ಮೋದಿ ಭಾರತಕ್ಕೆ ಮಾತ್ರವಲ್ಲ ಇಡೀ ಜಗತ್ತಿಗೆ ಉತ್ತಮ ನಾಯಕ: ಪಾಕ್‌ ಉದ್ಯಮಿ

ವಾಷಿಂಗ್ಟನ್: ಪ್ರಧಾನಿ ನರೇಂದ್ರ ಮೋದಿ ಅವರು ಭಾರತವನ್ನು ಹೊಸ ಎತ್ತರಕ್ಕೆ ಕೊಂಡೊಯ್ದ ಪ್ರಬಲ ನಾಯಕರಾಗಿದ್ದು, ಅವರು ಮೂರನೇ ಅವಧಿಗೆ ದೇಶದ ಪ್ರಧಾನಿಯಾಗಿ ಮರಳಲಿದ್ದಾರೆ ಎಂದು ಪಾಕಿಸ್ತಾನಿ-ಅಮೆರಿಕನ್ ಖ್ಯಾತ ಉದ್ಯಮಿಯೊಬ್ಬರು ಹೇಳಿದ್ದಾರೆ.

ಬಾಲ್ಟಿಮೋರ್ ಮೂಲದ ಪಾಕಿಸ್ತಾನಿ ಅಮೆರಿಕನ್ ಉದ್ಯಮಿ ಸಾಜಿದ್ ತರಾರ್, ಪ್ರಧಾನಿ ಮೋದಿ ಭಾರತಕ್ಕೆ ಮಾತ್ರವಲ್ಲ, ಪ್ರದೇಶ ಮತ್ತು ಜಗತ್ತಿಗೆ ಒಳ್ಳೆಯ ವ್ಯಕ್ತಿ ಮತ್ತು ಪಾಕಿಸ್ತಾನಕ್ಕೂ ಅವರಂತಹ ನಾಯಕ ಸಿಗಲಿ ಎಂದು ಆಶಿಸಿದ್ದಾರೆ.

“ಮೋದಿ ಅವರು ಗಮನಾರ್ಹ ನಾಯಕ. ಅವರು ಸಹಜ ನಾಯಕ. ಪ್ರತಿಕೂಲ ಸಂದರ್ಭಗಳಲ್ಲಿ ಪಾಕಿಸ್ತಾನಕ್ಕೆ ಭೇಟಿ ನೀಡಿದ ಮತ್ತು ತಮ್ಮ ರಾಜಕೀಯ ಬಂಡವಾಳವನ್ನು ಪಣಕ್ಕಿಟ್ಟ ಏಕೈಕ ಪ್ರಧಾನಿ ಅವರು. ಮೋದಿ ಜಿ ಪಾಕಿಸ್ತಾನದೊಂದಿಗೆ ಮಾತುಕತೆ ಮತ್ತು ವ್ಯಾಪಾರವನ್ನು ಪ್ರಾರಂಭಿಸುತ್ತಾರೆ ಎಂದು ನಾನು ನಿರೀಕ್ಷಿಸುತ್ತೇನೆ” ಎಂದು ತರಾರ್ ಸುದ್ದಿ ಸಂಸ್ಥೆ ಪಿಟಿಐಗೆ ತಿಳಿಸಿದರು.

“ಶಾಂತಿಯುತ ಪಾಕಿಸ್ತಾನವು ಭಾರತಕ್ಕೂ ಒಳ್ಳೆಯದು, ಮೋದಿ ಜಿ ಭಾರತದ ಮುಂದಿನ ಪ್ರಧಾನಿ ಎಂದು ಎಲ್ಲೆಡೆ ಬರೆಯಲಾಗಿದೆ” ಎಂದು ಪ್ರಶ್ನೆಯೊಂದಕ್ಕೆ ತರಾರ್ ಪ್ರತಿಕ್ರಿಯಿಸಿದರು.

ತರಾರ್ 1990 ರ ದಶಕದಲ್ಲಿ ಯುಎಸ್‌ಗೆ ತೆರಳಿ ದೊಡ್ಡ ಉದ್ಯಮಿಯಾಗಿ ರೂಪುಗೊಂಡಿದ್ದಾರೆ ಮತ್ತು ಆಡಳಿತಾರೂಢ ಪಾಕಿಸ್ತಾನಿ ಆಡಳಿತದೊಂದಿಗೆ ಉತ್ತಮ ಸಂಪರ್ಕವನ್ನು ಹೊಂದಿದ್ದಾರೆ.

“ಭಾರತದಲ್ಲಿ 97 ಕೋಟಿ ಜನರು ತಮ್ಮ ಹಕ್ಕುಗಳನ್ನು ಚಲಾಯಿಸುತ್ತಿರುವುದು ಪವಾಡವಲ್ಲದೆ ಬೇರೇನೂ ಅಲ್ಲ. ಭಾರತವು ಅತಿದೊಡ್ಡ ಮತ್ತು ಉತ್ತಮ ಪ್ರಜಾಪ್ರಭುತ್ವವಾಗಿದೆ. ಅಲ್ಲಿ ಮೋದಿ ಜಿಯವರ ಜನಪ್ರಿಯತೆಯನ್ನು ನಾನು ನೋಡುತ್ತಿದ್ದೇನೆ ಮತ್ತು 2024 ರಲ್ಲಿ ಭಾರತದ ಉದಯವು ಅದ್ಭುತವಾಗಿದೆ. ಇದು ಒಂದು ಯಶಸ್ಸಿನ ಕಥೆ. ಭಾರತೀಯ ಪ್ರಜಾಪ್ರಭುತ್ವದಿಂದ ಜನರು ಕಲಿಯುತ್ತಾರೆ ಎಂಬುದನ್ನು ನೀವು ಭವಿಷ್ಯದಲ್ಲಿ ನೋಡುತ್ತೀರಿ” ಎಂದು ತರಾರ್ ಹೇಳಿದ್ದಾರೆ.