“ಪಾಕಿಸ್ಥಾನ ಸೇರಿದಂತೆ ಉಗ್ರರು ಎಲ್ಲೇ ಇದ್ದರೂ ಅವರನ್ನು ಬೇಟೆಯಾಡಲಾಗುತ್ತದೆ”- ಜೈಶಂಕರ್

ನವದೆಹಲಿ: ಪಾಕಿಸ್ಥಾನದೊಂದಿಗಿನ ನಿಕಟ ಸಂಬಂಧ ಹೊಂದಿರುವ ಚೀನ ಭಯೋತ್ಪಾದನೆಯನ್ನು ಎದುರಿಸುವಲ್ಲಿ ಅಸ್ಪಷ್ಟತೆ ಅಥವಾ ದ್ವಿಮುಖ ನೀತಿಗಳನ್ನು ಹೊಂದಬಾರದು. ಭಯೋತ್ಪಾದನೆ ಎಲ್ಲರಿಗೂ ಸಂಬಂಧಿಸಿದ ಸಮಸ್ಯೆಯಾಗಿದೆ ಎಂದು ವಿದೇಶಾಂಗ ಸಚಿವ ಡಾ. ಎಸ್. ಜೈಶಂಕರ್ ಹೇಳಿದ್ದಾರೆ.

ತಮ್ಮ ಭೇಟಿಯ ಸಮಯದಲ್ಲಿ ಫ್ರೆಂಚ್ ಪತ್ರಿಕೆಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ, ಡಾ. ಜೈಶಂಕರ್ ಭಾರತ ಮತ್ತು ಚೀನಾ ತಮ್ಮ ಸಂಬಂಧವನ್ನು ಹಂತ ಹಂತವಾಗಿ ಸುಧಾರಿಸಬಹುದು ಮತ್ತು ಕೋವಿಡ್ ಸಾಂಕ್ರಾಮಿಕ ರೋಗದಿಂದ ಸ್ಥಗಿತಗೊಂಡಿರುವ ನೇರ ವಿಮಾನಗಳ ಪುನರಾರಂಭಿಸುವ ಚರ್ಚೆ ನಡೆಸಬಹುದು ಎಂದಿದ್ದಾರೆ.

ಭಾರತದ ಸಂಘರ್ಷ ಭಯೋತ್ಪಾದನೆಯ ವಿರುದ್ಧವೇ ಹೊರತು ಯಾವುದೇ ನಿರ್ದಿಷ್ಟ ದೇಶದೊಂದಿಗೆ ಅಲ್ಲ ಎಂದ ಅವರು, ಪಾಕಿಸ್ಥಾನ ಭಯೋತ್ಪಾದಕರಿಗೆ ಆಶ್ರಯ ಮತ್ತು ಬೆಂಬಲ ನೀಡುವುದನ್ನು ಮುಂದುವರಿಸುತ್ತಿರುವಾಗ ಭಾರತ ಭಯೋತ್ಪಾದನೆಯ ವಿರುದ್ಧ ಶೂನ್ಯ ಸಹಿಷ್ಣುತೆಯನ್ನು ಕಾಯ್ದುಕೊಳ್ಳುತ್ತದೆ. ಭಯೋತ್ಪಾದಕರು ಭಾರತದ ಮೇಲೆ ದಾಳಿ ಮಾಡಿದರೆ, ಪಾಕಿಸ್ಥಾನ ಸೇರಿದಂತೆ ಅವರು ಎಲ್ಲಿದ್ದರೂ ಅವರನ್ನು ಬೇಟೆಯಾಡಲಾಗುತ್ತದೆ ಎಂದಿದ್ದಾರೆ.

ಇತರ ಭೌಗೋಳಿಕ-ರಾಜಕೀಯ ವಿಷಯಗಳ ಬಗ್ಗೆ ಚರ್ಚಿಸಿದ ಡಾ. ಜೈಶಂಕರ್, ರಷ್ಯಾ-ಉಕ್ರೇನ್ ಸಂಘರ್ಷವನ್ನು ಸ್ಥಗಿತಗೊಳಿಸುವ ಕರೆಯೊಂದಿಗೆ ಭಾರತವು ಜಾಗತಿಕ ದಕ್ಷಿಣದ ಮನಸ್ಥಿತಿಯನ್ನು ಪ್ರತಿನಿಧಿಸುತ್ತದೆ . ಮಾತುಕತೆಯ ಮೂಲಕ ಮಾತ್ರ ಶಾಂತಿಯನ್ನು ಸಾಧಿಸಬಹುದು ಎಂಬ ಕಾರಣಕ್ಕೆ ಭಾರತ ಮಾಸ್ಕೋ ಮತ್ತು ಕೈವ್ ಎರಡರೊಂದಿಗೂ ಮಾತುಕತೆ ನಡೆಸಿದೆ ಎಂದರು.

ಮುಂದಿನ ತಿಂಗಳು 9 ರಂದು ಸುಂಕ ಅಮಾನತು ಕೊನೆಗೊಳ್ಳುವ ಮೊದಲು ಅಮೆರಿಕದೊಂದಿಗೆ ವ್ಯಾಪಾರ ಒಪ್ಪಂದದ ಕುರಿತು ಒಪ್ಪಂದ ಮಾಡಿಕೊಳ್ಳುವ ಬಗ್ಗೆ ಅವರು ಆಶಾವಾದ ವ್ಯಕ್ತಪಡಿಸಿದರು. ಫ್ರಾನ್ಸ್‌ನೊಂದಿಗಿನ ಭಾರತದ ಬಲವಾದ ಸಂಬಂಧಗಳನ್ನು ದೃಢಪಡಿಸಿದ ಅವರು, ರಕ್ಷಣೆ, ಪರಮಾಣು ಶಕ್ತಿ, ಕೃತಕ ಬುದ್ಧಿಮತ್ತೆ, ಬಾಹ್ಯಾಕಾಶ ಮತ್ತು ಪರಿಸರದಲ್ಲಿ ಪಾಲುದಾರಿಕೆಗಳನ್ನು ಬಲಪಡಿಸುವ ಬಯಕೆಯನ್ನು ವ್ಯಕ್ತಪಡಿಸಿದರು.