ರಂಗಮನೆಯಲ್ಲಿ ರಾಜ್ಯ ಮಟ್ಟದ ಚಿಣ್ಣರ ಮೇಳ- ಉದ್ಘಾಟನೆ

ಸುಳ್ಯ: ಗುರಿ ಮತ್ತು ಗುರುಗಳಲ್ಲಿದ ಜೀವನ ಯಾನ ಮನುಷ್ಯನ ದಾರಿ ತಪ್ಪುತ್ತದೆ. ಗುರಿ ಮತ್ತು ಗುರುವಿನ ಬಲದೊಂದಿಗೆ ನಡೆಯುವ ಚಿಣ್ಣರ ಮೇಳವು ಮಕ್ಕಳ ಮಾನಸಿಕ ಮತ್ತು ದೈಹಿಕ ಬೆಳವಣಿಗೆಗೆ ಸಹಾಯಕವಾಗಿ ಸರ್ವಾಂಗೀಣ ಅಭಿವೃದ್ಧಿಗೆ ಪೂರಕವಾಗಲಿದೆ ಎಂದು ಮಂಗಳೂರು ಅಕಾಶವಾಣಿ ಕಾರ್ಯಕ್ರಮ ನಿರ್ವಾಹಕ ಸದಾನಂದ ಪೆರ್ಲ ಹೇಳಿದರು.

ಅವರು ಸುಳ್ಯದ ರಂಗ ಮನೆಯಲ್ಲಿ ನಡೆಯುತ್ತಿರುವ ರಾಜ್ಯಮಟ್ಟದ ಚಿಣ್ಣರ ಮೇಳವನ್ನು ಡೋಲು ಬಾರಿಸುವುದರ ಮೂಲಕ ಉದ್ಘಾಟಿಸಿ ಮಾತನಾಡಿದರು. ನಗರ ಪ್ರದೇಶದಲ್ಲಿ ಹಣದ ವ್ಯಾಮೋಹಕ್ಕಾಗಿಯೇ ಹಲವು ಶಿಬಿರಗಳು ನಡೆಯುತ್ತಿದ್ದರೆ ರಂಗಮನೆಯಂತಹ ಸಂಸ್ಥೆ ಸಾಂಸ್ಕೃತಿಕವಾಗಿ ಮಕ್ಕಳನ್ನು ಬೆಳೆಸುವ ಕೆಲಸ ಮಾಡುತ್ತಿರುವುದು ಶ್ಲಾಘನೀಯ ಎಂದು ಅವರು ಹೇಳಿದರು.

ಸುಳ್ಯ ತಹಶೀಲ್ದಾರ್ ಶ್ರೀನಿವಾಸ ಶೆಟ್ಟಿ ಅಧ್ಯಕ್ಷತೆ ವಹಿಸಿದರು. ಅತಿಥಿಗಳಾಗಿ ಸುಳ್ಯ ಸ್ನೇಹ ಶಾಲಾ ಮುಖ್ಯೋಪಾಧ್ಯಾಯಿನಿ ಜಯಲಕ್ಷ್ಮಿ ದಾಮ್ಲೆ, ಸುಳ್ಯ ಜೇಸಿಐ ಅಧ್ಯಕ್ಷ ಭೀಮರಾವ್ ವಾಷ್ಠರ್, ಸುಳ್ಯ ರೋಟರಿ ಶಾಲಾ ಮುಖ್ಯೋಪಾಧ್ಯಾಯ ಅಚ್ಚುತ ಅಟ್ಲೂರು, ಸುಳ್ಯ ಅಮ್ಮ ಸೇವಾ ಟ್ರಸ್ಟ್‌ನ ಅಧ್ಯಕ್ಷ ಶೈಲೇಶ್ ಅಂಬೆಕಲ್ಲು ಭಾಗವಹಿಸಿದರು. ರಂಗಮನೆಯ ರೂವಾರಿ ಮತ್ತು ಮೇಳದ ನಿರ್ದೇಶಕ ಜೀವನ್‌ರಾಂ ಸುಳ್ಯ ಸ್ವಾಗತಿಸಿ, ಮೌಲ್ಯ ಜೀವನ್ ವಂದಿಸಿದರು. ಡಾ. ವೀಣಾ ಪಾಲಚಂದ್ರ ಕಾರ್ಯಕ್ರಮ ನಿರೂಪಿಸಿದರು.

ಶಿಬರದಲ್ಲಿ ಏನಿದೆ : ಮಕ್ಕಳ ಮಾನಸಿಕ ಮತ್ತು ಬೌಧ್ದಿಕ ಬೆಳವಣಿಗೆಗೆ ಪೂರಕವಾದ ಚಟುವಟಿಕೆಗಳೊಂದಿಗೆ ಎ.೧೯ ರವರೆಗೆ ಚಿಣ್ಣರ ಮೇಳ ನಡೆಯಲಿದೆ. ಪುರಾತನ ಸಾಂಝಿ ಆರ್ಟ್, ಗಾಳಿಪಟ ತಯಾರಿ, ಕಲಾತ್ಮಕ ಚಿತ್ರರೇಖೆಗಳು, ಅಭಿನಯ, ನಾಟಕ, ಕತೆ, ಕ್ರಿಯೇಟಿವ್ ಕ್ರಾಫ್ಟ್, ಥರ್ಮೋಕೂಲ್ ಉಬ್ಬು ಶಿಲ್ಪ, ಕೊಬ್ಬರಿ ಕಲೆ, ರಂಗಗೀತೆ, ಪ್ರಸಾಧನ ಕಲೆ, ಥೀಯೇಟರ್ ಗೇಮ್ಸ್, ಏಕಪಾತ್ರಾಭಿನಯ, ಮುಖವಾಡ ತಯಾರಿ, ಜಾನಪದ ಗೀತೆ, ಚಾರಣ, ಆರೋಗ್ಯ, ಪರಿಸರ, ಶಿಕ್ಷಣದ ಬಗ್ಗೆ ಮೌಲ್ಯಯುತ ವಿಚಾರಗಳು, ಮೂಕಾಭಿನಯ ಇತ್ಯಾದಿ ಒಳಗೊಂಡಿದೆ. ರಾಜ್ಯದ ಪ್ರತಿಭಾನ್ವಿತ ಸಂಪನ್ಮೂಲ ವ್ಯಕ್ತಿಗಳಾದ ದಿನೇಶ್ ಹೊಳ್ಳ ಮಂಗಳೂರು, ಜರ್ನಾಧನ ಹಾವಂಜೆ, ಹರೀಶ್ ಅರಸೀಕೆರೆ, ಮೈಸೂರು ಹುಸೇನಿ, ಗಿರಿಧರ ಕಾಮತ್ ಮಂಗಳೂರು, ತಾರಾನಾಥ ಕೈರಂಗಳ, ಮಹಮ್ಮದ್ ಗೌಸ್ ಬೆಂಗಳೂರು, ಭಗೀರಥ ಕುಮುಟ, ಎಂ.ಎಸ್.ಜಯಪ್ರಕಾಶ್, ಗೀತಾಕುಮಾರಿ ಸುಳ್ಯ, ಮೌಲ್ಯ ಜೀವನ್ ಸುಳ್ಯ, ನಾದಾ ಮಣಿನಾಲ್ಕೂರು, ಮಲ್ಲಿಕಾ ಜ್ಯೋತಿಗುಡ್ಡೆ, ಭಾಸ್ಕರ ನೆಲ್ಯಾಡಿ, ಶಿವಕುಮಾರ್ ಉಜಿರೆ, ಕೃಷ್ಣಪ್ಪ ಬಂಬಿಲ ಮತ್ತಿತರರು ಭಾಗವಹಿಸಲಿದ್ದಾರೆ ಎಂದು ಜೀವನ್ ರಾಮ್ ತಿಳಿಸಿದ್ದಾರೆ. ಶಿಬಿರದಲ್ಲಿ ರಾಜ್ಯದ ವಿವಿಧ ಭಾಗಗಳಿಂದ 225 ಕ್ಕೂ ಹೆಚ್ಚು ಶಿಬಿರಾರ್ಥಿಗಳು ಭಾಗವಹಿಸುತ್ತಿದ್ದಾರೆ.