ಮಂಗಳೂರು : ನಗರದ ಕೊಡಿಯಾಲಬೈಲಿನ ಶಾರದಾ ವಿದ್ಯಾಲಯದ ರಜತ ಮಹೋತ್ಸವದ ಸಂಭ್ರಮಾಚರಣೆಯ ನಿಮಿತ್ತ ವೈಭವದ ಕ್ರೀಡೋತ್ಸವಕ್ಕೆ ಭರದ ಸಿದ್ಧತೆಗಳು ನಡೆಯುತ್ತಿದೆ. ಡಿಸೆಂಬರ್ 9 ರಂದು ಸಂಸ್ಥೆಯ ಆವರಣದಲ್ಲಿ ಸಂಜೆ 5 ರಿಂದ ನಿರಂತರ 4 ಗಂಟೆಗಳ ಕಾಲ ಶಾರದಾ ಸಮೂಹ ವಿದ್ಯಾ ಸಂಸ್ಥೆಗಳ ವಿದ್ಯಾರ್ಥಿಗಳು ಸಾಹಸ, ಸಾಂಸ್ಕೃತಿಕ ಕಲಾ ಪ್ರಕಾರಗಳೊಂದಿಗೆ ಮೈಮನ ಸೂರೆಗೊಳಿಸಲಿದ್ದಾರೆ. ಈ ಹೊನಲು ಬೆಳಕಿನ ಚಿತ್ತಾರದೊಂದಿಗೆ ವಿವಿಧ ಬಗೆಯ ಸಾಂಸ್ಕೃತಿಕ, ಸಾಹಸ ವೈವಿಧ್ಯಗಳನ್ನು ನಿರಂತರ ಉಣಬಡಿಸುವುದರೊಂದಿಗೆ ದೇಶದ ವಿವಿಧ ಕಲೆಗಳ ಬಗ್ಗೆ ಪರಿಚಯಿಸಲಿದ್ದಾರೆ.
ಉದ್ಘಾಟನೆಯ ವಿಶೇಷತೆ..
ವೇದಘೋಷದೊಂದಿಗೆ ವಿದ್ಯುಕ್ತವಾಗಿ ಉದ್ಘಾಟನೆಗೊಂಡು ರಜತ ಮಹೋತ್ಸವ ಧ್ವಜಾರೋಹಣದೊಂದಿಗೆ ಅತಿಥಿಗಳು ಕ್ರೀಡೋತ್ಸವಕ್ಕೆ ಚಾಲನೆ ನೀಡಲಿದ್ದಾರೆ, ಜಾತ್ರೆಯ ದೇವರ ಉತ್ಸವವನ್ನು ಪ್ರತಿಬಿಂಭಿಸುವ ವಿಶೇಷ ಉತ್ಸವವಾಗಿ ಶಾರದಾ ದೇವಿಯ ಶೋಭಾಯಾತ್ರೆಯ ಚಾಲನೆಯೊಂದಿಗೆ ಸಂಪನ್ನಗೊಳ್ಳಲಿದೆ. ಶೋಭಾಯಾತ್ರೆಯಲ್ಲಿ ಜಾಗಟೆ, ಶಂಖ, ಕೊಂಬು ವಾದ್ಯಗಳು, ಹುಲಿನೃತ್ಯ, ಭಜನೆ ಮೊದಲಾದ ವೈವಿಧ್ಯಗಳೊಂದಿಗೆ, ವೇದಿಕೆಯಲ್ಲಿನ ಅತಿಥಿಗಳಿಗೆ ಪ್ರಸಾದ ನೀಡುವುದರೊಂದಿಗೆ ಕ್ರೀಡಾಕೂಟಕ್ಕೆ ಅಧಿಕೃತ ಚಾಲನೆ ದೊರೆಯಲಿದೆ.
ವೈವಿಧ್ಯದಲ್ಲೇನು…?
ವಿದ್ಯಾ ಸಂಸ್ಥೆಯ ವಿದ್ಯಾರ್ಥಿಗಳಿಂದ ಶಾರದಾ ವಿದ್ಯಾಲಯದ 25ರ ಸವಿ ನೆನಪಿನ ವಿಶೇಷ ಸುಮಾರು 600 ವಿದ್ಯಾರ್ಥಿಗಳು ಏಕ ಕಾಲದಲ್ಲಿ ರಚಿಸುವ ವಿವಿಧ ರಚನೆಗಳು, ಸ್ಕೇಟಿಂಗ್ ಪ್ರದರ್ಶನ, ’ನೀರನ್ನು ಮಿತವಾಗಿ ಬಳಸಿ’ ಎನ್ನುವ ಧ್ಯೇಯವಾಕ್ಯಕ್ಕೆ ನೃತ್ಯದೊಂದಿಗೆ ವಿನ್ಯಾಸ ಪ್ರದರ್ಶನ, ಬಿದಿರಿನ ಕೋಲನ್ನು ಉಪಯೋಗಿಸಿ ವಿಶೇಷ ನೃತ್ಯ ಪ್ರಕಾರಗಳು ಹಾಗೂ ರಚನೆಗಳು, ಯಕ್ಶನೃತ್ಯ, ವಿವಿಧ ಜಾನಪದ ನೃತ್ಯ ವೈವಿಧ್ಯ, ಮಲ್ಲಕಂಬ ಸಾಹಸ ಪ್ರದರ್ಶನ, ತಿರುಗಾಡುವ ಮಲ್ಲಕಂಬದಲ್ಲಿ ಯೋಗಾಸನ, ಶಾಸ್ತ್ರೀಯ ನೃತ್ಯ ಪ್ರದರ್ಶನ, ರಾಜಸ್ಥಾನಿ ನೃತ್ಯ, ಯೋಗಾಸನ, ಟ್ವೆಕಾಂಡೋ ಸಾಹಸ ಪ್ರದರ್ಶನ, ನೇತಾಡುವ ಹಗ್ಗದಲ್ಲಿ ಯೋಗ ಪ್ರದರ್ಶನ, ಚೆಂಡೆ ನೃತ್ಯ, ಶಿವತತ್ವ ನೃತ್ಯಾಂಜಲಿ, ಮರಕಾಲು-ಪೂಜಾ ಕುಣಿತ, ಬೆಂಕಿಯಲ್ಲಿ ನವಿರೇಳಿಸುವ ಸಾಹಸ ಪ್ರದರ್ಶನ, ಯೋಧರ ದೇಶಭಕ್ತಿಯನ್ನು ಪ್ರತಿಭಿಂಬಿಸುವ ನೃತ್ಯ ಪ್ರಹಸನ ಹಾಗೂ ಶಾರದಾ ಸಂಸ್ಥೆಗಳ ಪ್ರತಿಭಾನ್ವಿತಾ ಕಲಾ ಪ್ರತಿಭೆಗಳಿಂದ ಸಂಗೀತ ಸಮೂಹ ಗಾಯನ ಮೊದಲಾದವುಗಳು ಜರಗಲಿವೆ. ಒಟ್ಟು ಶಾರದಾ ವಿದ್ಯಾ ಸಂಸ್ಥೆಗಳ ಸುಮಾರು 3000 ವಿದ್ಯಾರ್ಥಿಗಳು ಈ ಕ್ರೀಡೋತ್ಸವದಲ್ಲಿ ಭಾಗಿಗಳಾಗುವುದು ವಿಶೇಷ.
ಈ ರೀತಿಯ ಕ್ರೀಡೋತ್ಸವವನ್ನು ಮಂಗಳೂರು ನಗರ ಮಧ್ಯೆ ಸಂಘಟಿಸುತ್ತಿರುವ ಏಕೈಕ ವಿದ್ಯಾ ಸಂಸ್ಥೆ ಶಾರದಾ ವಿದ್ಯಾ ಸಂಸ್ಥೆಯಾಗಿದೆ ಎಂಬುದಾಗಿ ಶಾರದಾ ವಿದ್ಯಾ ಸಂಸ್ಥೆಗಳ ಅಧ್ಯಕ್ಷರಾದ ಮಾನ್ಯ ಪ್ರೊ.ಎಂ.ಬಿ.ಪುರಾಣಿಕರು ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿರುತ್ತಾರೆ. ಈ ಪತ್ರಿಕಾ ಗೋಷ್ಠಿಯಲ್ಲಿ ಶಾರದಾ ವಿದ್ಯಾ ಸಂಸ್ಥೆಗಳ ಟ್ರಸ್ಟಿಗಳಾದ ಶ್ರೀ ಪ್ರದೀಪ ಕುಮಾರ ಕಲ್ಕೂರ, ಶಾರದಾ ವಿದ್ಯಾಲಯದ ಪ್ರಾಂಶುಪಾಲರಾದ ಶ್ರೀಮತಿ ಸುನೀತಾ ವಿ ಮಡಿ, ಉಪ-ಪ್ರಾಂಶುಪಾಲರಾದ ಶ್ರೀ ದಯಾನಂದ ಕಟೀಲ್ ಉಪಸ್ಥಿತರಿದ್ದರು.
News13
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
