CA ಪರೀಕ್ಷೆ ಬರೆಯಲು ಬಡ ವಿದ್ಯಾರ್ಥಿಗಳಿಗೆ ಉಚಿತ ಕೋಚಿಂಗ್ ನೀಡುತ್ತಿದ್ದಾರೆ ಸೂರತ್ ಶಿಕ್ಷಕ

ಸೂರತ್: ಚಾರ್ಟರ್ಡ್ ಅಕೌಂಟೆಂಟ್ ಆಗುವ ಕನಸುಗಳನ್ನು ಹೊತ್ತಿರುವ ಸೂರತ್‌ನಲ್ಲಿರುವ ಹಲವಾರು ಬಡ ವಿದ್ಯಾರ್ಥಿಗಳಿಗೆ ತಮ್ಮ ಕನಸುಗಳನ್ನು ನನಸಾಗಿಸಿಕೊಳ್ಳುವ ಮಹತ್ತರವಾದ ಅವಕಾಶಗಳು ಲಭ್ಯವಾಗುತ್ತಿವೆ. ಈ ನಗರದ ರವಿ ಚಾವ್ಚರಿಯಾ ಅವರು ಇದಕ್ಕೆ ಕಾರಣೀಭೂತರಾಗಿದ್ದಾರೆ. ಅವರು ಪ್ರಾರಂಭಿಸಿದ ಕಾರ್ಯಕ್ರಮದಿಂದಾಗಿ ಹಿಂದುಳಿದ ಕುಟುಂಬಗಳ ವಿದ್ಯಾರ್ಥಿಗಳಿಗೆ ತಮ್ಮ ಮಹತ್ವಾಕಾಂಕ್ಷೆಗಳನ್ನು ತಲುಪುವ ದಾರಿ ಸಿಕ್ಕಿದೆ.

ಸ್ವತಃ ಸಿಎ ಆಗಿರುವ ಚಾವ್ಚರಿಯಾ ಅವರು, ಸಿಎ ಆಗುವ ಕನಸುಗಳನ್ನು ಹೊತ್ತುಕೊಂಡಿರುವ ಬಡ ಮಕ್ಕಳಿಗಾಗಿ ಸಮಗ್ರ ಶಿಕ್ಷಣ ಕಾರ್ಯಕ್ರಮ ‘ಸಿಎ ಸ್ಟಾರ್ಸ್ ಪ್ರೋಗ್ರಾಂ’ ಅನ್ನು ನಡೆಸುತ್ತಿದ್ದಾರೆ.

ಅವರು ಪ್ರತಿವರ್ಷ ಸುಮಾರು 40-45 ವಿದ್ಯಾರ್ಥಿಗಳನ್ನು ಆಯ್ಕೆ ಮಾಡುತ್ತಾರೆ ಮತ್ತು ಪರೀಕ್ಷೆಯನ್ನು ತೇರ್ಗಡೆಯಾಗಲು ಅವರಿಗೆ ತರಬೇತಿ ನೀಡುತ್ತಾರೆ. ಸರ್ವಾಂಗೀಣ ಬೋಧನಾ ವಿಧಾನವನ್ನು ಬಳಸುವುದರ ಜೊತೆಗೆ, ಚಾವ್ಚರಿಯಾ ಅವರು ನಾಲ್ಕು ವರ್ಷಗಳ ಅವಧಿಗೆ ವಿದ್ಯಾರ್ಥಿಗಳಿಗೆ ಉಚಿತ ವಸತಿ ಮತ್ತು ಆಹಾರವನ್ನೂ ಒದಗಿಸುತ್ತಾರೆ.

ಅವರ ಸಿಎ ಸ್ಟಾರ್ಸ್‌ ಪ್ರೋಗ್ರಾಂನ ಹೆಚ್ಚಿನ ವಿದ್ಯಾರ್ಥಿಗಳು ತಮ್ಮ ಕುಟುಂಬದ ಮೊದಲ ತಲೆಮಾರಿನ ವಿದ್ಯಾವಂತರು, ಅವರ ಪೋಷಕರು  ಕೂಲಿ ಕಾರ್ಮಿಕರು, ಬೀದಿ ವ್ಯಾಪಾರಿಗಳು, ಸಣ್ಣ ರೈತರು ಅಥವಾ ರಿಕ್ಷಾ ಚಾಲಕರಾಗಿದ್ದಾರೆ. ಇನ್ನು ಕೆಲವು ವಿದ್ಯಾರ್ಥಿಗಳು ಅನಾಥರಾಗಿದ್ದಾರೆ.

ಇದೇ ರೀತಿಯ ಉಚಿತ ಕೋಚಿಂಗ್ ಅನ್ನು ಪಡೆದುಕೊಂಡ ಒರಿಸ್ಸಾದ 14 ಬಡ ಮಕ್ಕಳು ನೀಟ್ ಪರೀಕ್ಷೆಯನ್ನು ಈ ವರ್ಷ ತೇರ್ಗಡೆಯಾಗಿದ್ದನ್ನು ನಾವು ಕೇಳಿದ್ದೇವೆ. ಅಜಯ್ ಬಹದ್ದೂರ್ ಸಿಂಗ್ ಎಂಬುವವರು ತಮ್ಮ ‘ಜಿಂದಗಿ’ ಎಂಬ ಫೌಂಡೇಶನ್ ಮೂಲಕ ಈ ವಿದ್ಯಾರ್ಥಿಗಳಿಗೆ ನೀಟ್ ಪರೀಕ್ಷೆ ಬರೆಯಲು ಕೋಚಿಂಗ್ ನೀಡಿದ್ದರು. ಅತೀ ಪ್ರತಿಭಾವಂತ ಬಡ ವಿದ್ಯಾರ್ಥಿಗಳಿಗೆ ಈ ಫೌಂಡೇಶನ್ ಮೂಲಕ ಅವರು ಕೋಚಿಂಗ್ ನೀಡುತ್ತಿದ್ದಾರೆ. ಅವರಿಂದ ಕೋಚಿಂಗ್ ಪಡೆದ 14 ಮಂದಿ ನೀಟ್ ತೇರ್ಗಡೆಯಾಗಿದ್ದಾರೆ.

ತಾನೊಬ್ಬ ವೈದ್ಯ ಆಗಬೇಕು ಅಂದುಕೊಂಡಿದ್ದ ಸಿಂಗ್ ಅವರಿಗೆ ಹಣಕಾಸು ಸಮಸ್ಯೆಯಿಂದ ಅದು ಸಾಧ್ಯವಾಗಿರಲಿಲ್ಲ, ಹೀಗಾಗಿ ಇಂದು ಅವರು ಬಡ ವಿದ್ಯಾರ್ಥಿಗಳಿಗೆ ಸಹಾಯ ಮಾಡುತ್ತಿದ್ದಾರೆ.