ಮೈತ್ರೇಯೀ ಗುರುಕುಲದಲ್ಲಿ ಚೈತ್ರೋತ್ಸವ

ವಿಟ್ಲ: ನಮ್ಮಲ್ಲಿ ಸಹಜತೆಯನ್ನು ಅರ್ಥೈಸುವ ಸ್ಥಿತಿ ಬಂದಾಗ ನಾವು ಎಲ್ಲಿಯೂ ಬಾಳಿ ಬದುಕ ಬಹುದು. ಉತ್ತಮ ಪರಿಸರದಲ್ಲಿ  ಬೆಳೆಯುತ್ತಿರುವ ಮೈತ್ರೇಯೀ ಗುರುಕುಲದ ವಿದ್ಯಾರ್ಥಿ ನಿಯರಿಗೆ ಸತ್‌ಸಂಸ್ಕಾರ ನೀಡುವ ಮೂಲಕ ದೇಶಕ್ಕೆ ವಿಶೇಷ ನಿಧಿಯನ್ನು ಸಮರ್ಪಿಸುತ್ತಿರುವುದು ಅಭಿನಂದನೀಯ , ಈ ಗುರುಕುಲದ ವಿಶಿಷ್ಠ ಶಿಕ್ಷಣಕ್ಕೆ ಮಕ್ಕಳನ್ನು ಕಳುಹಿಸುತ್ತಿರುವ ಫೋಷಕರೂ ಅಭಿನಂದನಾರ್ಹರು ಎಂದು ಮಂಗಳೂರು  ಆಸರೆ ಚಾರಿಟೇಬಲ್ ಟ್ರಸ್ಟ್‌ನ ಅದ್ಯಕ್ಷೆ  ಡಾ| ಆಶಾಜ್ಯೋತಿ ರೈ ಮಾಲಾಡಿ ಹೇಳಿದ್ದಾರೆ.

ಅವರು  ಗುರುವಾರ ಸಂಜೆ ವಿಟ್ಲ ಸಮೀಪದ ಮೂರುಕಜೆಯ ಮೈತ್ರೆಯೀ ಗುರುಕುಲದಲ್ಲ್ಲಿ ಜರುಗಿದ “ಚೈತ್ರೋತ್ಸ”ದ ಸಭಾ ಕಾರ್ಯಕ್ರಮದಲ್ಲಿ ಅಧ್ಯಕ್ಷತೆ ವಹಿಸಿ ಮಾತನಾಡಿದರು. ನಮ್ಮಲ್ಲಿ ಸಹಜತೆಯ ಕೊರತೆ ಇದೆ,  ಸದಾ ನಮ್ಮಲ್ಲಿ ದ್ವಂದ್ವಗಳು ಕಾಡುತ್ತಿದೆ. ಸಂಸ್ಕೃತಿಯ ಬಗ್ಗೆ ಅರಿವಿದ್ದರೂ ವ್ಯವಹಾರಿಕವಾಗಿ ನಡವಳಿಕೆಯ ಬಗ್ಗೆ ವಿಷಾದವಿದೆ ಎಂದರು.

ಮುಖ್ಯ ಅತಿಥಿ ವಿಟ್ಲ ಜೇಸೀಸ್ ಆಂಗ್ಲ ಮಾದ್ಯಮ ಶಾಲಾ ಉಪಪ್ರಾಂಶುಪಾಲೆ ಶಾಲಿನಿ ಆರ್  ನೋಂಡಾ  ಪಡಾರುಗುತ್ತು ಮಾತನಾಡಿ ಸಮಾಜದಲ್ಲಿ ಬೆಳೆಯುತ್ತಿರುವ ಕೆಟ್ಟ ಪ್ರವೃತ್ತಿಯನ್ನು  ಮಹಿಳೆಯರು ಸಾಮೂಹಿಕವಾಗಿ ನಿರ್ಮೂಲನೆಗೊಳಿಸಬೇಕು.  ಮಹಾತ್ಮಾಗಾಂಧೀಜಿ. ಸ್ವಾಮೀ ವಿವೇಕಾನಂದರಂತೆ ಅನೇಕ ಮಹಾನು ಭಾವರು ಸಮಾಜದ ಶುದ್ದೀಕರಣಕ್ಕೆ ಪ್ರಯತ್ನಿಸಿದ್ದಾರೆ. ಸಾಂಸ್ಕೃತಿಕ ಮೌಲ್ಯಗಳ ಕೊರತೆಯ ಈ ಕಾಲಘಟ್ಟದಲ್ಲಿ ಮೈತ್ರೇಯೀ ಗುರುಕುಲದಲ್ಲಿ ಸಂಸ್ಕಾರವಂತರಾಗಿ ಬೆಳೆಯುತ್ತಿರುವ ಮಕ್ಕಳು ಸಮಾಜದ ಅಮೂಲ್ಯ ಆಸ್ತಿಯಾಗುವರು. ಈ ಗುರುಕುಲಕ್ಕೆ ಸಮಾಜದ ಸಹಕಾರ ಆಗತ್ಯವಿದೆ ಎಂದರು.

ವೇದಿಕೆಯಲ್ಲಿ ಅಜೇಯ ವಿಶ್ವಸ್ಥ ಮಂಡಳಿಯ ಸದಸ್ಯ ಎ. ಎಸ್. ಭಟ್ ಉಪಸ್ಥಿತರಿದ್ದರು. ಉಳಿದ ಸದಸ್ಯರಾದ  ಡಾ| ಕಮಲಾ.ಪ್ರ. ಭಟ್ ಕಲ್ಲಡ್ಕ, ಶ್ರೀ ರಾಮ ಭಟ್ ಪೆರ್ಲ, ವೆಂಕಟೇಶ್ವರ ಅಮೈ,  ಊರಿನ ಗಣ್ಯರು, ಮಕ್ಕಳ ಪಾಲಕರು ಉಪಸ್ಥಿತರಿದ್ದರು.

ವಿದ್ಯಾರ್ಥಿನಿ ಕು| ಗಾಯತ್ರಿ ಸ್ವಾಗತಿಸಿದರು. ಪ್ರಾಸ್ತಾವಿಸಿದ ಮಾತೃಶ್ರೀ ಅಮೃತವರ್ಷಿಣಿ ಭಾರತೀಯತೆಯ ಶಿಕ್ಷಣದೊಂದಿಗೆ ಗುರುಕುಲದಲ್ಲಿಕೊಡುವ ಶಿಕ್ಷಣದ ಬಗ್ಗೆ ವಿವರಿಸಿದರು. ತಾಯಿಯಾಗಿ ಮನೆ ಬೆಳಗಿಸುವ, ಮತ್ತು ಸಮಾಜ ಸೇವಕಿಯಾಗಿ ಮಹಿಳೆಯರು ಬೆಳೆದು ಬರುವಂತೆ ಶಿಕ್ಷಣ ಕೊಡಲಾಗುವುದು ಎಂದರು.  ಮಾತೃಶ್ರೀ ಪದ್ಮಾ ಕಲಾವಿದರನ್ನು ಪರಿಚಯಿಸಿದರು. ಮಾತೃಶ್ರೀ ಶ್ರೀಮತಿ ಭಟ್ ವಂದಿಸಿದರು. ಕು| ಸಾಯಿ ಶ್ರೀ ಪದ್ಮಾ ಕಾರ್ಯಕ್ರಮ ನಿರ್ವಹಿಸಿದರು.

ಮಕ್ಕಳ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ  ವೇದ, ಯೋಗ , ವಿಜ್ಞಾನ, ಕೃಷಿ ಮತ್ತು ಕಲಾ ಕೌಶಲಕ್ಕೆ ಸಂಬಂದಿಸಿದ (ಪಂಚಮುಖೀ ಶಿಕ್ಷಣ) ಶಿಕ್ಷಣ ದರ್ಶನ ಪ್ರದರ್ಶನಗೊಂಡಿತು.  ವಿದ್ಯಾರ್ಥಿನಿಯರ ವೇದ ಮಂತ್ರದೊಂದಿಗೆ ಆರಂಭಗೊಂಡ ಕಾರ್ಯಕ್ರಮ ವೈದಿಕ ರಾಷ್ಟ್ರ ಗೀತೆಯೊಂದಿಗೆ ಕಾರ್ಯಕ್ರಮ ಮುಕ್ತಾಯಗೊಂಡಿತು.