ವಿಶ್ವಪ್ರಭಾ ರಂಗಮಂದಿರದ ಉದ್ಘಾಟನೆ

ಉಡುಪಿ : ಮಣಿಪಾಲ ಅಕ್ಯಾಡೆಮಿಯ ಅಂಗಸಂಸ್ಥೆ ಉಡುಪಿ ಬೈಲೂರಿನ ವಾಸುದೇವಕೃಪಾ ಆಂಗ್ಲಮಾಧ್ಯಮ ಶಾಲೆಯಲ್ಲಿ ನೂತನವಾಗಿ ನಿರ್ಮಿಸಿದ ‘ವಿಶ್ವಪ್ರಭಾ’ ರಂಗಮಂದಿರದ ಉದ್ಘಾಟನಾ ಸಮಾರಂಭ ಹಾಗೂ ವಾರ್ಷಿಕ ಕ್ರೀಡೋತ್ಸವವು ಶಾಲಾ ಸಂಚಾಲಕ ಶ್ರೀ ಕೆ ಅಣ್ಣಪ್ಪ ಶೆಣೈಯವರ ಅಧ್ಯಕ್ಷತೆಯಲ್ಲಿ ಜರಗಿತು. ವೇದಿಕೆಯಲ್ಲಿ ಟಿ. ಎಮ್.ಎ.ಪೈ ಪ್ರತಿಷ್ಠಾನದ ಅಧ್ಯಕ್ಷ ಟಿ ಅಶೋಕ್ ಎಮ್. ಪೈ., ಉದ್ಯಮಿ- ಹೊಟೆಲ್ ಶ್ರೀ ರಾಮಭವನದ ಮಾಲಕ ವಿಶ್ವನಾಥ ಶೆಣೈ ಹಾಗೂ ಶ್ರೀಮತಿ ಪ್ರಭಾ ವಿ ಶೆಣೈ ದಂಪತಿ, ರಕ್ಷಕ ಶಿಕ್ಷಕ ಸಂಘದ ಅಧ್ಯಕ್ಷೆ ಶ್ರೀಮತಿ ಪ್ರಿಯಾ ಎ ನಾಯಕ್, ಸಮನ್ವಯಾಧಿಕಾರಿ ಶ್ರೀಮತಿ ಯು.ಕಲ್ಯಾಣಿ ಪೈ, ಮುಖ್ಯೋಪಾಧ್ಯಾಯಿನಿ ಶ್ರೀಮತಿ ಅಮಿತಾಂಜಲಿ ಕೆ ಉಪಸ್ಥಿತರಿದ್ದರು.

ಶ್ರೀ. ಟಿ .ಅಶೋಕ್ ಪೈಯವರು ರಿಬ್ಬನ್ ಕತ್ತರಿಸಿ ಸಾಂಪ್ರದಾಯಿಕವಾಗಿ ದೀಪ ಬೆಳಗಿಸಿ ನೂತನ ಸಭಾಂಗಣವನ್ನು ಉದ್ಘಾಟಿಸಿ ಶಾಲೆಗೆ ಶುಭ ಹಾರೈಸಿದರು. ವಿಶ್ವನಾಥ ಶೆಣೈಯವರು ಮಾತಾಡುತ್ತಾ ಶಾಲೆ ಇನ್ನು ಮುಂದಕ್ಕೂ ಉತ್ತಮ ವಿದ್ಯೆ ನೀಡುವಲ್ಲಿ ಯಶಸ್ವಿ ಹೊಂದಲಿ, ಇಲ್ಲಿ ಕಲಿತ ಮಕ್ಕಳು ಉನ್ನತ ಹುದ್ದೆಗೆ ಸೇರಿ ಶಾಲೆಯ ಕೀರ್ತಿಯನ್ನು ಅಜರಾಮರಗೊಳಿಸಲಿ ಎಂದು ಅಭಿಪ್ರಾಯ ಪಟ್ಟರು. ಅಧ್ಯಕ್ಷ ಸ್ಥಾನದಿಂದ ಶ್ರೀ ಕೆ ಅಣ್ಣಪ್ಪ ಶೆಣೈಯವರು ” ಈ ಸಭಾಂಗಣದ ನಿರ್ಮಾಣಕ್ಕಾಗಿ ಹಲವಾರು ದಾನಿಗಳು ಶಾಲೆಯೊಂದಿಗೆ ಕೈ ಜೋಡಿಸಿದ್ದಾರೆ.

ಎಲ್ಲರಿಗೂ ವಂದನೆಗಳನ್ನು ತಿಳಿಸುತ್ತಾ ಪ್ರಮುಖ ದಾನಿ ಶ್ರೀ ವಿಶ್ವನಾಥ ಶೆಣೈಯವರ ಉದಾರ ದೇಣಿಗೆಯನ್ನು ಸ್ಮರಿಸಿ ಈ ದಂಪತಿಗಳ ಹೆಸರಲ್ಲಿ ‘ವಿಶ್ವಪ್ರಭಾ’ ಎಂದು ಹೆಸರಿಸಲಾಗಿದೆ, ಅವರ ಶುದ್ಧ,ನಿಷ್ಕಳಂಕ ಮನಸ್ಸಿನಂತೆ ಈ ಸಭಾಂಗಣದಲ್ಲಿ ಯಾವುದೇ ಕಾರ್ಯಕ್ರಮ ಜರಗಿದರೂ ಶುದ್ಧವಾಗಿ ಜರಗಿ ಜಯಪ್ರದವಾಗಲಿ” ಎಂದು ಪ್ರತಿಕ್ರಿಯಿಸಿದರು.

ಶ್ರೀಮತಿ ದಿವ್ಯಾ ಕುಡ್ವಾ ಹಾಗೂ ಶ್ರಿಮತಿ ರೋಹಿಣಿ ಜಂಟಿಯಾಗಿ ಸಂಯೋಜಿಸಿದ ಈ ಕಾರ್ಯಕ್ರಮದಲ್ಲಿ ಶ್ರೀಮತಿ ಪಾರ್ವತಿ ಪ್ರಭಾ ಸಾಗತಿಸಿದರು. ಬಳಿಕ ಶಾಲಾ ವಾರ್ಷಿಕ ಕ್ರೀಡೋತ್ಸವವು ದೈಹಿಕ ಶಿಕ್ಷಕ ಶ್ರೀ ಕಿಶೋರ್ ರಾಜ್ ಅವರ ಉಸ್ತುವಾರಿಯಲ್ಲಿ ಅದ್ದೂರಿಯಾಗಿ ಜರಗಿತು. ಎಲ್ಲಾ ಮಕ್ಕಳು, ಶಿಕ್ಷಕರು, ಪೋಷಕರು ಹಾಗೂ ಹಿತೈಷಿಗಳು ಅಧಿಕ ಸಂಖ್ಯೆಯಲ್ಲಿ ಭಾಗವಹಿಸಿ ಸಮಾರಂಭದ ಯಶಸ್ಸಿಗೆ ಕಾರಣರಾದರು, ಶ್ರೀಮತಿ ಅಮಿತಾಂಜಲಿ ಧನ್ಯವಾದ ಸಮರ್ಪಿಸಿದರು.