ರದ್ದಿ ವ್ಯಾಪಾರಿಯಿಂದ ಸಂಶೋಧಕಿಯಾಗುವವರೆಗೆ

ಕೋಲ್ಕತಾ: ಕೋಲ್ಕತಾದ ಬಲ್ಲಿಗಂಜ್ ರೈಲ್ವೆ ನಿಲ್ದಾಣದ ಬಳಿ ರಸ್ತೆ ಬದಿಯ ಗುಡಿಸಲಿನಲ್ಲಿ ವಾಸಿಸುತ್ತಿರುವ ಟುಕ್‌ಟುಕಿ ಮೊಂಡಲ್ ಇತರ ಮಹಿಳೆಯರಂತೆ ಅಲ್ಲ. ನಸುಕಿನ ಜಾವ ಆರಂಭಗೊಂಡು ಸಂಜೆಯವರೆಗಿನ ಇವರ ಕಾರ್ಯಗಳ ಬಗ್ಗೆ ಎಲ್ಲೂ ಉಲ್ಲೇಖವಾಗಿಲ್ಲ. ಇನ್ನು ಈ ಮಹಿಳಾ ದಿನಾಚರಣೆಗೆ ಅವರ ಥೀಮ್- ಬದಲಾವಣೆಗಾಗಿ ಧೈರ್ಯವಂತರಾಗಿ (Be Bold For Change ) ಎಂಬುದಾಗಿತ್ತು.

ಮುಸ್ಲಿಂ ಕುಟುಂಬದಲ್ಲಿ ಜನಿಸಿ ಹಿಂದೂ ಯುವಕನಿಗೆ ವಿವಾಹವಾದ ಇವರ ಜೀವನ ಸಂಕಷ್ಟದಿಂದ ಕೂಡಿದೆ. ಈವತ್ತಿಗೂ ಸಾಮಾಜಿಕ ಕಳಂಕಗಳನ್ನು ಎದುರಿಸುತ್ತಿದ್ದಾರೆ. ಚಿಕ್ಕ ವಯಸ್ಸಿನಲ್ಲೇ ತಂದೆಯನ್ನು ಕಳೆದುಕೊಂಡು ತಾಯಿಯಿಂದ ದೂರವಾದ 28 ವರ್ಷದ ಟುಕ್‌ಟುಕಿ ಮೊಂಡಲ್ ತನ್ನ ಅಜ್ಜಿಯ ಜೊತೆಗೆ ವಾಸಿಸುತ್ತ ರದ್ದಿ ವ್ಯಾಪಾರ ನಡೆಸಿಯೇ ಪದವಿ ಶಿಕ್ಷಣ ಪಡೆದರು. 2012ರಲ್ಲಿ ರದ್ದಿ ವ್ಯಾಪಾರಸ್ಥರಲ್ಲಿ ಶಿಕ್ಷಣ ಪಡೆದ ಮೊದಲ ಪದವೀಧರೆ ಎನಿಸಿಕೊಂಡರು.

ಕೊನೆಗೂ ಮಹಾನಿಭನ್ ಕಲ್ಕತ್ತಾ ರಿಸರ್ಚ್ ಗ್ರೂಪ್(ಎಂಸಿಆರ್‌ಜಿ) ಸಂಶೋಧನಾ ತಂಡದಿಂದ ಗುರುತಿಸಿಕೊಂಡ ಟುಕ್‌ಟುಕಿ 2016ರಲ್ಲಿ ‘ವುಮೆನ್ ಎಂಡ್ ಚೈಲ್ಡ್ ಮೈಗ್ರೆಂಟ್ಸ್ ಇನ್ ಕಲ್ಕತ್ತಾ’ ಅಡಿಯಲ್ಲಿ ನಗರಗಳಗೆ ವಲಸೆ ಹೋದವರು ಮತ್ತು ಬಡವರ ಬಗ್ಗೆ ಸಂಶೋಧನೆ ನಡೆಸಿ ವರದಿ ತಯಾರಿಸುವಲ್ಲಿ ಸಂಶೋಧನಾ ತಂಡಕ್ಕೆ ನೆರವಾಗಿದ್ದಾರೆ.

ಟುಕ್‌ಟುಕಿ ತನ್ನ ಸಮುದಾಯದ ಬಡ ನಿರಾಶ್ರಿತ ಮಕ್ಕಳ ಬಗ್ಗೆ ಸಂಶೋಧನೆ ನಡೆಸಿ, ಹೆಚ್ಚಿನ ಮಾಹಿತಿಗಳನ್ನು ಕಲೆ ಹಾಕಿ ಈ ಮಕ್ಕಳಿಗೆ ಗುರುತಿನ ಚೀಟಿ ಒದಗಿಸಲು ಅಧಿಕಾರಿಗಳಿಗೆ ಸಹಕರಿಸುತ್ತಿದ್ದಾರೆ ಎಂದು ಹಿರಿಯ ಸಂಶೋಧಕ ಸಾಬಿರ್ ಅಹ್ಮದ್ ಹೇಳಿದ್ಧಾರೆ.

ತನ್ನ ೨ ವರ್ಷದ ಮಗಳು ಶ್ರೇಷ್ಠಾ ತನ್ನಕ್ಕಿಂತ ಹೆಚ್ಚಿನ ಆತ್ಮವಿಶ್ವಸದಿಂದ ಬೆಳೆಯಬೇಕು ಎಂದು ಹೇಳಿದ ಟುಕ್‌ಟುಕಿ, ನಗರ ಬಡತನದ ಬಗ್ಗೆ ಹೆಚ್ಚಿನ ಸಂಶೋಧನೆ ನಡೆಸಲು ಇಷ್ಟಪಡುತ್ತೇನೆ ಎಂದು ಹೇಳಿದ್ದಾರೆ.