100 ಕ್ಕೂ ಹೆಚ್ಚು ಭತ್ತ, 25 ಕ್ಕೂ ಹೆಚ್ಚು ಬದನೆ, ಹತ್ತಿ ತಳಿಗಳನ್ನು ಸಂರಕ್ಷಿಸಿದ ಹಿರಿಮೆ ಅವರದು. ಅಲ್ಲದೇ ವಿವಿಧ ಬಗೆಯ ಸಿರಿಧಾನ್ಯ ಬೆಳೆಯುವ ಅಪರೂಪದ ಸಾವಯವ ಕೃಷಿಕ ಚನ್ನಬಸಪ್ಪ ಕೊಂಬಳಿ.
ಹಾವೇರಿ ಜಿಲ್ಲೆ ರಾಣೆಬೆನ್ನೂರು ತಾಲ್ಲೂಕಿನ ಕಾಕೋಳು ಗ್ರಾಮದವರು ಚನ್ನಬಸಪ್ಪ. ಮಳೆ ನೀರು ಕೊಯ್ಲಿನಲ್ಲಿ ಸಾಧನೆ ಹಾಗೂ ಸಾವಯವ ಕೃಷಿ ಮೂಲಕ ಜವಾರಿ ಬೀಜಗಳನ್ನು ಉಳಿಸುವಲ್ಲಿ ಮಹತ್ತರ ಕಾರ್ಯವನ್ನು ಇವರು ಮಾಡಿದ್ದಾರೆ.
ಜಿಲ್ಲೆಯಲ್ಲಿ ಏನಿಲ್ಲವೆಂದರೂ 600ಕ್ಕೂ ಹೆಚ್ಚು ಅರಣ್ಯ ಪ್ರದೇಶ ನಿರ್ಮಿಸಿದ್ದಾರಂತೆ ಇವರು. ದೇಸಿ ಕೃಷಿಕ ಬಳಗದ ನೇತೃತ್ವವನ್ನೂ ಈ ಮೊದಲು ವಹಿಸಿಕೊಂಡಿದ್ದ ಇವರು, ಹೈಬ್ರಿಡ್ ತಳಿಗಳ ಬಳಕೆಯಿಂದಾಗುವ ಪ್ರತಿಕೂಲ ಪರಿಣಾಮಗಳ ಕುರಿತು ಅರಿವು ಮೂಡಿಸುವಲ್ಲಿ ಶ್ರಮಿಸಿದ್ದಾರೆ.
ಸಾವಯವ ಗೊಬ್ಬರ ತಯಾರಿಕೆಯಲ್ಲೂ ಇವರು ಹೆಸರು ಮಾಡಿದ್ದಾರೆ. ಅನೇಕ ರೈತರಿಗೆ ಸಾವಯವ ಬೀಜಗಳನ್ನು ನೀಡುವುದಲ್ಲದೇ, ಅವುಗಳ ಸಂರಕ್ಷಣೆಯ ವಿಧಾನವನ್ನೂ ಹೇಳಿಕೊಡುತ್ತಾರೆ ಅವರು. ಆಸಕ್ತ ರೈತರಿಗೆ ಸಾವಯವ ಕೃಷಿ ಘಟಕ ನಿರ್ಮಿಸಿಯೂ ಕೊಡುತ್ತಾರಂತೆ.
ಇವರ ಸಾವಯವ ಕೃಷಿಯಲ್ಲಿನ ಸಾಧನೆಗೆ ಅನೇಕ ಪ್ರಶಸ್ತಿಗಳು ಇವರನ್ನು ಅರಸಿ ಬಂದಿವೆ. ಕೃಷಿ ಮಾಧ್ಯಮ ಕೇಂದ್ರದಿಂದ ವಿಶೇಷ ಪ್ರಶಸ್ತಿ, ಸೃಷ್ಟಿ ಸಮ್ಮಾನ ರಾಷ್ಟ್ರೀಯ ಪ್ರಶಸ್ತಿ, ರೈತ ವಿಜ್ಞಾನಿ ಪ್ರಶಸ್ತಿ, ಕೃಷಿ ಪಂಡಿತ ಪ್ರಶಸ್ತಿ ಹೀಗೇ ಅನೇಕ ಪ್ರಶಸ್ತಿಗಳು ಅವರ ಮುಡಿಗೇರಿವೆ.
ಮಾನವನ ದಿನಚರಿ ಬದಲಾಗಿದೆ. ಪರಿಸರ ಸಂಪೂರ್ಣ ಮಲಿನವಾಗುತ್ತ ಸಾಗಿದೆ. ಇದರ ಪರಿಣಾಮ ಅನೇಕ ರೋಗ ರುಜಿನಗಳು ಬರುತ್ತಿವೆ. ಇದಕ್ಕೆಲ್ಲ ಸಾವಯವ ಬದುಕು ಪರಿಹಾರ ಎನ್ನುತ್ತಾರೆ ಚನ್ನಬಸಪ್ಪ ಕೊಂಬಳಿ.
ದೇಸಿ ಬೀಜ ಸಂರಕ್ಷಣೆಗೆ ಆದ್ಯತೆ ನೀಡುವ ಇವರು ಅನೇಕ ಸಾವಯವ ಕೃಷಿ ಮೇಳಗಳಲ್ಲಿ ಭಾಗಿಯಾಗಿದ್ದಾರೆ. ಇವರು ನಿಜಕ್ಕೂ ಅನೇಕ ರೈತರಿಗೆ ಮಾದರಿ ಕೃಷಿಕ.
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
