ಪಾಲ್ತಾಡು: ಮೊಸರು ಕುಡಿಕೆ ಕಾರ್ಯಕ್ರಮ

ಪಾಲ್ತಾಡಿ : ಯುವಜನತೆ ದೇಶದ ಶಕ್ತಿ,ಸದೃಡ ರಾಷ್ಟ್ರ ನಿರ್ಮಾಣದಲ್ಲಿ ಯುವಜನರ ಪಾತ್ರ ಮಹತ್ವದ್ದು, ಯುವಜನತೆ ಸಂಘಟನೆಯ ಮೂಲಕ ಸಾಮಾಜಿಕ ಕಾರ್ಯಗಳನ್ನು ಹಮ್ಮಿಕೊಳ್ಳುವ ಮೂಲಕ ಮಾದರಿಯಾಗಬೇಕು ಎಂದು ದ.ಕ.ಜಿಲ್ಲಾ ಯುವಜನ ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಸುರೇಶ್ ರೈ ಸೂಡಿಮುಳ್ಳು ಹೇಳಿದರು.

ಅವರು ಪಾಲ್ತಾಡು ಶ್ರೀವಿಷ್ಣು ಮಿತ್ರ ವೃಂದ ವತಿಯಿಂದ ಶ್ರೀಕೃಷ್ಣ ಜನ್ಮಾಷ್ಟಮಿಯಂಗವಾಗಿ ತಾರಿಪಡ್ಪುನಲ್ಲಿ ನಡೆದ ೪ ನೇ ವರ್ಷದ ಮೊಸರು ಕುಡಿಕೆ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದರು.ಯುವ ಸಂಘಟನೆಗಳು ಕ್ರೀಡಾಕೂಟ,ಸಾಧಕರನ್ನು ಗೌರವಿಸುವ ಮೂಲಕ ಸೌಹಾರ್ಧತಯುತವಾಗಿ ರಚನಾತ್ಮಕ ಕಾರ್ಯಮಾಡುವ ಮೂಲಕ ಇತರರಿಗೆ ಮಾದರಿಯಾಗಿವೆ .ಶ್ರೀ ಕೃಷ್ಣ ಪರಮಾತ್ಮನ ಜೀವನವೇ ಮಾನವ ಕುಲಕ್ಕೆ ದಾರಿದೀಪ. ಜಗತ್ತಿಗೆ ಭಗವದ್ಗೀತೆಯ ಸಂದೇಶ ಸಾರಿದ ಕೃಷ್ಣ ವಿಶ್ವವಂದ್ಯನಾಗಿದ್ದಾನೆ ಎಂದರು.ಸವಣೂರು ಗ್ರಾ.ಪಂ.ಅಧ್ಯಕ್ಷೆ ಬಿ.ಕೆ.ಇಂದಿರಾ ಕಲ್ಲೂರಾಯ ಮಾತನಾಡಿ ದಾರಿ ತಪ್ಪುತ್ತಿರುವ ,ತಪ್ಪಿಸುತ್ತಿರುವವರನ್ನು ಸರಿದಾರಿಗೆ ಕೊಂಡೊಯ್ಯಲು ಶ್ರೀಕೃಷ್ಣನ ಬದುಕು ಪ್ರೇರಣೆಯಾಗಲಿ ಎಂದರು.

ಬೆಳ್ಳಾರೆ ಜ್ಞಾನದೀಪ ಶಿಕ್ಷಣ ತರಬೇತಿ ಸಂಸ್ಥೆಯ ನಿರ್ದೆಶಕ ಉಮೇಶ್ ಮಣಿಕ್ಕಾರ ಮಾತನಾಡಿ,ಯುವ ಸಂಘಟನೆಗಳು ಸಾಮಾಜಿಕವಾಗಿ ಹೆಚ್ಚು ಹೆಚ್ಚು ತೊಡಗಿಸಿಕೊಳ್ಳಬೇಕು.ಆ ಮೂಲಕ ಸಮಾಜದಲ್ಲಿ ಪರಿಣಾಮಕಾರಿ ಬದಲಾವಣೆಗೆ ನಾಂದಿಯಾಗಬೇಕು ಎಂದರು.ಅಧ್ಯಕ್ಷತೆ ವಹಿಸಿದ್ದ ಕೊಳ್ತಿಗೆ ಗ್ರಾ.ಪಂ.ಅಧ್ಯಕ್ಷೆ ಗಿರಿಜಾ ಧನಂಜಯ ಮಾತನಾಡಿ ,ಯುವಜನತೆ ಈಗ ಸಾಮಾಜಿಕ ತಾಣಗಳ ಮೂಲಕ ಹಾದಿತಪ್ಪುತ್ತಿರುವುದು ವಿಷಾದನೀಯ.ಯುವಜನತೆ ಸಾಮಾಜಿಕ ಚಟುವಟಿಕೆಗಳಲ್ಲಿ ಹೆಚ್ಚು ತೊಡಗಿಸಿಕೊಳ್ಳುವ ಮೂಲಕ ಸದೃಡ ರಾಷ್ಟ್ರ ನಿರ್ಮಾಣದ ರೂವಾರಿಗಳಾಗಬೇಕೆಂದರು.ವೇದಿಕೆಯಲ್ಲಿ ಶ್ರೀವಿಷ್ಣು ಮಿತ್ರವೃಂದದ ಅಧ್ಯಕ್ಷ ರಘುನಾಥ್ ಕೆ.ಉಪಸ್ಥಿತರಿದ್ದರು.ಇದೇ ಸಂದರ್ಭದಲ್ಲಿ ಪ್ರತಿಭಾನ್ವಿತ ವಿದ್ಯಾರ್ಥಿಗಳಾದ ಶಂಸೀರಾ ,ಡಿಶ್ವಿನಿ ಯವರನ್ನು ಪುರಸ್ಕರಿಸಲಾಯಿತು.

ಪುತ್ತೂರು ವಿಭಾಗ ಕೆಎಸ್‌ಆರ್‌ಟಿಸಿಯ ಅಪಘಾತ ರಹಿತ ಚಾಲಕ ಕುಂಞರಾಮ ಮಣಿಯಾಣಿ ,ಹಿರಿಯ ಅಂಚೆ ವಿತರಕ ಲಿಂಗಪ್ಪ ನಾಯ್ಕ ಅಮೆಚ್ಚೋಡು ರವರನ್ನು ಸಂಘದ ವತಿಯಿಂದ ಸಮ್ಮಾನಿಸಲಾಯಿತು. ವಿಕಲ ಚೇತನ ಮಲ್ಲ ಇವರಿಗೆ ಧನ ಸಹಾಯವನ್ನು ನೀಡಲಾಯಿತು.ಪ್ರವೀಣ್ ಚೆನ್ನಾವರ ಸ್ವಾಗತಿಸಿ ,ಶಿವಪ್ರಸಾದ್ ವಂದಿಸಿದರು.ಮನೀಶ್ ಕುಮಾರ್ ಸಮ್ಮಾನ ಪತ್ರ ವಾಚಿಸಿದರು. ದೇವಿಪ್ರಸಾದ್ ಕಾರ್ಯಕ್ರಮ ನಿರೂಪಿಸಿದರು.