ಅಂಬೇಡ್ಕರ್ ಜನ್ಮ ದಿನಾಚರಣೆ ಅಸ್ಪೃಶ್ಯತೆ ನಿವಾರಣೆಗೆ ಪ್ರೇರಕ

ಉಪ್ಪಿನಂಗಡಿ : ಅಂಬೇಡ್ಕರ್ ಈ ದೇಶ ಕಂಡ ಮಹಾನ್ ಜನ ನಾಯಕರಾಗಿದ್ದು, ಶ್ರೇಷ್ಠ ಜೀವನ ಪದ್ದತಿಯನ್ನು ಹೊಂದಿರುವ ಹಿಂದುತ್ವದಲ್ಲಿ ಅನುಷ್ಠಾನದಲ್ಲಿದ್ದ ಅಸ್ಪೃಶ್ಯತೆ ಎಂಬ ಅನಿಷ್ಠದ ವಿರುದ್ದ ಹೋರಾಡಿ ಉಪೇಕ್ಷಿತ ಜನ ಸಮುದಾಯದ ರಕ್ಷಣೆಗಾಗಿ ಅವಿರತ ಶ್ರಮಿಸಿದ ಅವರ ಜನ್ಮ ದಿನಾಚರಣೆ ಅಸ್ಪೃಶ್ಯತೆಯ ನಿವಾರಣೆಗೆ ಪ್ರೇರಕವಾಗುವಂತಿರಲಿ ಎಂದು ಉಪನ್ಯಾಸಕ ತಿಲಕಾಕ್ಷ ತಿಳಿಸಿದರು.

ಅವರು ಉಪ್ಪಿನಂಗಡಿಯ ವೇದಶಂಕರ ನಗರದ ಶ್ರೀ ಮಾಧವ ಶಿಶು ಮಂದಿರದಲ್ಲಿ ನಡೆದ ಅಂಬೇಡ್ಕರ್ ಜಯಂತಿಯ ಅಂಗವಾಗಿ ನಡೆದ ಸಾಮರಸ್ಯ ದಿನಾಚರಣೆಯಲ್ಲಿ ಮುಖ್ಯ ಭಾಷಣಕಾರರಾಗಿ ಮಾತನಾಡಿದರು.

ಅಸ್ಪೃಶ್ಯತೆಯ ಹೆಸರಿನಲ್ಲಿ ಸಮುದಾಯವೊಂದರ ಮೇಲೆ ನಡೆಯುತ್ತಿದ್ದ ಮೃಗೀಯ ದಬ್ಬಾಳೀಕೆಯ ವಿರುದ್ದ ಸೆಟೆದು ನಿಂತ ಅಂಬೇಡ್ಕರ್ , ದೇವರ ಒಲುಮೆ ಪಡೆದು ಬಂದ ಮೇಲೆ ದೇವರ ಪೂಜೆಗಿಲ್ಲದ ಅವಕಾಶವನ್ನು ಪ್ರಶ್ನಿಸಿದರಲ್ಲದೆ, ಈ ಭುವಿಯ ಪ್ರತಿಯೊಂದು ವಸ್ತುವೂ ದೇವರದ್ದೇ ಆಗಿರುವಾಗ ಬಳಕೆಗೆ ಯಾಕೆ ಅಡ್ಡಿ ಆತಂಕ ಎಂದು ಪ್ರಬಲ ವಾದಮಂಡಸಿ ಸಮಾನತೆಯ ಹಕ್ಕನ್ನು ಶೋಷಿತ ಸಮುದಾಯಕ್ಕೆ ಒದಗಿಸಿ ಕೊಟ್ಟ ಮಹಾನ್ ಮಾನವತಾವಾದಿ ಎಂದು ವಿವರಿಸಿದ ಅವರು, ಇಂದಿಗೂ ಅನುಷ್ಠಾನದಲ್ಲಿರುವ ಅಸ್ಪೃಶ್ಯತೆಯನ್ನು ನಿವಾರಿಸಲು ಪ್ರತಿಯೊಬ್ಬರೂ ಪಣ ತೊಟ್ಟಾಗಲೇ ಅವರ ಜನ್ಮ ದಿನಾಚರಣೆಗೆ ಅರ್ಥ ಲಭಿಸುವುದು ಎಂದರು.

ಸಭಾಧ್ಯಕ್ಷತೆಯನ್ನು ಆರ್ ಎಸ್ ಎಸ್ ಮುಂದಾಳು ಹರಿರಾಮಚಂದ್ರ ವಹಿಸಿದ್ದು, ಅಂಬೇಡ್ಕರ್ ವಿಚಾರಧಾರೆಯನ್ನು ಇಡೀ ಹಿಂದೂ ಸಮಾಜ ಗೌರವಿಸುತ್ತಿದ್ದು, ಅವರ ಆಶಯಗಳ ಅನುಷ್ಠಾನಕ್ಕೆ ನಾವೆಲ್ಲರೂ ಪಣ ತೊಡಬೇಕಾಗಿದೆ ಎಂದರು.

ಸಭೆಯಲ್ಲಿ ಶಿಶು ಮಂದಿರದ ಗೌರವಾಧ್ಯಕ್ಷ ಯು ರಾಮ, ಅಧ್ಯಕ್ಷ ಮನೋಜ್ ಶೆಟ್ಟಿ, ಮಾತೃ ಮಂಡಳಿಯ ಪ್ರಧಾನ ಸಂಚಾಲಕಿ ಪ್ರೇಮಲತಾ ಕಾಂಚನ್, ಅಧ್ಯಕ್ಷೆ ಸುಮನ್ ಲದ್ವಾ, ಪ್ರಧಾನ ಕಾರ್ಯದರ್ಶಿ ಪುಷ್ಪಲತಾ ಜನಾರ್ಧನ್, ಶಿಶು ಮಂದಿರದ ಮಾತಾಜಿ ಪುಷ್ಪಲತಾ, ಸಹಾಯಕ ಮಾತಾಜಿ ಚಂದ್ರಾವತಿ ಸಹಿತ ಹಲವಾರು ಗಣ್ಯರು ಉಪಸ್ಥಿತರಿದ್ದರು.