ಏಕಾಗ್ರತೆಯಿಂದ ಪ್ರಾರ್ಥನೆ ಮಾಡಿದಾಗ ಕಷ್ಟ ನಿವಾರಣೆಯಾಗಿ ಇಷ್ಟ ಪ್ರಾಪ್ತಿ

ಬೆಳ್ತಂಗಡಿ : ಇಹಪರಗಳಲ್ಲಿ ಸುಖ ಶಾಂತಿ, ನೆಮ್ಮದಿ ಪಡೆಯಬೇಕಾದರೆ ಪಂಚೇಂದ್ರಿಯಗಳ ನಿಗ್ರಹದೊಂದಿಗೆ ಪರಿಶುದ್ಧ ಮನಸ್ಸಿನಿಂದ ಫಲಾಪೇಕ್ಷೆ ಇಲ್ಲದೆ ದೇವರ ಧ್ಯಾನ, ಪ್ರಾರ್ಥನೆ, ಆರಾಧನೆ ಮಾಡಿದಾಗ ಮಾತ್ರ ಎಂದು ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆಯವರು ಹೇಳಿದರು.

ಅವರು ಸೋಮವಾರ ರಾತ್ರಿ ಧರ್ಮಸ್ಥಳದಲ್ಲಿ ಸೋಮವಾರ ಶಿವರಾತ್ರಿ ಸಂದರ್ಭದಲ್ಲಿ ಶಿವ-ಪಂಚಾಕ್ಷರಿ ಜಪಯಜ್ಞಕ್ಕೆ ಚಾಲನೆನೀಡಿ ಶಿವರಾತ್ರಿ ಸಂದೇಶ ನೀಡಿದರು. ದೇವರು ಸರ್ವ ವ್ಯಾಪಿಯಾಗಿದ್ದರೂ ದೇವರ ಸಾನ್ನಿಧ್ಯದಲ್ಲಿ ಏಕಾಗ್ರತೆಯಿಂದ ಪ್ರಾರ್ಥನೆ ಮಾಡಿದಾಗ ನಮ್ಮ ಕಷ್ಟಗಳೆಲ್ಲ ನಿವಾರಣೆಯಾಗಿ ಇಷ್ಟ ಪ್ರಾಪ್ತಿಯಾಗುತ್ತದೆ. ಭಯ ಹಾಗೂ ಒತ್ತಡದಿಂದ ಪಾದಯಾತ್ರೆ ಮಾಡಬಾರದು. ಸಾಕಷ್ಟು ಎಚ್ಚರಿಕೆ ಹಾಗೂ ಮುಂಜಾಗರೂಕತೆ ವಹಿಸಬೇಕು. ದೈಹಿಕ ಆರೋಗ್ಯವನ್ನು ಕಡೆಗಣಿಸಬಾರದು ಎಂದರು.

ಈ ಬಾರಿ ನಾಲ್ಕೈದು ಮಂದಿ ಪಾದಯಾತ್ರೆ ಸಂದರ್ಭ ಅಪಮೃತ್ಯು ಆಗುರುವುದರ ಬಗ್ಗೆ ಅವರು ಖೇದ ವ್ಯಕ್ತಪಡಿಸಿದರು. ಶಾಂತ ಸ್ವರೂಪಿ, ಮಂಗಳಕಾರಕನಾದ ಶಿವನ ಕಲ್ಪನೆ ಧ್ಯಾನಕ್ಕೆ ಯೋಗ್ಯವಾಗಿದೆ. ಶಿವ ಕ್ಷೇತ್ರಕ್ಕೆ ಬಂದು ಏಕಾಗ್ರತೆಯಿಂದ ಧ್ಯಾನ ಮಾಡಿ ತಮ್ಮ ಸಂಕಷ್ಟಗಳನ್ನೆಲ್ಲ ಮರೆಯಬೇಕು ಎಂದು ಅವರು ಸಲಹೆ ನೀಡಿದರು.
ಹೇಮಾವತಿ ವಿ. ಹೆಗ್ಗಡೆ, ಸುಪ್ರಿಯಾ ಹಷೇಂದ್ರ ಕುಮಾರ್ ಉಪಸ್ಥಿತರಿದ್ದರು.

ಉಜಿರೆಯಲ್ಲಿರುವ ಧರ್ಮಸ್ಥಳದ ಆಸ್ಪತ್ರೆಯಲ್ಲಿ ಸೋಮವಾರ ಪಾದಯಾತ್ರೆಯಲ್ಲಿ ಬಂದ ಭಕ್ತರಿಗೆ ಕಾಲುನೋವು ಇತ್ಯಾದಿ ಸಣ್ಣ ಪುಟ್ಟ ಆರೋಗ್ಯ ಸಮಸ್ಯೆಗಳಿಗೆ 15, 750 ಮಂದಿಗೆ ಉಚಿತವಾಗಿ ಚಿಕಿತ್ಸೆ ನೀಡಲಾಗಿದೆ ಎಂದು ಹೆಗ್ಗಡೆಯವರು ಪ್ರಕಟಿಸಿದರು. ಚನ್ನರಾಯಪಟ್ಟಣದ ವೀರಾಂಜನೇಯ ಪಾದಯಾತ್ರಿ ಸಂಘದ ವತಿಯಿಂದ ಹೆಗ್ಗಡೆಯವರನ್ನು ಸನ್ಮಾನಿಸಲಾಯಿತು.

ಪಾದಯಾತ್ರೆಯನ್ನು ಹಲವಾರು ವರ್ಷಗಳ ಹಿಂದೆ ಪ್ರಾರಂಭಿಸಿ ಪ್ರತಿ ವರ್ಷ ಶಿವರಾತ್ರಿ ಸಂದರ್ಭ ಧರ್ಮಸ್ಥಳಕ್ಕೆ ಪಾದಯಾತ್ರೆಯಲ್ಲಿ ಬರುತ್ತಿರುವ ಬೆಂಗಳೂರಿನ ಹನುಮಂತಪ್ಪ, ಮರಿಯಪ್ಪ ಮತ್ತು ಹಾಸನದ ದೇವಪ್ಪ ಅವರನ್ನು ಸನ್ಮಾನಿಸಲಾಯಿತು.

ಸೋಮವಾರ ಭಕ್ತರು ಧರ್ಮಸ್ಥಳಕ್ಕೆ 800 ಮೂಟೆ ಅಕ್ಕಿ, ತರಕಾರಿ, ಧ್ಯಾನಗಳನ್ನು ಕಾಣಿಕೆಯಾಗಿ ಅರ್ಪಿಸಿದ್ದಾರೆ ಎಂದು ಹೆಗ್ಗಡೆಯವರು ಹೇಳಿದರು. ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆಯಲ್ಲಿ 25 ಲಕ್ಷ ಮಂದಿ ಸದಸ್ಯರಿದ್ದು 1400 ಕೋಟಿ ರೂ, ಉಳಿತಾಯ ಮಾಡಲಾಗಿದೆ. ಅಹೋ ರಾತ್ರಿ ಶಿವನಾಮ ಸ್ಮರಣೆ, ಭಜನೆ, ಪ್ರಾರ್ಥನೆ ಮತ್ತು ಧ್ಯಾನದೊಂದಿಗೆ ಭಕ್ತರು ಜಾಗರಣೆ ಮಾಡಿದರು

ಶಿವರಾತ್ರಿ ಸಂದರ್ಭ ನಾನಾ ಊರುಗಳಿಂದ ಶ್ರೀ ಕ್ಷೇತ್ರ ಧರ್ಮಸ್ಥಳಕ್ಕೆ ಕಾಲ್ನಡಿಗೆಯಲ್ಲೇ ಪಾದಯಾತ್ರೆಯಲ್ಲಿ ಬರುವ ಅಸಂಖ್ಯಾತ ಭಕ್ತರುಗಳಿಗೆ ಅಜುಕುರಿ (ನೇತ್ರಾವತಿ ಸಮೀಪ) ಎಂಬಲ್ಲಿ ಮುಸ್ಲಿಂ ಯುವಕ ಗುಂಪೊಂದು ಪಾನೀಯ ವ್ಯವಸ್ಥೆ ಮಾಡುವ ಮೂಲಕ ಮಾವೀಯ ಮೌಲ್ಯವನ್ನು ಎತ್ತಿ ಹಿಡಿದಿದ್ದಾರೆ. ಧರ್ಮಸ್ಥಳ ಕ್ಷೇತ್ರದ ಅಭಿಮಾನದಿಂದ ಹಾಗೂ ಶ್ರೀ ಕ್ಷೇತ್ರದಿಂದ ನಡೆಯುವಂತಹ ಧಾರ್ಮಿಕ, ಸಾಮಾಜಿಕ, ಶೈಕ್ಷಣಿಕ, ಆರೋಗ್ಯ, ಸ್ವ-ಉದ್ಯೋಗದಂತಹ ಕೆಲಸಗಳು ನಿರಂತರ ನಡೆಯುತ್ತಿರುವುದು ನಮಗೆ ಪ್ರೇರಣೆಯಾಗಿದ್ದು, ಈ ರೀತಿಯ ಅಳಿಲು ಸೇವೆ ಕಲ್ಪಿಸಲು ಅವಕಾಶ ದೊರೆತದಕ್ಕೆ ಪೂಜ್ಯ ಡಾ. ಡಿ. ವೀರೇಂದ್ರ ಹೆಗ್ಗಡೆಯವರಿಗೆ ಕೃತಜ್ಞತೆ ಸಲ್ಲಿಸುವುದಾಗಿ ನಝೀರ್ ತಿಳಿಸಿರುತ್ತಾರೆ. ಈ ತರಹದ ಮಾನವೀಯ ಪ್ರೇಮಿಗಳ ಕಾರ್ಯ ಶ್ಲಾಘನೀಯ.