ಸಿಖ್ಖರ ಹತ್ಯೆ: ಪಾಕಿಸ್ತಾನ ಹೈಕಮಿಷನ್‌ನ ಹಿರಿಯ ರಾಜತಾಂತ್ರಿಕರಿಗೆ ಭಾರತ ಸಮನ್ಸ್‌

ನವದೆಹಲಿ: ಭಾರತವು ನವದೆಹಲಿಯಲ್ಲಿರುವ ಪಾಕಿಸ್ತಾನ ಹೈಕಮಿಷನ್‌ನ ಹಿರಿಯ ರಾಜತಾಂತ್ರಿಕರಿಗೆ ಸಮನ್ಸ್‌ ಜಾರಿಗೊಳಿಸಿದೆ ಮತ್ತು ಪಾಕಿಸ್ತಾನದಲ್ಲಿ ಸಿಖ್ ಸಮುದಾಯದ ಸದಸ್ಯರ ಮೇಲೆ ಇತ್ತೀಚೆಗೆ ನಡೆದ ದಾಳಿಗಳ ವಿರುದ್ಧ ತೀವ್ರ ಪ್ರತಿಭಟನೆಯನ್ನು ದಾಖಲಿಸಿದೆ.

ಈ ವರ್ಷದ ಏಪ್ರಿಲ್-ಜೂನ್ ನಡುವೆ ಸಿಖ್‌ ಸಮುದಾಯದ ವಿರುದ್ಧ ದಾಳಿಯ ನಾಲ್ಕು ಘಟನೆಗಳು ನಡೆದಿದ್ದು, ಈ ಘಟನೆಗಳನ್ನು ಭಾರತ ಗಂಭೀರವಾಗಿ ಪರಿಗಣಿಸಿದೆ, ಸಿಖ್ ಸಮುದಾಯದ ಮೇಲಿನ ಈ ಹಿಂಸಾತ್ಮಕ ದಾಳಿಗಳನ್ನು ಪ್ರಾಮಾಣಿಕವಾಗಿ ತನಿಖೆ ಮಾಡಲು ಮತ್ತು ತನಿಖಾ ವರದಿಗಳನ್ನು ಹಂಚಿಕೊಳ್ಳಲು ಪಾಕಿಸ್ತಾನದ ಅಧಿಕಾರಿಗಳಿಗೆ ಭಾರತ ಒತ್ತಾಯಿಸಿದೆ. ಧಾರ್ಮಿಕ ಕಿರುಕುಳದ ನಿರಂತರ ಭಯದಲ್ಲಿ ಬದುಕುತ್ತಿರುವ ತನ್ನ ಅಲ್ಪಸಂಖ್ಯಾತರ ಸುರಕ್ಷತೆ ಮತ್ತು ಭದ್ರತೆಯನ್ನು ಪಾಕಿಸ್ತಾನ ಖಚಿತಪಡಿಸಿಕೊಳ್ಳಬೇಕು ಎಂದಿದೆ.

ಮಾರ್ಚ್ 31ರಂದು, ಪೇಶಾವರದ ಹೊರವಲಯದಲ್ಲಿ 35 ವರ್ಷದ ಸಿಖ್ ವ್ಯಾಪಾರಿಯನ್ನು ಅಂಗಡಿಯೊಳಗೆ ದುಷ್ಕರ್ಮಿಗಳು ಕೊಂದು ಹಾಕಿದ್ದರು. ಏಪ್ರಿಲ್‌ನಲ್ಲಿ,ಲಾಹೋರ್‌ನ ನವಾಬ್ ಟೌನ್ ನೆರೆಹೊರೆಯಲ್ಲಿ ಬೆಳಗಿನ ನಡಿಗೆಯಲ್ಲಿದ್ದ 50 ವರ್ಷದ ಸಿಖ್ ವ್ಯಕ್ತಿಯನ್ನು ಮೋಟಾರ್‌ಸೈಕಲ್‌ನಲ್ಲಿ ಬಂದೂಕುಧಾರಿಗಳು ಗುಂಡಿಕ್ಕಿ ಕೊಂದರು. ಅದೇತಿಂಗಳಲ್ಲಿ ಪೇಶಾವರದಲ್ಲಿ ಮತ್ತಿಬ್ಬರು ಸಿಖ್ ಪುರುಷರನ್ನು ಗುಂಡಿಕ್ಕಿ ಕೊಲ್ಲಲಾಯಿತು.

ಪಾಕಿಸ್ತಾನದ ಮಾನವ ಹಕ್ಕುಗಳ ಆಯೋಗವು ಘಟನೆಯ ಬಗ್ಗೆ “ತ್ವರಿತ ತನಿಖೆ” ಯನ್ನು ನಡೆಸುವಂತೆ ಸರ್ಕಾರವನ್ನು ಒತ್ತಾಯಿಸಿದೆ.

ಪಾಕಿಸ್ತಾನದ ಪ್ರಧಾನಿ ಶೆಹಬಾಜ್ ಷರೀಫ್ ಘಟನೆಗೆ ಪಾಕಿಸ್ತಾನದ ಶತ್ರುಗಳು ಹೊಣೆಗಾರರಾಗಿದ್ದಾರೆ ಮತ್ತು ಭೂಮಿಯಿಂದ ಅವರನ್ನು ನಿರ್ಮೂಲನೆ ಮಾಡುವುದಾಗಿ ಪ್ರತಿಜ್ಞೆ ಮಾಡಿದ್ದಾರೆ ಎಂದು ಡಾನ್ ಪತ್ರಿಕೆ ವರದಿ ಮಾಡಿದೆ.