370 ನೇ ವಿಧಿ‌ ರದ್ಧತಿಗೆ 6 ವರ್ಷ: ಪರಿವರ್ತನೆಯ ಹಾದಿಯಲ್ಲಿದೆ ಜಮ್ಮು-ಕಾಶ್ಮೀರ

ಶ್ರೀನಗರ: 370 ನೇ ವಿಧಿಯನ್ನು ರದ್ದುಪಡಿಸಿ ಜಮ್ಮು ಮತ್ತು ಕಾಶ್ಮೀರವನ್ನು ಎರಡು ಕೇಂದ್ರಾಡಳಿತ ಪ್ರದೇಶಗಳಾಗಿ ವಿಂಗಡಿಸಿದ ಮಹತ್ವದ ದಿನಕ್ಕೆ ಇಂದಿಗೆ ಆರು ವರ್ಷಗಳು ಸಂದಿವೆ. ಪ್ರಸ್ತುತ ಕಣಿವೆ ರಾಜ್ಯ ಪರಿವರ್ತನೆಯ  ಒಡ್ಡ ಹಾದಿಯಲ್ಲಿದೆ. ಉಗ್ರಗಾಮಿತ್ವ ಮತ್ತು ಪ್ರತ್ಯೇಕತಾವಾದಿ ಚಟುವಟಿಕೆಗಳು ಗಮನಾರ್ಹವಾಗಿ ಕಡಿಮೆಯಾಗಿವೆ ಮತ್ತು ಭಾರತದ ಉಳಿದ ಭಾಗಗಳೊಂದಿಗೆ ಕಣಿವೆಯ ರೈಲು ಸಂಪರ್ಕ ಸೇರಿದಂತೆ ಅಭಿವೃದ್ಧಿ ಯೋಜನೆಗಳು ವೇಗವನ್ನು ಪಡೆಯುತ್ತಿವೆ.

ಈ ನಡುವೆಯೇ ಜಮ್ಮು-ಕಾಶ್ಮೀರದ ರಾಜ್ಯ ಸ್ಥಾನಮಾನವನ್ನು ಪುನಃಸ್ಥಾಪನೆ ಮಾಡಬೇಕೆಂದಯ ನಿರಂತರ ಬೇಡಿಕೆ ಕೇಳಿಬರುತ್ತಿದ್ದು, ಈ ವಿಷಯದ ಬಗ್ಗೆ ರಾಜಕೀಯ ಭಿನ್ನಾಭಿಪ್ರಾಯಗಳು ಕೂಡ ವ್ಯಕ್ತವಾಗುತ್ತಲೇ ಇದೆ.

ಈ ನಡುವೆ ಕೇಂದ್ರವು ಜಮ್ಮು ಮತ್ತು ಕಾಶ್ಮೀರಕ್ಕೆ ಭಾಗಶಃ ರಾಜ್ಯ ಸ್ಥಾನಮಾನವನ್ನು ಪುನಃಸ್ಥಾಪಿಸಬಹುದು ಅಥವಾ ಜಮ್ಮುವನ್ನು ಕಾಶ್ಮೀರದಿಂದ ವಿಭಜಿಸಬಹುದು ಮತ್ತು ಜಮ್ಮುವಿಗೆ ರಾಜ್ಯ ಸ್ಥಾನಮಾನವನ್ನು ನೀಡಬಹುದು ಮತ್ತು ಕಾಶ್ಮೀರವನ್ನು ಕೇಂದ್ರಾಡಳಿತ ಪ್ರದೇಶವಾಗಿ ತನ್ನ ನಿಯಂತ್ರಣದಲ್ಲಿಡಬಹುದು ಎಂಬ ವದಂತಿಗಳಿವೆ.

370 ನೇ ವಿಧಿಯನ್ನು ರದ್ದುಪಡಿಸಿದ ನಂತರ, ಕಾಶ್ಮೀರದಲ್ಲಿ ಅಶಾಂತಿ ಗಮನಾರ್ಹವಾಗಿ ಕಡಿಮೆಯಾಗಿದೆ. ಆಗಸ್ಟ್ 5, 2019 ರ ಮೊದಲು ದಿನನಿತ್ಯದ ಘಟನೆಯಾಗಿದ್ದ ಕಲ್ಲು ತೂರಾಟದ ಘಟನೆಗಳು ಕೊನೆಗೊಂಡಿವೆ. ಉಗ್ರಗಾಮಿತ್ವಕ್ಕೆ ಸಂಬಂಧಿಸಿದ ಹಿಂಸಾಚಾರ ಗಮನಾರ್ಹವಾಗಿ ಕಡಿಮೆಯಾಗಿದೆ ಮತ್ತು ಪ್ರತ್ಯೇಕತಾವಾದಿಗಳು ಮತ್ತು ಉಗ್ರಗಾಮಿ ಗುಂಪುಗಳಿಂದ ಬಂದ್‌ಗೆ ಕರೆಗಳು ಕಣ್ಮರೆಯಾಗಿವೆ.

ಪ್ರತ್ಯೇಕತಾವಾದಿ ರಾಜಕೀಯವು ಹಿಂದೆ ಸರಿದಿದ್ದು, ಮಸ್ರತ್ ಆಲಂ, ಯಾಸಿನ್ ಮಲಿಕ್, ಶಬೀರ್ ಶಾ, ನಯೀಮ್ ಖಾನ್, ಆಸಿಯಾ ಅಂದ್ರಾಬಿ ಸೇರಿದಂತೆ ಪ್ರಮುಖ ಪ್ರತ್ಯೇಕತಾವಾದಿ ನಾಯಕರನ್ನು ದೇಶ ವಿರೋಧಿ ಚಟುವಟಿಕೆಗಳಿಗೆ ಸಂಬಂಧಿಸಿದ ಆರೋಪದ ಮೇಲೆ ತಿಹಾರ್ ಜೈಲಿನಲ್ಲಿ ಇರಿಸಲಾಗಿದೆ. ಒಂದು ಕಾಲದಲ್ಲಿ ಕಾರ್ಯನಿರತವಾಗಿದ್ದ ರಾಜ್‌ಬಾಗ್‌ನಲ್ಲಿರುವ ಹುರಿಯತ್ ಕಾನ್ಫರೆನ್ಸ್ ಪ್ರಧಾನ ಕಚೇರಿಯನ್ನು 2019 ರಿಂದ ಮುಚ್ಚಲಾಗಿದೆ ಮತ್ತು ಅದರ ಘಟಕಗಳನ್ನು ಕಾನೂನುಬಾಹಿರ ಚಟುವಟಿಕೆಗಳು (ತಡೆಗಟ್ಟುವಿಕೆ) ಕಾಯ್ದೆ (ಯುಎಪಿಎ) ಅಡಿಯಲ್ಲಿ ನಿಷೇಧಿಸಲಾಗಿದೆ.