗಣರಾಜ ಭಟ್ ಕಾನ, ಶ್ಯಾಮ ಪ್ರಸಾದ್ ಸರಳಿ ಮೊದಲಾದವರು ಉಪಸ್ಥಿತರಿದ್ದರು. ಆದಿತ್ಯವಾರದಂದು ಬೆಳಿಗ್ಗೆ ಪೈಕದಿಂದ ಪ್ರಾರಂಭಗೊಂಡ ಗೋಜ್ಯೋತಿ ರಥ ಯಾತ್ರೆಯು ಮಲ್ಲ ಕ್ಷೇತ್ರಕ್ಕೆ ಆಗಮಿಸಿ, ಎಡನೀರು ಕ್ಷೇತ್ರದ ಪರಿಸರ, ಸಂಜೆ ಬದಿಯಡ್ಕ ಪೇಟೆಗೆ ಆಗಮಿಸಿತು.

ಸೋಮವಾರದಂದು ಬೆಳಿಗ್ಗೆ 10 ಗಂಟೆಗೆ ನೀರ್ಚಾಲು ಶಾಲಾ ಪರಿಸರ, ಮಧ್ಯಾಹ್ನ ಮುಂಡಿತ್ತಡ್ಕ, ಸಂಜೆ 4 ಕ್ಕೆ ಉಕ್ಕಿನಡ್ಕ, 6 ಕ್ಕೆ ಪಳ್ಳತ್ತಡ್ಕದಲ್ಲಿ ತಂಗಲಿದೆ. ಗೋವಿಂದ ಗೋಮಾತೆಗೆ ಈ ಗೋ ಜ್ಯೋತಿಯಿಂದ ಅನಂತ ನೀರಾಜನವು ಮೇ. ೨೨ರಂದು ರಾತ್ರಿ ಬಜಕೂಡ್ಲು ಗೋಶಾಲೆಯಲ್ಲಿ ನಡೆಯಲಿದೆ.