ಹಳ್ಳಿಂಗೇರಿಯ ಕಾಮಧೇನು ಗೋಶಾಲೆಯಲ್ಲಿ ವಿಶ್ವ ಪರಿಸರ ದಿನಾಚರಣೆ

ಬೆಳ್ತಂಗಡಿ : ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಬೆಳ್ತಂಗಡಿ ಹಾಗೂ ಪ್ರಗತಿ ಬಂಧು ಸ್ವ ಸಹಾಯ ಸಂಘಗಳ ಒಕ್ಕೂಟ ಕೊಕ್ಕಡ ವಲಯ ಇವರ ಸಹಯೋಗದಲ್ಲಿ ಕೊಕ್ಕಡದ ಹಳ್ಳಿಂಗೇರಿಯ ಕಾಮಧೇನು ಗೋಶಾಲೆಯಲ್ಲಿ ಭಾನುವಾರ ವಿಶ್ವ ಪರಿಸರ ದಿನಾಚರಣೆಯನ್ನು ಆಚರಿಸಲಾಯಿತು.

ಗಿಡವನ್ನು ನೆಡುವ ಮೂಲಕ ಕಾರ್ಯಕ್ರಮವನ್ನು ಉದ್ಘಾಟಿಸಿದ ಜಿ. ಪಂ. ಸದಸ್ಯ ಕೊರಗಪ್ಪ ನಾಯ್ಕ ಅವರು, ಪರಿಸರ ನಮ್ಮ ಉಸಿರು, ಪ್ರತಿಯೊಬ್ಬರು ಗಿಡಗಳನ್ನು ನಾಟಿ ಮಾಡಬೇಕಾದ ಅನಿವಾರ್ಯತೆ ಬಂದಿದೆ. ಈ ವರ್ಷ ನೀರು ಇಲ್ಲದಂತಾಗಿದೆ. ಕೇವಲ ಪರಿಸರ ಕಾರ್ಯಕ್ರಮ ಮಾಡುವುದಲ್ಲದೆ ಅನುಷ್ಠಾನ ಮಾಡುವುದು ಮುಖ್ಯ. ಈ ನಿಟ್ಟಿನಲ್ಲಿ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಯಶಸ್ವಿ ಕಾರ್ಯಕ್ರಮ ಆಯೋಜಿಸುತ್ತಿದೆ ಎಂದು ಶ್ಲಾಘಿಸಿದರು.

ತಾಪಂ ಸದಸ್ಯ ಲಕ್ಷ್ಮೀ ನಾರಾಯಣ ಅವರು, ಪರಿಸರ ರಕ್ಷಣೆಗಾಗಿ ಬೇರೆ ಬೇರೆ ಗಿಡ ನಾಟಿ ಮಾಡಿ ಲಾಭದಾಯಕ ಉದ್ಧೇಶದಿಂದ ರಬ್ಬರ್ ನಾಟಿಯಿಂದಾಗಿ ಜೀವ ಸಂಕುಲ ನಾಶವಾಗುತ್ತಲಿದೆ ಎಂದರು.

ಕೊಕ್ಕಡದ ಪಶು ವೈದ್ಯಾಧಿಕಾರಿ ಡಾ| ಸಿ. ಮಂಜನಾಯಕ್ ಶುಭಹಾರೈಸಿದರು. ಯೋಜನೆಯ ಕೃಷಿ ನಿರ್ದೇಶಕ ಮನೋಜ್ ಮಿನೇಜಸ್ ಅವರು, ಕಾರ್ಯಕ್ರಮ ನಡೆಸಿರುವ ಉದ್ಧೇಶ, ಗೋಶಾಲೆಯಲ್ಲಿರುವ ವಿವಿಧ ತಳಿಯ 96 ಜಾನುವಾರುಗಳು, 3 ಎಕರೆಯಲ್ಲಿ ಹಸಿರು ಹುಲ್ಲು, ಎರೆತೊಟ್ಟಿ, ಗೋಬರ್‌ಗ್ಯಾಸ್, ಬಯೋಡೈಜೆಸ್ಟರ್ ಪ್ರಾತ್ಯಕ್ಷಿಕೆ ಇವುಗಳ ಬಗ್ಗೆ ಮಾಹಿತಿ ನೀಡಿದರು.

ಕೊಕ್ಕಡ ಪಂಚಾಯತ್ ಅಧ್ಯಕ್ಷ ವಿ.ಜೆ. ಸೆಬಾಸ್ಟಿನ್ ಅಧ್ಯಕ್ಷತೆ ವಹಿಸಿದ್ದರು. ಕೊಕ್ಕಡ ವಿಭಾಗದ ವನಪಾಲಕ ಲೋಕೇಶ್, ವಲಯಾಧ್ಯಕ್ಷ ವಿಠ್ಠಲ ಟಿ. ಗೌಡ, ಯೋಜನಾಧಿಕಾರಿ ಸುಧೀರ್‌ಜೈನ್ ಉಪಸ್ಥಿತರಿದ್ದರು.

ಬೆಳ್ತಂಗಡಿ ಯೋಜನಾಧಿಕಾರಿ ರೂಪಾ ಜಿ. ಜೈನ್ ಸ್ವಾಗತಿಸಿ, ಮೇಲ್ವಿಚಾರಕ ಸಂತೋಷ್ ನಿರೂಪಿಸಿ, ಹೈನುಗಾರಿಕಾಧಿಕಾರಿ ರಾಮಕುಮಾರ್ ವಂದಿಸಿದರು. ಕಾರ್ಯಕ್ರಮದಲ್ಲಿ 150 ಮಂದಿ ಪರಿಸರ ಪ್ರೇಮಿಗಳು ಭಾಗವಹಸಿದ್ದು, ವಿಶ್ವ ಪರಿಸರ ದಿನಾಚರಣೆಯ ಧ್ಯೋತಕವಾಗಿ ತಲಾ ಎರಡೆರಡು ಗಿಡಗಳನ್ನು ವಿತರಿಸಲಾಯಿತು.