ಜಗತ್ತಿಗೆ ಜನಜೀವನವನ್ನು ಕಲಿಸಿದ ರಾಷ್ಟ್ರ ಭಾರತ : ಜನಾರ್ಧನ ಪ್ರತಾಪನಗರ

ಬಾಯಾರು : ಕೃಷ್ಣನ ಜೀವನವು ನಮ್ಮೆಲ್ಲರಿಗೆ ಪ್ರೇರಣೆಯಾಗಿದೆ. ಆದ್ದರಿಂದ ಇಂದು ಕೃಷ್ಣ ವೇಷ ಧರಿಸಿದ ಎಲ್ಲಾ ಮಕ್ಕಳೂ  ಪ್ರತಿದಿನವೂ  ತಮ್ಮ ನಿಜ ಜೀವನದಲ್ಲಿ ಕೃಷ್ಣನೇ ಆಗಬೇಕಾದ ಅಗತ್ಯವಿದೆ. ಅಧರ್ಮದ ವಿರುದ್ಧ ಹೋರಾಡುವುದು , ಅದನ್ನು ನಾಶಪಡಿಸುವುದೇ ಧರ್ಮ. ಅದಕ್ಕೆ ಕೃಷ್ಣನ ಜೀವನ ಪ್ರೇರಣೆಯಾಗಲಿ ಎಂದು ಆರ್ ಎಸ್ ಎಸ್ ನ ಮಂಗಳೂರು ವಿಭಾಗದ ಸಹಕಾರ್ಯವಾಹರಾದ ಜನಾರ್ಧನ ಪ್ರತಾಪನಗರ ಅಭಿಪ್ರಾಯ ಪಟ್ಟರು.

ಬಾಯಾರು ಶ್ರೀ ಪಂಚಲಿಂಗೇಶ್ವರ ದೇವಸ್ಥಾನದಲ್ಲಿ ಬಾಲಗೋಕುಲ ಶೋಭಾಯಾತ್ರೆ  ಸಮಿತಿ, ಬಾಯಾರು  ಇದರ ವತಿಯಿಂದ ನಡೆದ ಶ್ರೀಕೃಷ್ಣ ವೇಷಧಾರಿಗಳ ಶೋಭಾಯಾತ್ರೆಯ ಸಭಾ ಕಾರ್ಯಕ್ರಮವನ್ನು ಉದ್ದೇಶಿಸಿ ಬೌದ್ಧಿಕ್ ನೀಡಿದ ಅವರು ‘ಸಮಾಜಕ್ಕೆ ನಾವು ಉಪಕಾರ ಮಾಡಿದರೆ ಸಮಾಜ ನಮ್ಮನ್ನು ಗೌರವಿಸಿ ಗುರುತಿಸುತ್ತದೆ. ಶ್ರೇಷ್ಠ ಕೆಲಸದ ಹಿಂದೆ ಸ್ವಾರ್ಥವಿರದಿದ್ದರೆ ಮಾತ್ರ ಮಾಡಿದ ಕೆಲಸವು ಸಾರ್ಥಕ್ಯವೆನಿಸುತ್ತದೆ. ಜಗತ್ತಿಗೆ ಜನಜೀವನವನ್ನು ಕಲಿಸಿದ ರಾಷ್ಟ್ರ ಭಾರತ. ಗ್ರಾಮಗ್ರಾಮಗಳಲ್ಲಿ ಕೃಷ್ಣ-ಬಲರಾಮಗಳು ಹುಟ್ಟಿ ಸಮಾಜದಲ್ಲಿ ನಡೆಯುತ್ತಿರುವ ಅತ್ಯಾಚಾರ – ಅನಾಚಾರಗಳ ವಿರುದ್ಧ ಹೋರಾಟ ಮಾಡುವಂತಾಗಬೇಕು’ ಎಂದು ಅಭಿಪ್ರಾಯಪಟ್ಟರು.

ಸಭಾ ಕಾರ್ಯಕ್ರಮದ ಮೊದಲು ಶ್ರೀಕೃಷ್ಣವೇಷವನ್ನು ಧರಿಸಿದ ಅನೇಕ ಮಕ್ಕಳು ಹೆದ್ದಾರಿ ಶಾಲೆಯಿಂದ ಬಾಯಾರು ದೇವಸ್ಥಾನದವರೆಗೆ ನಡೆದ ಶೋಭಾಯಾತ್ರೆಯಾಲ್ಲಿ ಪಾಲ್ಗೊಂಡರು. ಶೋಭಾಯಾತ್ರೆಯ ನಂತರ ನಡೆದ ಸಭಾಕಾರ್ಯಕ್ರಮದಲ್ಲಿ  ಮೊದಲು ಬಾಲಗೋಕುಲದ ವಿದ್ಯಾರ್ಥಿಗಳು ಪ್ರಾರ್ಥನೆಯನ್ನು ನೆರವೇರಿಸಿದರು. ಹೆದ್ದಾರಿ ಶಾಲಾ ಮುಖ್ಯೋಪಾಧ್ಯಾಯರಾದಂತಹ ಶ್ರೀ ಆದಿನಾರಾಯಣ ಭಟ್ ರವರು ಸಭೆಯ  ಅಧ್ಯಕ್ಷತೆಯನ್ನು ವಹಿಸಿ ಮಾತನಾಡಿದರು. ಶ್ರೀ ಪುಷ್ಪರಾಜ್ ಶೆಟ್ಟಿ ಸ್ವಾಗತಿಸಿ , ಶ್ರೀ ಉಮೇಶ್ ತಾಳ್ತಜೆ ವಂದಿಸಿದರು.