ಬಂಟ್ವಾಳ : ಪೊಲೀಸರಿಂದ ಅಂತರಾಜ್ಯ ವಾಹನ ಕಳ್ಳತನ ಜಾಲ ಬಯಲು

ಬಂಟ್ವಾಳ : ಬಂಟ್ವಾಳ ನಗರ, ಗ್ರಾಮಾಂತರ, ವಿಟ್ಲ ಠಾಣೆ ಮತ್ತು ಬೆಳ್ತಂಗಡಿ ಠಾಣಾ ವ್ಯಾಪ್ತಿಯಲ್ಲಿ ಬಿರುಸಿನ ಕಾರ್ಯಾಚರಣೆ ನಡೆಸಿದ ಪೊಲೀಸರು ಅಂತರಾಜ್ಯ ವಾಹನ ಕಳ್ಳತನ ಜಾಲವೊಂದನ್ನು ಭಾನುವಾರ ಬಯಲಿಗೆಳೆದಿದ್ದಾರೆ. ಪ್ರಕರಣಕ್ಕೆ ಸಂಬಂಧಿಸಿ ಈಗಾಗಲೇ ೫ಮಂದಿಯನ್ನು ಬಂಧಿಸಲಾಗಿದ್ದು, ಸುಮಾರು 16 ಲಕ್ಷ ರೂ. ಮೌಲ್ಯದ ಸ್ವತ್ತುಗಳನ್ನು ವಶಪಡಿಸಿಕೊಳ್ಳಲಾಗಿದೆ.

5 ವಾಹನ ಕಳವು ಪ್ರಕರಣ ದಾಖಲಿಸಲಾಗಿದ್ದು, 2 ಪ್ರಕರಣ ಬಂಟ್ವಾಳ ನಗರ ಠಾಣೆಯಲ್ಲಿ ದಾಖಲಿಸಲಾಗಿದೆ. ಮತ್ತೆ 3 ಪ್ರಕರಣ ಯಾವ ಠಾಣಾ ವ್ಯಾಪ್ತಿಯೆಂದು ತಿಳಿದುಬಂದಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ. ಇಮ್ರಾನ್, ಮಹಮ್ಮದ್ ಮುಕ್ಸೀನ್, ಅಖ್ತಾರ್, ಶಿಫಾನ್, ಉಮ್ಮರ್ ಫಾರೂಕ್ ಎಂಬವರು ಬಂಧಿತ ಆರೋಪಿಗಳು. ಆರೋಪಿಗಳಿಂದ 6 ಗೋಣಿ ಅಡಿಕೆ, ಶ್ವಿಪ್ಟ್, ರಿಡ್ಝ್, ಮಾರುತಿ-800, ಹಾಗೂ 2ಓಮ್ನಿ ಮಾರುತಿ ಕಾರನ್ನು ವಶಪಡಿಸಲಾಗಿದೆ ಎಂದು ಸರ್ಕಲ್ ಇನ್ಸ್‌ಪೆಕ್ಟರ್ ಕೆ.ಯು.ಬೆಳ್ಳಿಯಪ್ಪ ತಿಳಿಸಿದ್ದಾರೆ.

ಖಚಿತ ಮಾಹಿತಿಯೊಂದರ ಬೆನ್ನೇರಿದ ಬಂಟ್ವಾಳ ಪೊಲೀಸರು ಭಾನುವಾರ ಬೆಳಗಿನ ಜಾವದ ವೇಳೆ, ವಿಟ್ಲದ ಸಾಲೆತ್ತೂರು ಎಂಬಲ್ಲಿ ಒಂದು ರಿಡ್ಝ್ ಮತ್ತು ಶ್ವಿಫ್ಟ್ ಕಾರುವೊಂದನ್ನು ತಡೆದು ತೀವ್ರ ತನಿಖೆ ನಡೆಸಿದರು. ಕಾರಿನಲ್ಲಿ ಪ್ರಯಾಣಿಸುತ್ತಿದ್ದ ಇಮ್ರಾನ್, ಮಹಮ್ಮದ್ ಮುಕ್ಸೀನ್, ಅಖ್ತಾರ್, ಶಿಫಾನ್, ಉಮ್ಮರ್ ಫಾರೂಕ್ ಎಂಬವರನ್ನು ವಿಚಾರಣೆಗೊಳಪಡಿಸಿದಾಗ ವ್ಯವಸ್ಥಿತ ವಾಹನ ಜಾಲವೊಂದು ಬೆಳಕಿಗೆ ಬಂತು. ಆರೋಪಿಗಳು ಈ ಹಿಂದೆ ವಿಟ್ಲ ಠಾಣಾ ವ್ಯಾಪ್ತಿಯ ಬುಡೋಳಿ, ಬಂಟ್ವಾಳ ಗ್ರಾಮಾಂತರ ಠಾಣಾ ವ್ಯಾಪ್ತಿಯ ಇರಾ, ವಗ್ಗ ಮತ್ತು ಬೆಳ್ತಂಗಡಿ ಠಾಣಾ ವ್ಯಾಪ್ತಿಯ ಜಾರಿಗೆಬೈಲು ಎಂಬಲ್ಲಿ ನಡೆದ ಲಕ್ಷಾಂತರ ಮೌಲ್ಯದ ಅಡಿಕೆ ಕಳ್ಳತನದಲ್ಲಿ ಶಾಮೀಲಾಗಿರುವುದಾಗಿ ಪೊಲೀಸ್ ಅಧಿಕಾರಿ ರಕ್ಷಿತ್ ತಿಳಿಸಿದ್ದಾರೆ.

ಬಂಟ್ವಾಳ ನಗರ ಠಾಣಾ ವ್ಯಾಪ್ತಿಯಲ್ಲಿ ನಡೆದ ಮಾರುತಿ ಕಾರು ಮತ್ತು ಮಾರುತಿ ಓಮ್ನಿ ಹಾಗೂ ಉಪ್ಪಿನಂಗಡಿ ಠಾಣೆಯ ಬೈಕ್ ಕಳ್ಳತನ ಪ್ರಕರಣಗಳಲ್ಲಿ ಭಾಗಿಯಾಗಿದ್ದರು. ಜಾಲದಲ್ಲಿ ಶಾಮೀಲಾದ ಇತರ ಆರೋಪಿಗಳನ್ನು ಪೊಲೀಸರು ಹುಡುಕಾಡುತ್ತಿದ್ದಾರೆ. ಆರೋಪಿಗಳ ಪೈಕಿ ಇನ್ನು ಕೆಲವರು ಮಣಿಪಾಲದಲ್ಲಿ ನಡೆದ ದರೋಡೆ, ವಿಟ್ಲದಲ್ಲಿ ನಡೆದ ಹಲ್ಲೆ ಪ್ರಕರಣ, ಉಪ್ಪಿನಂಗಡಿಯಲ್ಲಿ ನಡೆದ ಗಾಂಜಾ ಪ್ರಕರಣ, ಕೇರಳದ ತಿರುವನಂತಪುರದಲ್ಲಿ ನಡೆದ ಅಪಹರಣ ಪ್ರಕರಣಗಳಲ್ಲಿ ಭಾಗಿಯಾದ ಆರೋಪದಲ್ಲಿ ಜೈಲು ಶಿಕ್ಷೆ ಅನುಭವಿಸಿದ್ದರು.

ಎಸ್ಪಿ ಡಾ.ಶರಣಪ್ಪ ಎಸ್‌ಡಿ, ಎಡಿಷನಲ್ ಡಿವೈಎಸ್ಪಿ ಎಂ.ಶೇಖರಪ್ಪ, ಬಂಟ್ವಾಳ ಎಎಸ್ಪಿ ರಾಹುಲ್ ಕುಮಾರ್ ಅವರ ಮಾರ್ಗದರ್ಶನದಲ್ಲಿ ಕಾರ್ಯಾಚರಿಸಿದ ಬಂಟ್ವಾಳ ಸರ್ಕಲ್ ಇನ್ಸ್‌ಪೆಕ್ಟರ್ ಕೆ.ಯು ಬೆಳ್ಳಿಯಪ್ಪ ನೇತೃತ್ವದ ತಂಡದಲ್ಲಿ ಎಸ್‌ಐಗಳಾದ ರಕ್ಷಿತ್ ಎ.ಕೆ, ನಂದಕುಮಾರ್, ಪ್ರಕಾಶ್ ದೇವಾಡಿಗ, ಪ್ರೊಬೇಷನರಿ ಎಸ್ ಮಂಜುನಾಥ, ಎಎಸ್‌ಐ ಸಂಜೀವ, ಹೆಡ್‌ಕಾನ್ಸ್‌ಸ್ಟೇಬಲ್ ಗಳಾದ ರಘುರಾಮ ಹೆಗ್ಡೆ, ಗಿರೀಶ್, ಸುಂದರ್ ರಾಜ್, ಸುರೇಶ್, ಸಿಬ್ಬಂದಿಗಳಾದ ಪ್ರವೀಣ್ ರೈ, ರಕ್ಷಿತ್ ರೈ, ಭವಿತ್ ರೈ, ಜನಾರ್ದನ, ಲಕ್ಷ್ಮಣ್, ಜಗದೀಶ್, ಡಿಸಿಐಬಿ ಎಎಸ್‌ಐ ಸಚಿಜೀವ ಪುರುಷ, ಸಿಬ್ಬಂದಿಗಳಾದ ಉದಯ ರೈ, ತಾರನಾಥ, ವಿಜಯೇಶ್ವರ, ಸಂಪತ್, ಯೋಗೀಶ್, ನಾರಾಯಣ ಗೌಡ, ಪ್ರವೀಣ್, ಪ್ರಶಾಂತ್, ಸಂಪತ್ ಭಾಗವಹಿಸಿದ್ದರು. ಕಾರ್‍ಯಾಚರಣೆ ತಂಡದಲ್ಲಿದ್ದ ಅಧಿಕಾರಿ, ಸಿಬ್ಬಂದಿಗಳಿಗೆ ಪೊಲೀಸ್ ಇಲಾಖೆ ಬಹುಮಾನವನ್ನು ಘೋಷಿಸಿದೆ.