ಮಕ್ಕಳಿಗೆ ಸಂಸ್ಕಾರದೊಂದಿಗೆ ಉನ್ನತ ಶಿಕ್ಷಣಕ್ಕೂ ಪ್ರೋತ್ಸಾಹ ನೀಡಬೇಕು : ಶ್ರೀಪತಿ ಭಟ್

ಬೆಳ್ತಂಗಡಿ : ಮೂಲ ಉದ್ದೇಶವನ್ನು ಕಡೆಗಣಿಸದೆ ಮಕ್ಕಳಲ್ಲಿ ಆಡಂಬರವಿಲ್ಲದೆ ಸಂಸ್ಕಾರವನ್ನು ಬೆಳೆಸುವ, ಸಂಸ್ಕೃತಿಯನ್ನು ಬಿಂಬಿಸುವ ಪ್ರಯೋಜನವಾಗುವ ವಿಶೇಷ ಪರೀಕ್ಷೆಗಳಿಗೆ ಪಠ್ಯೇತರ ಚಟುವಟಿಕೆಗಳಲ್ಲಿ ವಿಶೇಷ ತರಬೇತಿ ನೀಡುವ ಉತ್ತಮ ಅವಕಾಶ ಸಂಘಟನೆಗಳಿಗಿದೆ ಎಂದು ಮೂಡುಬಿದ್ರೆಯ ಉದ್ಯಮಿ ಶ್ರೀಪತಿ ಭಟ್ ಹೇಳಿದರು.

ಅವರು ಧರ್ಮಸ್ಥಳದ ‘ಮಂಜುಕೃಪಾ’ದಲ್ಲಿ ನಡೆದ ತುಳು ಶಿವಳ್ಳಿ ಸಭಾ ಧರ್ಮಸ್ಥಳ ವಲಯದ 15ನೇ ಮಾಸಿಕ ಸಭೆಯಲ್ಲಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿ ವಲಯದ ಸದಸ್ಯರ ಮಾಹಿತಿ ಪುಸ್ತಕ ‘ಪರಿಚಯ’ ಬಿಡುಗಡೆಗೊಳಿಸಿ ಮಾತನಾಡುತ್ತಿದ್ದರು.

ಬ್ರಾಹ್ಮಣ ಸಮಾಜದ ಮಕ್ಕಳು ಕೇವಲ ಪೂಜೆಗೆ ಮಾತ್ರ ಸೀಮಿತರಲ್ಲ. ಕೆಲಸ, ಉದ್ಯೊಗ, ವ್ಯಾಪಾರ, ಇಂಜಿನಿಯರ್, ವೈದ್ಯಕೀಯ ಕ್ಷೇತ್ರಗಳಲ್ಲೂ ವಿಶೇಷ ಪರಿಣತಿ ಸಾಧಿಸಿ ಶ್ರೇಷ್ಠ ಸ್ಥಾನ ಪಡೆಯಬೇಕು. ಜಿಲ್ಲೆ ರಾಜ್ಯ, ರಾಷ್ಟ್ರಮಟ್ಟದಲ್ಲಿ ಲಕ್ಷಾಂತರ ಪ್ರತಿಭಾವಂತ ವಿದ್ಯಾರ್ಥಿಗಳಿದ್ದಾರೆ ಆರ್ಥಿಕವಾಗಿ ಕಲಿಯಲು ಅನುಕೂಲವಿಲ್ಲದ ವಿದ್ಯಾರ್ಥಿಗಳು ಐಎಎಸ್, ಐಪಿಎಸ್ ಮಾಡಬಯಸಿದ್ದಲ್ಲಿ ಅವರಿಗೆ ತಮ್ಮ ವನಜಾಕ್ಷಿ ಚಾರಿಟೇಬಲ್ ಟ್ರಸ್ಟ್‌ನಿಂದ ಆರ್ಥಿಕ ನೆರವು ನೀಡುಲಾಗುವುದೆಂದು ಹೇಳಿದರು.

ತುಳು ಶಿವಳ್ಳಿ ಸಭಾ ಗೌರವಾಧ್ಯಕ್ಷ ವಿಜಯರಾಘವ ಪಡ್ವೆಟ್ನಾಯ ಅವರು, ಉಜಿರೆಯ ತಮ್ಮ ಸಪ್ತತಿ ಅಭಿನಂದನೆ, ಶೃಂಗೇರಿ ಶ್ರೀಗಳ ಗುರುವಂದನೆ, ವಸಂತ ವೇದಪಾಠ ಶಿಬಿರದ ಯಶಸ್ಸಿಗೆ ಕಾರಣರಾದ ಸರ್ವರಿಗೂ ಕೃತಜ್ಞತೆ ಸಲ್ಲಿಸಿ ಬ್ರಾಹ್ಮಣ ಸಮಾಜದ ಶ್ರೇಷ್ಠತೆ ಉಳಿಸಲು ಕಾರಣವಾದ ಇಂತಹ ಕಾರ್ಯಗಳಿಗೆ ಎಲ್ಲರ ಸಹಕಾರ ಇರಲೆಂದು ಆಶಿಸಿದರು. ಧರ್ಮಸ್ಥಳ ವಲಯಾಧ್ಯಕ್ಷ ಗಿರೀಶ್ ಕುದ್ರೆಂತ್ತಾಯ ಅಧ್ಯಕ್ಷತೆ ವಹಿಸಿದ್ದರು.

ಬೆಳ್ತಂಗಡಿ ತಾಲೂಕು ತುಳು ಶಿವಳ್ಳಿ ಸಭಾಧ್ಯಕ್ಷ ರಾಘವೇಂದ್ರ ಬೈಪಾಡಿತ್ತಾಯ ಅವರು, ಉಜಿರೆಯಲ್ಲಿ ಯಶಸ್ವಿಯಾಗಿ ನಡೆಯುತ್ತಿರುವ ೧೦ನೇ ವರ್ಷದ ವಸಂತ ವೇದ ಪಾಠ ಶಿಬಿರ ಹಾಗೂ ಗಂಗಾಧರ ರಾವ್ ಕೆವುಡೇಲು ಅವರು, ಶ್ರೀ ಜನಾರ್ದನ ಸ್ವಾಮಿ ಕ್ರೆಡಿಟ್ ಕೋ ಆಪರೇಟಿವ್ ಸೊಸೈಟಿಯ ವಾರ್ಷಿಕ ಸಾಧನೆ ಹಾಗೂ ಸಂಘದ ಯೋಜನೆಗಳ ಕುರಿತು ಮಾಹಿತಿ ನೀಡಿದರು.

ಕಾರ್ಯದರ್ಶಿ ವಸಂತ ಭಟ್ ಅವರು, ಮಹಿಳಾ ಸ್ವ ಸಹಾಯ ಸಂಘ ರಚಿಸಿ ಸದಸ್ಯರಿಗೆ ಆರ್ಥಿಕವಾಗಿ ನೆರವಾಗುವ ಯೋಜನೆ ಕುರಿತು ಮಾಹಿತಿ ನೀಡಿದರು. ಅಪಘಾತದಿಂದ ವೈದ್ಯಕೀಯ ಚಿಕಿತ್ಸೆ ಪಡೆಯುತ್ತಿರುವ ಮಾಲತಿ ರಾವ್‌ಗೆ ಸದಸ್ಯರಿಂದ ಸಂಗ್ರಹಿಸಿದ ಆರ್ಥಿಕ ನೆರವನ್ನು ಉಜಿರೆ ವಲಯಾಧ್ಯಕ್ಷ ಗೋಪಾಲಕೃಷ್ಣ ಭಟ್‌ಗೆ ಹಸ್ತಾಂತರಿಸಲಾಯಿತು. ಸತ್ಯಪ್ರಿಯ ಕಲ್ಲೂರಾಯರು ಧರ್ಮಸ್ಥಳ ವಲಯದ ವಿದ್ಯಾನಿಧಿಗೆ ರೂ 10 ಸಾವಿರದ ನೆರವಿನ ಚೆಕ್ಕನ್ನು ಅಧ್ಯಕ್ಷರಿಗೆ ಹಸ್ತಾಂತರಿಸಿದರು.

ಶ್ರೀಪತಿ ಹೆಬ್ಬಾರ್ ಮಾಂಜಿಲ್ ಹಾಗೂ ದಾನಿಗಳನ್ನು ಗೌರವಿಸಲಾಯಿತು. ‘ಮಂಜುಕೃಪಾ’ದ ವೆಂಕಟ್ರಮಣ ಅಡಿಗ ಸ್ವಾಗತಿಸಿ, ಸುಬ್ರಹ್ಮಣ್ಯ ಪಡ್ವೆಟ್ನಾಯ ನಿರೂಪಿಸಿ, ಹರೀಶ್ ರಾವ್ ಮುಂಡ್ರುಪ್ಪಾಡಿ ವಂದಿಸಿದರು.