ಹಣ್ಣು, ತರಕಾರಿ, ನೋಟು ಸೇರಿದಂತೆ ಎಲ್ಲಾ ವಸ್ತುಗಳನ್ನೂ ವೈರಸ್­ನಿಂದ ಸ್ವಚ್ಛ ಮಾಡುತ್ತದೆ ಐಐಟಿ ರೋಪರ್ ತಂಡದ ಈ ಡಿವೈಸ್

ನವದೆಹಲಿ: ಕೊರೋನಾವೈರಸ್ ಹರಡುವ ಆತಂಕದಲ್ಲೇ ಜನತೆ ದಿನ ಕಳೆಯುವಂತಾಗಿದೆ. ಸೋಂಕಿತರ ಸಂಪರ್ಕವೇ ಇಲ್ಲದವರಿಗೂ ಸೋಂಕು ಹರಡಿರುವ ನಿದರ್ಶನಗಳನ್ನು ನೋಡಿ ಜನರೆಲ್ಲ ಭಯದಲ್ಲೇ ದಿನ ಕಳೆಯುತ್ತಿದ್ದಾರೆ. ಇಃತಹ ಪರಿಸ್ಥಿತಿಯಲ್ಲಿ ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (ಐಐಟಿ) ಯವರು ಸೋಂಕು ಪರೀಕ್ಷೆಗೆ ಡಿವೈಸ್ ಅನ್ನು ಐಐಟಿ ರಾಪರ್ ತಂಡ ಅಭಿವೃದ್ಧಿ ಮಾಡಿದ್ದು, ಅದನ್ನು ಬಳಕೆ ಮಾಡುವ ಮೂಲಕ ತರಕಾರಿ, ಹಣ್ಣುಗಳು, ಹಾಲು, ಆಹಾರ ಪದಾರ್ಥಗಳು, ಬ್ಯಾಂಕ್ ನೋಟ್ ಮೊದಲಾದವುಗಳನ್ನು ವೈರಸ್ ಇದೆಯೇ ಎಂದು ಪರೀಕ್ಷಿಸಿಕೊಳ್ಳಬಹುದು ಎಂದು ಸಂಸ್ಥೆ ತಿಳಿಸಿದೆ.

ಹಣ್ಣು, ತರಕಾರಿಗಳನ್ನಾದರೆ ನೀರಿನಿಂದ ತೊಳೆದು ಸ್ವಚ್ಛ ಮಾಡಬಹುದು. ಆದರೆ ನೋಟುಗಳು ಸೇರಿದಂತೆ ಇನ್ನೂ ಕೆಲವು ವಸ್ತುಗಳನ್ನು ನೀರಿನಿಂದ ತೊಳೆದು ಪರೀಕ್ಷಿಸುವುದು ಅಥವಾ ಸ್ವಚ್ಛ ಮಾಡುವುದು ಸಾಧ್ಯವಿಲ್ಲ. ಆದರೆ ಮನೆಯಲ್ಲಿ ಈ ಅಭಿವೃದ್ಧಿ ಪಡಿಸಲಾದ ತಂತ್ರಜ್ಞಾನವನ್ನು ಮನೆಯಲ್ಲಿ ಬಳಕೆ ಮಾಡುವುದರಿಂದ ನೋಟು, ಹಾಲು, ಡೆಲಿವರಿ ಐಟಂಗಳನ್ನು ಸ್ವಚ್ಛ ಮಾಡಬಹುದು ಎಂದು ಐಐಟಿಯ ಸೀನಿಯರ್ ಸೈಂಟಿಫಿಕ್ ಆಫೀಸರ್ ನರೇಶ್ ರಾಖಾ ತಿಳಿಸಿದ್ದಾರೆ.

ಇನ್ನು ಈ ಡಿವೈಸ್­ನಲ್ಲಿ ಸ್ವಚ್ಛ ಮಾಡುವುದಕ್ಕೆ ಬೇಕಾದ ಶಸ್ತುಗಳನ್ನು ಹಾಕಿ ಸುಮಾರು ಅರ್ಧ ಗಂಟೆಗಳಲ್ಲಿಯೇ ಇದು ವೈರಸ್, ಕ್ರಿಮಿ-ಕೀಟಗಳಿಂದ ಸ್ವಚ್ಛ ಮಾಡುತ್ತದೆ. ಕೊನೆಗೆ ಹತ್ತು ನಿಮಿಷಗಳ ಕಾಲ ಡಿವೈಸ್ ಕೂಲಿಂಗ್­ಗೆ ಬೇಕಾಗಿದ್ದು, ಅನಂತರ ನಮ್ಮ ವಸ್ತುಗಳನ್ನು ಯಾವುದೇ ಭಯ, ಗೊಂದಲಗಳಿಲ್ಲದೆ ನಾವು ಬಳಕೆ ಮಾಡಬಹುದಾಗಿದೆ ಎಂದೂ ರಾಖಾ ಹೇಳಿದ್ದಾರೆ. ಇನ್ನು ಅತ್ಯಂತ ಕಡಿಮೆ ಬೆಲೆಗೆ ಈ ಡಿವೈಸ್ ಅನ್ನು ನೀಡುತ್ತಿರುವುದಾಗಿಯೂ ಐಐಟಿ ತಿಳಿಸಿದ್ದು, 500 ರೂ. ಗಳಿಗೆ ಗ್ರಾಹಕರ ಕೈ ಸೇರಲಿದೆ ಎಂಬುದಾಗಿ ತಿಳಿಸಿದ್ದಾರೆ.

ಇನ್ನು ಇದರಲ್ಲಿ ವಸ್ತುಗಳನ್ನು ಸ್ವಚ್ಛ ಮಾಡುವ ಸಲುವಾಗಿ ನೇರಳಾತೀತ ವಿಕಿರಣವನ್ನು ಬಳಕೆ ಮಾಡಲಾಗುತ್ತದೆ. ಈ ವಿಕಿರಣಗಳನ್ನು ನೇರವಾಗಿ ನೋಡುವುದರಿಂದ ಅಪಾಯ ಸಂಭವಿಸುವ ಸಾಧ್ಯತೆಗಳಿದ್ದು, ನೇರವಾಗಿ ನೋಡದಂತೆಯೂ ಐಐಟಿ ಸೂಚನೆ ನೀಡಿದೆ.

ಕೊರೋನಾಗೆ ದೇಶದಲ್ಲಿ ಈಗಾಗಲೇ ಸುಮಾರು 6500 ಕ್ಕೂ ಅಧಿಕ ಮಂದಿ ಸೋಂಕಿತರಾಗಿದ್ದು, 206 ಮಂದಿ ಸಾವನ್ನಪ್ಪಿದ್ದಾರೆ. 450 ಕ್ಕೂ ಹೆಚ್ಚು ಮಂದಿ ಚೇತರಿಸಿಕೊಂಡಿದ್ದಾಗಿ ವರದಿಗಳು ತಿಳಿಸಿವೆ. ಇಂತಹ ಸಂದರ್ಭದಲ್ಲಿ ಸೋಂಕು ಹರಡದಂತೆ ತಡೆಯುವ ಸಲುವಾಗಿ ಇಂತಹ ಒಂದು ಡಿವೈಸ್‌­ಗಳನ್ನು ಅಭಿವೃದ್ಧಿ ಪಡಿಸುವ ಮೂಲಕ ಜನರಿಗೆ ಸೋಂಕಿನಿಂದ ರಕ್ಷಿಸಿಕೊಳ್ಳಲು ಐಐಟಿ ರೋಪರ್ ತಂಡ ನೆರವಾಗಲು ಪ್ರಯತ್ನಿಸಿದೆ ಎಂದರೂ ತಪ್ಪಾಗಲಾರದು.