ಕೊರೋನಾ ಮಣಿಸಲು ಕಳೆದ 1 ವರ್ಷದಲ್ಲಿ ಭಾರತ ಹಾದು ಬಂದ ಹೋರಾಟದ ಹಾದಿ

ಭಾರತದಲ್ಲಿ ಮೊದಲ ಕೊರೋನಾವೈರಸ್ ಪ್ರಕರಣ ದಾಖಲಾಗಿ ಇಂದಿಗೆ ಒಂದು ವರ್ಷ. 2020ರ ಜನವರಿ 30ರಂದು ಭಾರತದಲ್ಲಿ ಮೊದಲ ಪ್ರಕರಣ ದಾಖಲಾಗಿತ್ತು. ಅಲ್ಲಿಂದ ನಂತರ ಸಾಂಕ್ರಾಮಿಕದಿಂದ ಜನರನ್ನು ರಕ್ಷಣೆ ಮಾಡಲು ಭಾರತ ದೊಡ್ಡ ಹೋರಾಟವನ್ನೇ ನಡೆಸಿದೆ. ತನ್ನ ಪ್ರಯೋಗಾಲಯಗಳನ್ನು ಭಾರತ ಹೆಚ್ಚಿಸಿದ ಪರಿ, ತಾತ್ಕಾಲಿಕ ಮತ್ತು ಕೋವಿಡ್ ಮೀಸಲು ಆಸ್ಪತ್ರೆಗಳನ್ನು ನಿರ್ಮಿಸಿದ ರೀತಿ ನಿಜಕ್ಕೂ ಅಚ್ಚರಿಯೇ ಸರಿ. ಇಷ್ಟು ದೊಡ್ಡ ಜನಸಂಖ್ಯೆಯನ್ನು ಹೊಂದಿರುವ ಭಾರತ ಕೊರೋನಾವನ್ನು ಹತೋಟಿಗೆ ತೆಗೆದುಕೊಂಡು ಜಯಶಾಲಿಯಾಗುತ್ತದೆ ಎಂದು ಊಹೆ ಮಾಡಿದವರೇ ಕಡಿಮೆ. ಆದರೆ ಭಾರತ ತನ್ನ ಮೇಲಿನ ನಂಬಿಕೆಯನ್ನು ಕಳೆದುಕೊಳ್ಳಲಿಲ್ಲ. ವಿಜ್ಞಾನಿಗಳು, ಪೊಲೀಸರು, ವೈದ್ಯರು, ದಾದಿಯರು, ಆರೋಗ್ಯ ಕಾರ್ಯಕರ್ತರ ಪರಿಶ್ರಮದ ಫಲವಾಗಿ ಭಾರತ ಕೊರೋನಾವನ್ನು ಇಂದು ಮಣಿಸುವಲ್ಲಿ ಬಹುತೇಕ ಯಶಸ್ವಿಯಾಗಿದೆ. ಈ ಸಾಂಕ್ರಾಮಿಕ ಭಾರತದ ಆರ್ಥಿಕತೆಗೆ ಸಾಕಷ್ಟು ಹಾನಿ ಉಂಟು ಮಾಡಿದೆ ಎಂಬುದು ನಿಜ, ಆದರೆ ಈ ಕಠಿಣ ಸಂದರ್ಭದಲ್ಲೂ ಭಾರತಕ್ಕೆ ತನ್ನೊಳಗಿನ ಅಗಾದ ಸಾಮರ್ಥ್ಯವನ್ನು ಜಗತ್ತಿಗೆ ತೋರಿಸಲು ಸಾಧ್ಯವಾಗಿದೆ.

ಕಳೆದ 12 ತಿಂಗಳಲ್ಲಿ ಭಾರತದಲ್ಲಿ ಕೊರೋನಾವೈರಸ್ ಬೆಳವಣಿಗೆ ಮತ್ತು ಅವನತಿಯ ವಿವರ ಇಲ್ಲಿದೆ.

ಜನವರಿ-ಫೆಬ್ರವರಿ 2020: 2020 ರ ಜನವರಿ 30 ರಂದು ಭಾರತದಲ್ಲಿ ಮೊದಲ ಬಾರಿಗೆ ಕೇರಳದಲ್ಲಿ ಕೊರೋನಾವೈರಸ್ ಪ್ರಕರಣ ದಾಖಲಾಗಿತ್ತು. ಫೆಬ್ರವರಿಯಲ್ಲಿ ವುಹಾನ್‌ನಿಂದ ಹಿಂದಿರುಗಿದ ಕೆಲವು ವಿದ್ಯಾರ್ಥಿಗಳ ವರದಿ ಪಾಸಿಟಿವ್ ಬಂದಿತ್ತು‌, ಆದರೆ ಸೋಂಕು ಎರಡು ಅಂಕೆಗಳನ್ನು ತಲುಪಲಿಲ್ಲ.

ಮಾರ್ಚ್ 2020: ಮಾರ್ಚ್ 4 ರಂದು, ಭಾರತದಲ್ಲಿ 22 ಪ್ರಕರಣಗಳು ದಾಖಲಾದವು, ಅದರಲ್ಲಿ 14 ಪ್ರಕರಣಗಳು ಇಟಲಿಯಿಂದ ಬಂದ ಪ್ರವಾಸಿಗರದ್ದಾಗಿತ್ತು. ಮಾರ್ಚ್ 12 ರಂದು, ಕೊರೋನಾವೈರಸ್‌ನಿಂದ ಮೊದಲ ಸಾವು ದೇಶದಲ್ಲಿ ದಾಖಲಾಯಿತು. ಮಾರ್ಚ್ ಮಧ್ಯದಲ್ಲಿ ದೆಹಲಿಯಲ್ಲಿ ನಡೆದ ಅತಿದೊಡ್ಡ ಸೂಪರ್ ಸ್ಪ್ರೆಡರ್ ಈವೆಂಟ್ ಎಂದು ತಬ್ಲಿಘಿ ಜಮಾತ್ ಅವರ ಘಟನೆಯನ್ನು ಪರಿಗಣಿಸಲಾಗುತ್ತಿದೆ. ಈ ಅವಧಿಯಲ್ಲಿ ಯುಪಿ, ಬಿಹಾರ, ಬಂಗಾಳದಂತಹ ರಾಜ್ಯಗಳಲ್ಲಿ ಸೋಂಕು ವೇಗವಾಗಿ ಹೆಚ್ಚಾಯಿತು. ಮಾರ್ಚ್ 25 ರಂದು ಲಾಕ್ ಡೌನ್ ಘೋಷಿಸಲಾಯಿತು. ಮಾರ್ಚ್ 31 ರ ಹೊತ್ತಿಗೆ 47 ಸಾವುಗಳು ಮತ್ತು 1403 ಜನರು ಸೋಂಕಿಗೆ ಒಳಗಾಗಿದ್ದರು.

ಏಪ್ರಿಲ್ 2020: ಮಾರ್ಚ್‌ಗೆ ಹೋಲಿಸಿದರೆ ಏಪ್ರಿಲ್‌ನಲ್ಲಿ ಪ್ರಕರಣಗಳ ಸಂಖ್ಯೆ ಸುಮಾರು 23 ಪಟ್ಟು ಹೆಚ್ಚಾಯಿತು. ಮಾಧ್ಯಮಗಳು ಹಂಚಿಕೊಂಡಿರುವ ಗ್ರಾಫ್ ಪ್ರಕಾರ, ಏಪ್ರಿಲ್ 14 ರಂದು ದೇಶದಲ್ಲಿ 1463 ಕ್ಕೂ ಹೆಚ್ಚು ಕೊರೋನಾವೈರಸ್ ಪ್ರಕರಣಗಳು ಕಂಡುಬಂದಿದ್ದವು, ಅವು ಏಪ್ರಿಲ್ 30 ರ ಹೊತ್ತಿಗೆ ಮತ್ತಷ್ಟು ಹೆಚ್ಚಾದವು. ಏಪ್ರಿಲ್ ಅಂತ್ಯದ ವೇಳೆಗೆ, ಒಟ್ಟು ಸಾವುಗಳು 1075 ಕ್ಕೆ ಏರಿದವು.

ಮೇ 2020: ಲಾಕ್‌ಡೌನ್ ಹೊರತಾಗಿಯೂ, ಪ್ರಕರಣಗಳ ಸಂಖ್ಯೆ ಹೆಚ್ಚುತ್ತಲೇ ಇತ್ತು ಮತ್ತು ಪ್ರತಿದಿನ ಸರಾಸರಿ 6-7 ಸಾವಿರ ಕೋವಿಡ್-19 ಪ್ರಕರಣಗಳು ವರದಿಯಾಗುತ್ತಿದ್ದವು. ಮೇ 5 ರಂದು ಮೊದಲ ಬಾರಿಗೆ 194 ಕ್ಕೂ ಹೆಚ್ಚು ರೋಗಿಗಳು ಸೋಂಕಿಗೆ ಬಲಿಯಾದರು. ಮೇ 19 ರಂದು, ಕೊರೋನಾವೈರಸ್‌ನ ಮೊದಲ ಪ್ರಕರಣದ 110 ದಿನಗಳ ನಂತರ, ರೋಗಿಗಳ ಸಂಖ್ಯೆ ಒಂದು ಲಕ್ಷವನ್ನು ದಾಟಿತು.

ಜೂನ್ 2020: ರಾಷ್ಟ್ರವ್ಯಾಪಿ ಲಾಕ್‌ಡೌನ್ ಅನ್ನು ಅನ್ಲಾಕ್ ಮಾಡುವುದಾಗಿ ಘೋಷಿಸಲಾಯಿತು ಮತ್ತು ಆರ್ಥಿಕ ಚಟುವಟಿಕೆ ವೇಗವಾಗಿ ಹೆಚ್ಚಾಗುತ್ತದೆ ಎಂದು ನಿರೀಕ್ಷಿಸಲಾಗಿತ್ತು. ಜೂನ್ 1 ರಂದು 8392 ಪ್ರಕರಣಗಳಿಂದ ಕೋವಿಡ್ -19  ಸಕ್ರಿಯ ಪ್ರಕರಣ ಜೂನ್ 30 ರಂದು 18,522 ಕ್ಕೆ ತೀವ್ರವಾಗಿ ಏರಿತು. ಸಾವಿನ ಸಂಖ್ಯೆಯೂ ಜೂನ್‌ನಲ್ಲಿ ಪ್ರತಿದಿನ 230 ರಿಂದ 418 ಕ್ಕೆ ಏರಿತು.

ಜುಲೈ 2020: ಮಳೆಗಾಲದ ಆರಂಭದೊಂದಿಗೆ, ಜುಲೈ 17 ರಂದು ದೇಶದ ಒಟ್ಟು ಪ್ರಕರಣಗಳು 1 ಮಿಲಿಯನ್ ದಾಟಿತು, ಇದರಲ್ಲಿ ಮಹಾರಾಷ್ಟ್ರದ 2.75 ಲಕ್ಷ ಮತ್ತು ದೆಹಲಿಯ 11.6 ಲಕ್ಷ ಪ್ರಕರಣಗಳು ಸೇರಿವೆ.

ಆಗಸ್ಟ್ 2020: ಆಗಸ್ಟ್‌ನಲ್ಲಿ ಭಾರತದಲ್ಲಿ 19 ಲಕ್ಷ 87 ಸಾವಿರ 705 ಪ್ರಕರಣಗಳು ಪತ್ತೆಯಾಗಿದ್ದು, 28,859 ಸಾವುಗಳು ವರದಿಯಾಗಿವೆ. ಆಗಸ್ಟ್ 1 ರಂದು, 54,735 ಪ್ರಕರಣಗಳು ದಾಖಲಾಗಿದ್ದರೆ, ಆಗಸ್ಟ್ 31 ರ ಹೊತ್ತಿಗೆ ಸುಮಾರು 78,761 ಪ್ರಕರಣಗಳು ದಾಖಲಾದವು. ಪ್ರತಿದಿನ ಸರಾಸರಿ 800–900 ಸಾವುಗಳು ದಾಖಲಾಗಿವೆ.

ಸೆಪ್ಟೆಂಬರ್ 2020: ದೈನಂದಿನ ಪ್ರಕರಣ 70 ಸಾವಿರದಿಂದ ಸುಮಾರು 1 ಲಕ್ಷಕ್ಕೆ ಏರಿದ್ದರಿಂದ ಸೆಪ್ಟೆಂಬರ್ ಅತ್ಯಂತ ಕೆಟ್ಟದಾಗಿತ್ತು. ಸೆಪ್ಟೆಂಬರ್ 17 ರಂದು ದಾಖಲೆಯ 97,984 ಪ್ರಕರಣಗಳು ವರದಿಯಾಗಿವೆ. ಸಾವಿನ ಸಂಖ್ಯೆಯೂ ಸುಮಾರು ಒಂದು ಲಕ್ಷ (97,497) ತಲುಪಿದೆ. ಸೆಪ್ಟೆಂಬರ್ 16 ರಂದು ಅತಿ ಹೆಚ್ಚು 1290 ಸಾವುಗಳು ದಾಖಲಾಗಿವೆ.

ಅಕ್ಟೋಬರ್ 2020: ಅಕ್ಟೋಬರ್ 3 ರಂದು ಭಾರತದಲ್ಲಿ ಒಟ್ಟು ಸಾವುಗಳು ಒಂದು ಲಕ್ಷ ದಾಟಿತು. ಆದರೆ ಅಕ್ಟೋಬರ್ 1 ರಂದು 1181 ಸಾವುಗಳ ನಂತರ, ಅಕ್ಟೋಬರ್ 31 ರಂದು ಸಾವಿನ ಸಂಖ್ಯೆ 551 ರಷ್ಟಾಗಿದೆ. ಹೊಸ ಪ್ರಕರಣಗಳು ಅಕ್ಟೋಬರ್ 31 ರಂದು 48 ಸಾವಿರಕ್ಕೆ ಇಳಿಯಿತು.

ನವೆಂಬರ್ 2020: ಸತತವಾಗಿ ಮೂರು ತಿಂಗಳವರೆಗೆ ಸುಮಾರು ಎರಡು ಮಿಲಿಯನ್ ಪ್ರಕರಣಗಳು ದಾಖಲಾದ ನಂತರ, ನವೆಂಬರ್‌ನಲ್ಲಿ ಸ್ವಲ್ಪ ಪರಿಸ್ಥಿತಿ ನಿರಾಳವಾಯಿತು. ಸರಾಸರಿ, ದೈನಂದಿನ ಪ್ರಕರಣಗಳು 45 ರಿಂದ 38 ಸಾವಿರಕ್ಕೆ ಇಳಿಯಿತು. ದೈನಂದಿನ ಸಾವಿನ ಸಂಖ್ಯೆ ಕೂಡ ಪ್ರತಿದಿನ 400-450ಕ್ಕೆ ಇಳಿಯಿತು.

ಡಿಸೆಂಬರ್ 2020: ಡಿಸೆಂಬರ್ 18 ರಂದು, ಕೊರೋನಾವೈರಸ್ ಪ್ರಕರಣಗಳ ಕುಸಿತದ ಮಧ್ಯೆ, ಒಟ್ಟು ಪ್ರಕರಣ ಒಂದು ಕೋಟಿಯನ್ನು ಮೀರಿದೆ. ಆಘಾತಕಾರಿ ಮಾಹಿತಿಯೆಂದರೆ, ಶೇಕಡಾ 50 ರಷ್ಟು ಪ್ರಕರಣಗಳು ದೇಶದ 47 ಜಿಲ್ಲೆಗಳಿಂದ ಮಾತ್ರ ವರದಿಯಾಗಿದೆ ಮತ್ತು ಒಟ್ಟು ಸಾವುಗಳಲ್ಲಿ 50 ಪ್ರತಿಶತ 24 ಜಿಲ್ಲೆಗಳಲ್ಲಿ ಸಂಭವಿಸಿದೆ.

ಜನವರಿ 2021: ಕೊರೋನಾವೈರಸ್ ಲಸಿಕೆಯ ಅನುಮೋದನೆಯೊಂದಿಗೆ ಪ್ರಕರಣಗಳ ಸಂಖ್ಯೆ ಈಗ ಜೂನ್-ಜುಲೈ ಮಟ್ಟಕ್ಕೆ ಇಳಿದಿದೆ. ಜನವರಿ 16 ರಂದು ಭಾರತದಲ್ಲಿ ಲಸಿಕೆ ಕಾರ್ಯಕ್ರಮ ಪ್ರಾರಂಭವಾಗಿದೆ. ಸುಮಾರು 33 ಲಕ್ಷ ಜನರು ಲಸಿಕೆ ತೆಗೆದುಕೊಂಡಿದ್ದಾರೆ.

ಭಾರತದ ಕಡಿಮೆ ಅವಧಿಯಲ್ಲಿ ಅತೀಹೆಚ್ಚು ಜನರಿಗೆ ಲಸಿಕೆ ನೀಡಿದ ದೇಶ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಅಷ್ಟು ಮಾತ್ರವಲ್ಲದೇ  ವಿವಿಧ ದೇಶಗಳಿಗೆ ಭಾರತ ನಿರ್ಮಿತ ಕೋವಿಡ್‌ ಲಸಿಕೆ ಪೂರೈಕೆ ಮಾಡುತ್ತಿದೆ. ಭಾರತದ ಲಸಿಕೆ ಉತ್ಪಾದನಾ ಸಾಮರ್ಥ್ಯ ವಿಶ್ವದ ಅತೀದೊಡ್ಡ ಆಸ್ತಿ ಎಂಬುದಕ್ಕೆ ವಿಶ್ವಸಂಸ್ಥೆ ಕೊಂಡಾಡಿದೆ. ಭಾರತ ತಾನು ವಿಶ್ವದ ಔಷಧಾಲಯ ಎಂಬುದನ್ನು ಕಠಿಣ ಸಂದರ್ಭದಲ್ಲಿ ಸಾಬೀತುಪಡಿಸಿದೆ.