ಶ್ರೀರಾಮನ ಪಾದುಕೆಗಳನ್ನು ಉಲ್ಲೇಖಿಸಿ ವಿಜಯ್‌ ಟೀಕಿಸಿದ ಡಿಎಂಕೆ ನಾಯಕ

ನವದೆಹಲಿ: ‘ಡಿಟಿ ನೆಕ್ಸ್ಟ್’ (DTNext) ವರದಿ ಮಾಡಿರುವಂತೆ, ಡಿಎಂಕೆ ನಾಯಕ ದಿಂಡಿಗುಲ್ ಐ. ಲಿಯೋನಿ ಅವರು, ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್ ನೇತೃತ್ವದ ಟಿವಿಕೆ ಸರ್ಕಾರವನ್ನು ಭಗವಾನ್ ಶ್ರೀರಾಮನ ಪಾದುಕೆಗಳಿಗೆ ಹೋಲಿಸುವ ಮೂಲಕ ರಾಜಕೀಯ ವಿವಾದವನ್ನು ಸೃಷ್ಟಿಸಿದ್ದಾರೆ. ಅಲ್ಲದೆ, ವಿಜಯ್‌ ನೇತೃತ್ವದ  ಸರ್ಕಾರವು ಕೇವಲ “14 ವಾರಗಳು ಅಥವಾ 14 ತಿಂಗಳು” ಮಾತ್ರ ಉಳಿಯಬಹುದು ಎಂದು ಭವಿಷ್ಯ ನುಡಿದಿದ್ದಾರೆ.

ಹಿಂದೆ ಇದೇ ಡಿಎಂಕೆಯ ಹಿರಿಯ ನಾಯಕ ಕರುಣಾನಿಧಿ ಅವರು, ‘ರಾಮ ಸೇತು’ವನ್ನು ವ್ಯಂಗ್ಯವಾಡುವಾಗ, “ಭಗವಾನ್ ಶ್ರೀರಾಮ ಯಾವ ಎಂಜಿನಿಯರಿಂಗ್ ಕಾಲೇಜಿನಲ್ಲಿ ಓದಿದ್ದನು?” ಎಂದು ಪ್ರಶ್ನಿಸಿದ್ದರು. ಈಗ ಅವರದ್ದೇ ಪಕ್ಷದ ನಾಯಕ ಮತ್ತೆ ವಿವಾದ ಸೃಷ್ಟಿಸಿದ್ದಾರೆ.

ಮಾಜಿ ಸಚಿವ ಕೆ.ಕೆ.ಎಸ್.ಎಸ್.ಆರ್. ರಾಮಚಂದ್ರನ್ ಅವರ ಕುಟುಂಬದ ಮದುವೆ ಸಮಾರಂಭವೊಂದರಲ್ಲಿ ಮಾತನಾಡಿದ ಲಿಯೋನಿ,  ಮಾಜಿ ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ ಅವರನ್ನು ಉದ್ದೇಶಿಸಿ  ರಾಮಾಯಣದ ಪ್ರಸಂಗವೊಂದನ್ನು ಉಲ್ಲೇಖಿಸಿದರು, ಹಿಂದಿನ ಡಿಎಂಕೆ ಸರ್ಕಾರ ಜಾರಿಗೆ ತಂದ ಕಲ್ಯಾಣ ಯೋಜನೆಗಳು, ಪಕ್ಷವು ಅಧಿಕಾರ ಕಳೆದುಕೊಂಡ ನಂತರವೂ ಜನರಿಗೆ ಪ್ರಯೋಜನ ನೀಡುತ್ತಲೇ ಇವೆ ಎಂದು ಪ್ರತಿಪಾದಿಸಿದರು.

“ಭಗವಾನ್ ಶ್ರೀರಾಮನ ಪಾದುಕೆಗಳು ಹೇಗೆ ಅಯೋಧ್ಯೆಯನ್ನು ಆಳಿದವೋ, ಹಾಗೆಯೇ ಸ್ಟಾಲಿನ್ ಬಿಟ್ಟುಹೋದ ಪಾದುಕೆಗಳು ಇಂದು ತಮಿಳುನಾಡನ್ನು ಆಳುತ್ತಿವೆ” ಎಂದು ಅವರು ಹೇಳಿದರು.

ಮಹಿಳೆಯರಿಗಾಗಿ ಜಾರಿಗೆ ತಂದ ‘ಕಲೈಜ್ಞರ್ ಮಗಳಿರ್ ಉರಿಮೈ ತೊಗೈ’ (KMUT) ಯೋಜನೆ, ಶಾಲಾ ಮಕ್ಕಳಿಗೆ ಉಪಹಾರ ನೀಡುವ ಯೋಜನೆ ಮತ್ತು ಮೆಟ್ರೋ ರೈಲು ಯೋಜನೆಗಳನ್ನು ಉಲ್ಲೇಖಿಸಿದ ಲಿಯೋನಿ, ಹಿಂದಿನ ಡಿಎಂಕೆ ಆಡಳಿತದ ಯೋಜನೆಗಳಿಂದ ಜನರು ಇನ್ನೂ ಪ್ರಯೋಜನ ಪಡೆಯುತ್ತಿದ್ದಾರೆ ಎಂದು ವಾದಿಸಿದರು.

“ಈ ಯೋಜನೆಗಳ ಮೂಲಕ ಪ್ರಯೋಜನ ಪಡೆಯುವಾಗ ಜನರು ನಿಮ್ಮನ್ನು ನೆನಪಿಸಿಕೊಳ್ಳುತ್ತಲೇ ಇರುತ್ತಾರೆ. ಆ ಅರ್ಥದಲ್ಲಿ ಹೇಳುವುದಾದರೆ, ನಿಮ್ಮ ಪಾದುಕೆಗಳು ತಮಿಳುನಾಡನ್ನು ಆಳುತ್ತಿವೆ” ಎಂದು ಅವರು ಹೇಳಿದರು.