ಮಂಗಳೂರು: ಮಂಗಳೂರಿನ ’ಕನ್ನಡಕ ಪ್ರೊಡಕ್ಷನ್ಸ್’ನವರು ನಗರದ ಪೊಲೀಸ್ ಇಲಾಖೆ, ಲಯನ್ಸ್ ಕ್ಲಬ್ ಮಂಗಳೂರು ಮತ್ತು ರೋಟರಿ ಕ್ಲಬ್ ಮಂಗಳೂರು ಸೆಂಟ್ರಲ್ ಇವರ ಸಹಯೋಗದಿಂದ ರಸ್ತೆ ಸುರಕ್ಷಾ ಮಾಸಾಚರಣೆಯ ಸಲುವಾಗಿ ನಿರ್ಮಿಸಿದ ‘ಹೆಲ್ಮೆಟ್ ಧರಿಸಿ ದ್ವಿಚಕ್ರ ಚಲಾಯಿಸಿ’, ‘ರ್‍ಯಾಷ್ ಡ್ರೈವಿಂಗ್’ ಮತ್ತು ‘ಡ್ರಿಂಕ್ ಎಂಡ್ ಡ್ರೈವ್’ ಸಾಕ್ಷ್ಯಾ ಚಿತ್ರಗಳನ್ನು ಇಂದು (ಡಿ. 30) ಮಂಗಳೂರಿನ ಮಹಾಪೌರರಾದ ಕವಿತಾ ಸನಿಲ್ ಲೋಕಾರ್ಪಣೆಗೈದರು. ಕನ್ನಡಕ ಪ್ರೊಡಕ್ಷನ್ ಇದರ ನಿರ್ಮಾಪಕಿ ಲಕ್ಷ್ಮೀ ಮೋಹನದಾಸ ಕಾಮತ್, ಲಯನ್ಸ್ ಕ್ಲಬ್ ಮಂಗಳೂರು ಇದರ ಅಧ್ಯಕ್ಷ ವೆಂಕಟೇಶ ಬಾಳಿಗಾ, ಖಜಾಂಚಿ ಜಯರಾಜ್ ಪ್ರಕಾಶ, ರೋಟರಿ ಮಂಗಳೂರು ಸೆಂಟ್ರಲ್ ಇದರ ಅಧ್ಯಕ್ಷ ರೇಮಂಡ್ ಡಿಕ್ಹುನಾ, ವಿಠೋಭಾ ಭಂಡಾರಕಾರ್, ವಿಶಾಲ ಭಂಡಾರಕಾರ್, ದಯಾ ಕುಕ್ಕಾಜೆ, ಶ್ರೀನಿವಾಸ ನಾಯಕ ಇಂದಾಜೆ, ಸತೀಷ ಇರಾ ಉಪಸ್ಥಿತರಿದ್ದರು.
ಬಳಿಕ ಪ್ರೆಸ್ ಕ್ಲಬ್‌ನಲ್ಲಿ ಜರಗಿದ ಪತ್ರಿಕಾ ಗೋಷ್ಠಿಯಲ್ಲಿ ಈ ಯೋಜನೆಯ ಸಂಚಾಲಕ ಪತ್ರಕರ್ತ ಶ್ರೀನಿವಾಸ ನಾಯಕ ಇಂದಾಜೆ ಮಾಹಿತಿ ನೀಡಿದರು. ಸಾಮಾಜಿಕ ಕಾಳಜಿಯುಳ್ಳ ಅನಿವಾಸಿ ಭಾರತೀಯ ಮಂಜೇಶ್ವರ ಮೋಹನದಾಸ ಕಾಮತ್ ಇವರ ಕನಸಿನ ಕೂಸಾದ ಈ ಮೂರು ಸಾಕ್ಷ್ಯಾ ಚಿತ್ರಗಳು ಚೆನ್ನಾಗಿ ಮೂಡಿ ಬಂದಿವೆ. ನಗರದ ಪೋಲಿಸ ಕಮಿಷನರ್ ಶ್ರೀ ಟಿ. ಸುಧೀರ ಕುಮಾರ ಇವರು ಸಂಪೂರ್ಣ ಸಹಯೋಗವನ್ನು ನೀಡಿದ್ದು ಮುಂದಿನ ದಿನಗಳಲ್ಲಿ ಈ ಸಾಕ್ಷ್ಯಾಚಿತ್ರಗಳ ಪ್ರದರ್ಶನ ಎಲ್ಲಾ ಚಿತ್ರ ಮಂದಿರಗಳಲ್ಲಿ ಆಗಲಿದೆ. ಚಲನಚಿತ್ರ ನಟ ಉಪೇಂದ್ರ, ಖ್ಯಾತ ಪತ್ರಕರ್ತ ಮನೋಹರ ಪ್ರಸಾದ ಹಾಗೂ ಪೋಲಿಸ್ ಕಮಿಷನರ್ ಈ ಸಾಕ್ಷ್ಯಾ ಚಿತ್ರಗಳಲ್ಲಿ ಸಂದೇಶಗಳನ್ನು ನೀಡಿದ್ದಾರೆ ಎಂದು ಅವರು ತಿಳಿಸಿದರು.
ಮಂಗಳೂರಿನ ರಸ್ತೆಗಳಲ್ಲಿ ಪ್ರತಿ ತಿಂಗಳು 5000 ಹೊಸ ವಾಹನಗಳು ಸೇರ್ಪಡೆಯಾಗುತ್ತಿವೆ. ರಸ್ತೆಗಳು ಅಷ್ಟೇನು ಅಗಲವಾಗಿಲ್ಲ. ವಾಹನಗಳು ಅಲ್ಲಲ್ಲಿ ಬ್ಲಾಕ್ನಲ್ಲಿ ಸಿಲುಕುವುದನ್ನು ನಾವು ಕಾಣುತ್ತೇವೆ. ಹಿಂದಿನ ದಿನಗಳಲ್ಲಿ ಐದು ನಿಮಿಷ ತಗಲುತ್ತಿದ್ದ ಪ್ರಯಾಣಕ್ಕೆ ಇಂದು ಒಂದು ಗಂಟೆ ತಗಲುತ್ತದೆ. ವಾಹನ ಚಾಲಕರಲ್ಲಿ ರಸ್ತೆ ನಿಯಮಗಳನ್ನು ಪಾಲಿಸಲು ಸಮಯ ಇಲ್ಲವಾಗಿದೆ. ಇಂತಹ ಸಾಕ್ಷ್ಯಾ ಚಿತ್ರಗಳಿಂದ ಸಾರ್ವಜನಿಕರಲ್ಲಿ ರಸ್ತೆ ನಿಯಮಗಳ ಬಗ್ಗೆ ಪ್ರಜ್ಞೆ ಮೂಡಿಸಲು ಸಾಧ್ಯವಿದೆ ಎಂದು ಲಯನ್ಸ್ ಕ್ಲಬ್ ಮಂಗಳೂರು ಇದರ ಅಧ್ಯಕ್ಷ ವೆಂಕಟೇಶ ಬಾಳಿಗಾ ಹೇಳಿದರು.
ನನ್ನ ಪತಿ ಪ್ರತಿ ಬಾರಿ ಮಂಗಳೂರಿಗೆ ಬಂದಾಗ ಒಂದಲ್ಲಾ ಒಂದು ರಸ್ತೆ ಅಪಘಾತಕ್ಕೆ ಸಾಕ್ಷಿಯಾಗಿದ್ದಾರೆ. ಪ್ರತಿಯೊಂದು ಅಪಘಾತದಲ್ಲಿ ರಸ್ತೆ ನಿಯಮಗಳನ್ನು ಪಾಲಿಸದೆ ಇರುವುದನ್ನು ಪರಿಗಣಿಸಿದ ಅವರು ಈ ಸಾಕ್ಷ್ಯಾಚಿತ್ರಗಳನ್ನು ನಿರ್ಮಿಸುವ ಯೋಜನೆಗೆ ಕೈಹಾಕಿದ್ದಾರೆ. ತಮ್ಮೆಲ್ಲರ ಸಹಕಾರ ಬೇಕು. ಲಯನ್ಸ್ ಹಾಗೂ ರೋಟರಿ ಸಂಸ್ಥೆಯವರಿಗೆ ಧನ್ಯವಾದಗಳು ಎಂದು ನಿರ್ಮಾಪಕಿ ಲಕ್ಷ್ಮೀ ಮೋಹನದಾಸ ಕಾಮತ್ ಹೇಳಿದರು.
ರಸ್ತೆ ಅಪಘಾತಗಳನ್ನು ತಡೆಯುವಲ್ಲಿ ಸಾಮಾಜಿಕ ಜಾಗೃತಿ ಮುಖ್ಯವಾಗಿದೆ. ಈ ನಿಟ್ಟಿನಲ್ಲಿ ಈ ಸಾಕ್ಷ್ಯಾ ಚಿತ್ರಗಳು ಸಹಕಾರಿಯಾಗಿವೆ. 30 ವರ್ಷಗಳ ಇತಿಹಾಸವುಳ್ಳ ರೋಟರಿ ಸೆಂಟ್ರಲ್ ಇಂತಹ ಯೋಜನೆಗಳಿಗೆ ಸಹಕಾರ ನೀಡುತ್ತದೆ ಎಂದು ರೋಟರಿ ಸೆಂಟ್ರಲ್ ಇದರ ಅಧ್ಯಕ್ಷ ರೇಮಂಡ್ ಡಿಕುನ್ಹಾ ತಿಳಿಸಿದರು.
ಈ ಸಾಕ್ಷ್ಯಾ ಚಿತ್ರಗಳು ಖ್ಯಾತ ಛಾಯಾಚಿತ್ರಗಾರರಾದ ಸತೀಷ್ ಇರಾ ಮತ್ತು ದಯಾ ಕುಕ್ಕಾಜೆ ಮತ್ತು ಪತ್ರಕರ್ತ ಶ್ರೀನಿವಾಸ ನಾಯಕ ಇಂದಾಜೆ ನಿರ್ದೇಶನದಲ್ಲಿ ಮೂಡಿ ಬಂದಿವೆ.
News13
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
