ಬಂಟರ ಸಂಘದ ಸದಸ್ಯರ ಸಮಾವೇಶ

ಪುತ್ತೂರು: ಸುಂದರರಾಮ್ ಶೆಟ್ಟಿ ಅವರ ಬಗ್ಗೆ ಇಂದಿನ ಪೀಳಿಗೆ ತಿಳಿದಿದೆಯಾದರೂ, ಅದನ್ನು ಮುಂದಿನ ಪೀಳಿಗೆಗೆ ರವಾನಿಸುವ ಕೆಲಸ ಆಗಬೇಕು. ವ್ಯಕ್ತಿ ಶಕ್ತಿಯಾಗಿ ನಿಂತು ಸಮಾಜದ ಶ್ರೇಯೋಭಿವೃದ್ಧಿಗೆ ಕೆಲಸ ಮಾಡಿದ್ದಾರೆ ಎಂದು ವಿಜಯಾ ಬ್ಯಾಂಕ್ ನಿವೃತ್ತ ಮಹಾಪ್ರಬಂಧಕ ಬಿ.ಎ.ಉಲ್ಲಾಸ್ ರೈ ಹೇಳಿದರು.

ಪುತ್ತೂರು ತಾಲೂಕು ಬಂಟರ ಸಂಘದ ಸದಸ್ಯರ ಸಮಾವೇಶ ಕಾರ್ಯಕ್ರಮದಲ್ಲಿ ಎಂ.ಸುಂದರರಾಮ್ ಶೆಟ್ಟಿ ಅವರಿಗೆ ನುಡಿನಮನ ಸಲ್ಲಿಸಿ ಅವರು ಮಾತನಾಡಿದರು.

ಉಳುವವನೇ ಹೊಲದೊಡೆಯ ಕಾಯ್ದೆ ಸಂದರ್ಭ ದಿಕ್ಕುಗಾಣದಾಗ ಮುಂದೆ ನಿಂತು ದಾರಿ ತೋರಿಸಿದವರು. ಅವರ ಆದರ್ಶವನ್ನು ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು. ಆ ದೃಷ್ಟಿಯಿಂದ ಮುಂದಿನ ಪೀಳಿಗೆಗೂ ಅವರ ಆದರ್ಶವನ್ನು ತಿಳಿಸುವ ಕೆಲಸವಾಗಬೇಕು. ಆದ್ದರಿಂದ ಅಗತ್ಯವಾಗಿ ಅವರ ಜೀವನಗಾಥೆಯನ್ನು ಪಠ್ಯದಲ್ಲಿ ಸೇರಿಸಬೇಕು. ಅಥವಾ ಉಪಪಠ್ಯವಾಗಿ ಮಾಡಿದರೂ ತುಂಬಾ ಉತ್ತಮ. ಸುಂದರರಾಮ್ ಶೆಟ್ಟಿ ಅವರ ಬಗೆಗಿನ ಮಾಹಿತಿ ರಾಜ್ಯಕ್ಕೆ ತಿಳಿದರೆ, ಮುಂದೆ ದೇಶಕ್ಕೆ ತಿಳಿಯುತ್ತದೆ ಎಂದರು.

ಶಾಸಕಿ ಶಕುಂತಳಾ ಶೆಟ್ಟಿ ಮಾತನಾಡಿ, ನಮ್ಮೆಲ್ಲರ ಮೇಲೆ ಋಣ ಸಂದಾಯ ಮಾಡುವ ಜವಾಬ್ದಾರಿಯಿದೆ. ಸುಂದರರಾಮ್ ಶೆಟ್ಟಿ ಅವರ ಆದರ್ಶಗಳನ್ನು ಮೈಗೂಡಿಸಿಕೊಂಡು ಮುನ್ನಡೆಯಬೇಕಿದೆ ಎಂದರು.

ಬಂಟರ ಯಾನೆ ನಾಡವರ ಮಾತೃಸಂಘದ ಜತೆ ಕಾರ್ಯದರ್ಶಿ ಕಾವು ಹೇಮನಾಥ ಶೆಟ್ಟಿ ಮಾತನಾಡಿ, ಸಮಾಜ ಸೇವೆಯಲ್ಲಿ ಸುಂದರರಾಮ್ ಶೆಟ್ಟಿ ಅವರದ್ದು ದೊಡ್ಡ ಹೆಸರು. ಅಂದಿನ ಕಾಲಮಾನದಲ್ಲೇ ೯ ಸಾವಿರ ಮಂದಿಗೆ ಉದ್ಯೋಗ ನೀಡಿದವರು. ಸಂಘಟನೆ ಇನ್ನೊಂದು ಸಮಾಜಕ್ಕೆ ಆದರ್ಶವಾಗಿರಬೇಕು. ಈ ನಿಟ್ಟಿನಲ್ಲಿ ಬಂಟರ ಸಂಘ ಮುಂದುವರಿಯುತ್ತಿದೆ ಎಂದರು.

ಇದೇ ಸಂದರ್ಭ ಯಕ್ಷಗಾನ ಕಲಾವಿದ ಕೆ.ಎಚ್.ದಾಸಪ್ಪ ರೈ ಹಾಗೂ ರಾಜ್ಯ ಪರಿಸರ ಪತ್ರಿಕೋದ್ಯಮ ಪ್ರಶಸ್ತಿ ಪುರಸ್ಕೃತ ಡಾ.ನರೇಂದ್ರ ರೈ ದೇರ್ಲ ಅವರನ್ನು ಸನ್ಮಾನಿಸಲಾಯಿತು. ಮನೋಹರ್ ರೈ, ಬಾಬು ಶೆಟ್ಟಿ ನರಿಮೊಗರು, ಕೈಕಾರ ಪ್ರಕಾಶ್ಚಂದ್ರ ರೈ, ಪಟ್ಟೆ ಉಮೇಶ್ ಶೆಟ್ಟಿ, ಶ್ಯಾಮ್‌ಸುಂದರ್ ರೈ, ಚಂದ್ರಹಾಸ ರೈ, ದಿವಾಕರ ರೈ, ವೀಣಾ ಆರ್ ರೈ, ಬೂಡಿಯಾರ್ ರಾಧಾಕೃಷ್ಣ ರೈ, ನಾರಾಯಣ ರೈ, ಶ್ರೇಯಸ್ ರೈ, ಕುಂಬ್ರ ದುರ್ಗಾಪ್ರಸಾದ್ ರೈ ಅವರನ್ನು ಗೌರವಿಸಲಾಯಿತು. ಇದೇ ಸಂದರ್ಭ ಅಂಗವಿಕಲರಿಗೆ ಗಾಲಿ ಕುರ್ಚಿ ವಿತರಿಸಲಾಯಿತು.

ತಾಲೂಕು ಬಂಟರ ಸಂಘದ ಅಧ್ಯಕ್ಷ ಸೀತಾರಾಮ ರೈ ಅಧ್ಯಕ್ಷತೆ ವಹಿಸಿದ್ದರು. ಬೆಳ್ತಂಗಡಿ ವಿಜಯ ಕ್ರೆಡಿಟ್ ಕೋ-ಆಪರೇಟಿವ್ ಸೊಸೈಟಿ ಅಧ್ಯಕ್ಷ ಎಸ್.ಜಯರಾಮ ಶೆಟ್ಟಿ, ಸುಳ್ಯ ಬಂಟರ ಸಂಘ ಅಧ್ಯಕ್ಷ ಎನ್.ಜಯಪ್ರಕಾಶ್ ರೈ, ಸಾಹಿತಿ ರಘುನಾಥ ರೈ ನುಳಿಯಾಲು, ಮಹಿಳಾ ಬಂಟರ ಸಂಘ ಅಧ್ಯಕ್ಷೆ ಮಲ್ಲಿಕಾ ಪ್ರಸಾದ್, ಬಂಟರ ಯಾನೆ ನಾಡವರ ಮಾತೃಸಂಘ ಸಂಚಾಲಕ ದಯಾನಂದ ರೈ ಮನವಳಿಕೆಗುತ್ತು, ಬಂಟರ ಸಂಘದ ಕೋಶಾಧಿಕಾರಿ ಶಶಿಕುಮಾರ್ ರೈ ಬಾಲ್ಯೊಟ್ಟು ಉಪಸ್ಥಿತರಿದ್ದರು.

ಅನಘಾ, ಅಂಕಿತಾ ಪ್ರಾರ್ಥಿಸಿ, ಕಾರ್ಯದರ್ಶಿ ಕೆ.ವಸಂತ ಕುಮಾರ್ ರೈ ಸ್ವಾಗತಿಸಿದರು. ನಿರಂಜನ್ ರೈ ಮಠಂತಬೆಟ್ಟು ಕಾರ್ಯಕ್ರಮ ನಿರೂಪಿಸಿದರು.