ಕೊಂಚಾಡಿಯ ಶ್ರೀ ವೆಂಕಟರಮಣ ದೇವರಿಗೆ ಸಹಸ್ರ ಕುಂಭಾಭಿಷೇಕದ ಸಂಭ್ರಮ

ಮಂಗಳೂರು : ಕೊಂಚಾಡಿಯ ಶ್ರೀ ವೆಂಕಟರಮಣನಿಗೆ 50ನೆಯ ಪ್ರತಿಷ್ಠಾ ಸುವರ್ಣ ಮಹೋತ್ಸವದ ಶುಭ ಸಂದರ್ಭದ ಸಲುವಾಗಿ ಪರಮಗುರುಗಳಾದ ಶ್ರೀಮದ್ ಸುಧೀಂಧ್ರತೀರ್ಥ ಸ್ವಾಮೀಜಿಯವರ ಆಶೀರ್ವಾದದೊಂದಿಗೆ, ಕಾಶೀ ಮಠಾಧೀಶರಾದ ಶ್ರೀಮದ್ ಸಂಯಮೀಂದ್ರತೀರ್ಥ ಶ್ರೀಪಾದಂಗಳವರ ದಿವ್ಯ ಕರಕಮಲಗಳಿಂದ ಗುರುವಾರ ದಿನಾಂಕ 9 ರಂದು ಬೆಳಗ್ಗೆ 9.30 ಕ್ಕೆ ಶ್ರೀ ವೆಂಕಟರಮಣನಿಗೆ ಸಹಸ್ರ ಕುಂಭಾಭಿಷೇಕ ನಡೆಯಲಿದೆ.

ಆಸೇತು ಹಿಮಾಲಯದಿಂದ ರಾಮೇಶ್ವರದವರೆಗಿನ ಸಮಸ್ತ ಪವಿತ್ರ ನದಿ, ತೀರ್ಥಕ್ಷೇತ್ರ ಹಾಗೂ ಸರೋವರಗಳಿಂದ ತೀರ್ಥ ಹಾಗೂ ಮೃತ್ತಿಕೆಗಳನ್ನು ಸಂಗ್ರಹಿಸಿ ಅತ್ಯಮೂಲ್ಯ ಗಿಡಮೂಲಿಕಾಯುಕ್ತ ಮೃತ್ತಿಕೆ ಹಾಗೂ ತೀರ್ಥಾದಿಗಳು ಸಂಗ್ರಹವಾದ ಪ್ರಮಾಣ ಹಾಗೂ ವೈವಿಧ್ಯವನ್ನು ಗಮನಿಸಿ ಪರಮ ಪೂಜ್ಯ ಗುರುವರ್ಯರು ವಿಶೇಷ ಸಂದರ್ಭಗಳಲ್ಲಿ ಅತಿವಿರಳವಾಗಿ ನಡೆಯುವ ಪದ್ಮಸಂಹಿತಾ ಪ್ರಕಾರ ಏಕೋತ್ತರ ಸಹಸ್ರ ದ್ರವ್ಯ ಕಲಶಾಭಿಷೇಕವು ಶ್ರೀ ವೆಂಕಟರಮಣನಿಗೆ ನಡೆಯಲಿದೆ.

ರವಿವಾರ ಬೆಳಿಗ್ಗೆ ಕಾಶೀ ಮಠಾಧೀಶರಾದ ಶ್ರೀಮದ್ ಸಂಯಮಿಂದ್ರ ತೀರ್ಥ ಸ್ವಾಮೀಜಿಯವರ ದಿವ್ಯ ಉಪಸ್ಥಿತಿಯಲ್ಲಿ ಮಹಾ ಪ್ರಾರ್ಥನೆ, ಯಜ್ಞ ಮಂಟಪದಲ್ಲಿ ಗುರುವರ್ಯರನ್ನು ಬರಮಾಡಿಕೊಂಡು ಶ್ರೀಗಳವರಿಂದ ದೀಪ ಪ್ರಜ್ವಲನೆ, ಗುರುವರ್ಯರ ಅಗ್ರಪೂಜೆ, ಬ್ರಹ್ಮಋತ್ವಿಜಾವರಣ, ಯಜ್ಞ ಮಂಟಪದಲ್ಲಿ ಗುರುಗಣಪತಿ ಪೂಜೆ, ಗೌರಿಮಾತೃಕಾ ಪೂಜೆ ನಾಂದಿ ಸಮಾರಾಧನೆ, ಕೌತುಕ ಬಂಧನ, ಅಂಕುರಾರೋಪಣ, ಮಂಟಪ ಪ್ರತಿಷ್ಠೆ, ಪ್ರಧಾನದೇವತಾ ಆವಾಹನ ಪೂಜನ ಅಗ್ನಿ ಪ್ರತಿಷ್ಠಾಪನೆ, ಶ್ರೀದೇವಳದಲ್ಲಿ ಶ್ರೀದೇವರಿಗೆ ವಿಶೇಷ ಕಲಾವೃದ್ಧಿ ಹವನ, ದ್ವಾದಶ ಕಲಶ ಸ್ನಪನ, ದೇವರು ಯಜ್ಞ ಮಂಟಪಕ್ಕೆ ಚಿತ್ತೈಸಿ, ಲಘು ಪೂರ್ಣಾಹುತಿ ಯಜ್ಞದಲ್ಲಿ ಮಹಾ ಮಂಗಳಾರತಿ, ದೇವರು ದೇವಳಕ್ಕೆ ಚಿತ್ತೈಸಿದರು. ಬಳಿಕ ಮಹಾಪೂಜೆ, ಗೋಪೂಜೆ ಮಧ್ವಗುರುಪೂಜೆ, ಗುರುಭಿಕ್ಷೆ ಸುವಾಸಿನಿ ಬ್ರಾಹ್ಮಣ ಆರಾಧನೆ ಸಮಾರಾಧನೆ ನೆರವೇರಿತು.

ಚಿತ್ರ : ಮಂಜು ನೀರೇಶ್ವಾಲ್ಯ