ಅನಾಥ ವೃದ್ಧರಿಗಾಗಿ ಆಹಾರ ಸೇವೆ ಆರಂಭಿಸಿದ ವೈದ್ಯ

ವಯಸ್ಸಾದ ತಂದೆ ತಾಯಿಯರನ್ನು ಒಂಟಿಯಾಗಿಸುವುದು, ಮನೆಯಿಂದ ಹೊರಹಾಕುವುದು ಇಂದಿನ ಕಾಲದ ಕಠೋರ ವಾಸ್ತವ. ಹಲವಾರು ಸಂಖ್ಯೆಯ ಹಿರಿಯ ನಾಗರಿಕರು ಇಂದು ದೈಹಿಕ, ಮಾನಸಿಕ ಹಿಂಸೆಗೊಳಗಾಗುತ್ತಿದ್ದಾರೆ. ಹಲವಾರು ಮಂದಿ ಮಕ್ಕಳಿಂದ ದೂರವಾಗಿ ವೃದ್ಧಾಶ್ರಮ ಸೇರಿದ್ದಾರೆ.

ಇಂತಹ ವೃದ್ಧರ ಸೇವೆಗೆಂದೇ ತಮ್ಮ ಜೀವನವನ್ನು ಮುಡುಪಾಗಿಟ್ಟವರು ಡಾ.ಉದಯ್ ಮೋದಿ. ಮುಂಬಯಿಯ ಬೈಯಂದರ್‌ನಲ್ಲಿ ಉಚಿತ ಆಹಾರ ಸೇವೆಯನ್ನು ಆರಂಭಿಸಿರುವ ಇವರು, ಇದರ ಮೂಲಕ 500 ಮಂದಿ ಅನಾಥ ವೃದ್ಧರಿಗೆ ಪ್ರತಿನಿತ್ಯ ಆಹಾರ ಒಗಿಸುತ್ತಾರೆ.

ವೈದ್ಯಕೀಯ ವೃತ್ತಿಗೆಂದು ಗುಜರಾತ್‌ನಿಂದ ಮುಂಬಯಿಗೆ ಆಗಮಿಸಿದ್ದ ಇವರಿಗೆ ಮಕ್ಕಳಿಂದ ದೂರವಾದ ವೃದ್ಧರ ಸೇವೆ ಮಾಡುವ ಪ್ರೇರಣೆ ಕೊಟ್ಟಿದ್ದು ಒರ್ವ 78 ವರ್ಷದ ವಯೋವೃದ್ಧ ಮತ್ತು ಆತನ ರೋಗಪೀಡಿತ ಪತ್ನಿ. ಹಸಿವಿನಿಂದ ಕಂಗೆಟ್ಟು ಜೇಬಲ್ಲಿ ನಯಾಪೈಸೆಯಿಲ್ಲದೆ ಇವರ ಬಳಿ ಬಂದು ಆಹಾರಕ್ಕಾಗಿ ಇವರು ಅಂಗಲಾಚಿದ್ದರು. ಅಲ್ಲಿಂದ ಮೋದಿಯವರ ವೃದ್ಧರ ಸೇವೆ ಆರಂಭವಾಯಿತು.

ಅನಾಥ ವೃದ್ಧರಿಗೆಂದೇ ಇವರು ‘ಶ್ರವಣ್ ಟಿಫಿನ್ ಸರ್ವಿಸ್’ನ್ನು ಆರಂಭಿಸಿದರು. ಪುರಾಣದಲ್ಲಿ ಬರುವ ತಂದೆ ತಾಯಿಯರನ್ನು ಹೆಗಲಲ್ಲಿ ಹೊತ್ತು ತೀರ್ಥಯಾತ್ರೆ ಮಾಡಿಸಿದ ಶ್ರವಣ ಕುಮಾರನೇ ಇವರಿಗೆ ಈ ಹೆಸರಿಡಲು ಪ್ರೇರಣೆ. ಮೊದಲು ತಮ್ಮ ಮನೆಯಿಂದಲೇ ತಮ್ಮ ಹೆಂಡತಿ ಮಾಡಿದ ಆಹಾರವನ್ನು ಅನಾಥ ವೃದ್ಧರಿಗೆ ಹಂಚುತ್ತಿದ್ದರು. ಇದೀಗ 11 ಟಿಫಿನ್ ಸರ್ವಿಸ್ ಇವರು ಆರಂಭಿಸಿದ್ದು, 500ವೃದ್ಧರಿಗೆ ನಿತ್ಯ ಆಹಾರ ಹಂಚಲಾಗುತ್ತದೆ.

6 ಚಪಾತಿ ಮತ್ತು ಪದಾರ್ಥ ಒಂದೊಂದು ಟಿಫಿನ್‌ನಲ್ಲಿರುತ್ತದೆ. ಡಯಾಬಿಟಿಸ್ ರೋಗಿಗಳಿಗೆ ಪ್ರತ್ಯೇಕ ಆಹಾರ ಮಾಡಲಾಗುತ್ತದೆ. ಟಿಫಿನ್ ಹಂಚಲು ಕಾರ್ಮಿಕರನ್ನೂ ಇಟ್ಟುಕೊಂಡಿದ್ದಾರೆ. ಇದಕ್ಕಾಗಿ 3 ಲಕ್ಷ ರೂಪಾಯಿಗಳನ್ನು ತಮ್ಮ ಜೇಬಿನಿಂದಲೇ ಇವರು ವ್ಯಹಿಸುತ್ತಾರೆ.

ವಯಸ್ಸಾದವರು ನಿರ್ಲಕ್ಷ್ಯಕ್ಕೆ ಒಳಗಾಗುವ ಇಂತಹ ಕಾಲದಲ್ಲಿ ಮೋದಿಯಂತಹ ಮಹಾನ್ ಸೇವಕ ಸಿಗುವುದು ಅತಿ ವಿರಳ. ಅನಾಥ ವೃದ್ಧರಿಗಾಗಿ ಅವರು ಮಾಡುತ್ತಿರುವ ಕಾರ್ಯ ಇತರರಿಗೆ ಮಾದರಿ.