ದೇಖೋ ಅಪ್ನಾ ದೇಶ್ : ನಗರಗಳ ಇತಿಹಾಸ ತಿಳಿಸಲಿದೆ ಹೊಸ ವೆಬ್ ಸೀರೀಸ್

ನವದೆಹಲಿ: ರಾಷ್ಟ್ರ ರಾಜಧಾನಿ ದೆಹಲಿಯ ಇತಿಹಾಸ, ಪರಂಪರೆಯ ಮೇಲೆ ಬೆಳಕು ಚೆಲ್ಲುವ ಸಿಟಿ ಆಫ್ ಸಿಟೀಸ್- ಡೆಲ್ಲೀಸ್ ಪರ್ಸನಲ್ ಹಿಸ್ಟರಿ ಎಂಬ ಶಿರ್ಷಿಕೆಯ ಕಾರ್ಯಕ್ರಮವೊಂದು ಪ್ರವಾಸೋದ್ಯಮ ಇಲಾಖೆ ಆರಂಭಿಸಿದ ದೇಖೋ ಅಪ್ನಾ ದೇಶ್ ವೆಬ್ನಾರ್­ನಲ್ಲಿ ಎಪ್ರಿಲ್14 ರಂದು ಬಿಡುಗಡೆಗೊಂಡಿತು.

ಅಂತರ್ಜಾಲದ ಈ ಸರಣಿ ಅವತರಣಿಕೆಯ ಮೊದಲ ಕಂತು ಎಂಟು ನಗರಗಳನ್ನೊಳಗೊಂಡ, ಭವ್ಯ ಪರಂಪರೆ, ಸಂಸ್ಕೃತಿಯನ್ನೊಳಗೊಂಡ ದೆಹಲಿಯ ಐಹಿತ್ಯವನ್ನು ವೀಕ್ಷಕರಿಗೆ ಕಟ್ಟಿಕೊಡುವ ನಿಟ್ಟಿನಲ್ಲಿ ಪ್ರಸಾರವಾಯಿತು.

ಕೊರೋನಾ ಕಾರಣದಿಂದ ಇಡೀ ವಿಶ್ವವೇ ಸ್ತಬ್ಧವಾಗಿದೆ. ಜನರು ಮನೆಯೊಳಗಿನಿಂದ ಹೊರ ಬರಲಾಗುತ್ತಿಲ್ಲ. ಎಲ್ಲವೂ ಸರಿಯಾಗಿದ್ದಿದ್ದರೆ ಈ ತಿಂಗಳಿನಲ್ಲಿ ಹೆಚ್ಚಿನ ಜನರು ಪ್ರವಾಸ ತೆರಳುತ್ತಿದ್ದರು. ಆದರೆ ಈಗ ಅದು ಅಸಾಧ್ಯ. ಇದನ್ನು ಅರ್ಥ ಮಾಡಿಕೊಂಡ ಪ್ರವಾಸೋದ್ಯಮ ಇಲಾಖೆ ದೇಖೋ ಅಪ್ನಾ ದೇಶ್ ಎಂಬ ನಗರಗಳ ಸಂಸ್ಕೃತಿ ಬಿಂಬಿಸುವ ವಿಶಿಷ್ಟ ಕಾರ್ಯಕ್ರಮ ನಡೆಸುತ್ತಿದೆ. ಆ ಮೂಲಕ ಜನರಿಗೆ ಯಾವುದೇ ಪ್ರದೇಶಗಳಿಗೆ ದೈಹಿಕವಾಗಿ ಹೋಗಲಾಗದಿದ್ದರೂ, ಮಾನಸಿಕವಾಗಿ ಅವರನ್ನಲ್ಲಿಗೆ ಕರೆದೊಯ್ದು ಖುಷಿ ನೀಡುವ ಕೆಲಸಕ್ಕೆ ಮುಂದಾಗಿದೆ.

ತಂತ್ರಜ್ಞಾನವನ್ನು ಸಮರ್ಥವಾಗಿ ಬಳಸುವ ಮೂಲಕ ಜನರಿಗೆ ಮಾಹಿತಿ ನೀಡಲಾಗುತ್ತದೆ. ಆಯಾಯ ಪ್ರದೇಶದ ಕಲೆ, ಸಂಸ್ಕೃತಿ, ಆಚಾರ, ವಿಚಾರ, ಜನಜೀವನ, ಆಹಾರ ಖ್ರಮ ಮೊದಲಾದವುಗಳನ್ನು ಒಳಗೊಂಡಂತೆ ಅಲ್ಲಿನ ಐತಿಹಾಸಿಕ, ಸಾಂಪ್ರದಾಯಿಕ ವಿಚಾರಗಳ ಬಗ್ಗೆಯೂ ಇಲ್ಲಿ ಮಾಹಿತಿ ನೀಡಲಾಗುವುದಾಗಿ ಪ್ರವಾಸೋದ್ಯಮ ಮತ್ತು ಸಂಸ್ಕೃತಿ ಇಲಾಖೆಯ ಮಂತ್ರಿ ಪ್ರಹ್ಲಾದ್ ಸಿಂಗ್ ಪಟೇಲ್ ತಿಳಿಸಿದ್ದಾರೆ. ಈ ಅವತರಣಿಕೆಯನ್ನು ಪ್ರವಾಸೋದ್ಯಮದ ಬಗ್ಗೆ ಜಾಗೃತಿ ಮೂಡಿಸಲು ಮತ್ತು ಆಯಾ ಪ್ರದೇಶದ ಹಿನ್ನೆಲೆಗಳನ್ನು ತಿಳಿಸುವ ನಿಟ್ಟಿನಲ್ಲಿ ಆರಂಭಿಸಲಾಗಿದೆ. ಇದರಲ್ಲಿ ಈಗಾಗಲೇ 5546 ಮಂದಿ ನೋಂದಾಯಿಸಿಕೊಳ್ಳುವ ಮೂಲಕ ಭಾಗವಹಿಸುವ ಉತ್ಸಾಹ ತೋರಿದ್ದಾರೆ. ಈ ವೇಬ್ನಾರ್ ಪಬ್ಲಿಕ್ ಡೊಮೈನ್ ಗಳಲ್ಲಿ ಶೀಘ್ರ ದೊರೆಯಲಿದೆ. ಜೊತೆ ಸಚಿವಾಲಯದ ಅಧಿಕೃತ ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ಖಾತೆಗಳ ಮೂಲಕವೂ ವೀಕ್ಷಿಸಬಹುದಾಗಿದೆ ಎಂದೂ ಅವರು ತಿಳಿಸಿದ್ದಾರೆ.

ಇನ್ನು 16 ಎಪ್ರಿಲ್ 2020 ರಂದು ಮಧ್ಯಾಹ್ನ 11 ರಿಂದ 12 ಗಂಟೆಗೆ ಕೋಲ್ಕತ್ತಾ ನಗರದ ಕುರಿತ ಚಿತ್ರಣವನ್ನು ಪ್ರಸ್ತುತ ಪಡಿಸುವುದಾಗಿಯೂ ವೇಬ್ನಾರ್ ಮಾಹಿತಿ ನೀಡಿದೆ.