ಬಿಜೆಪಿ ಕಾರ್ಯಕರ್ತರಲ್ಲಿ 5 ಮನವಿ ಮಾಡಿದ ಪಿಎಂ ಮೋದಿ

ನವದೆಹಲಿ: ಬಿಜೆಪಿ ಪಕ್ಷದ 40ನೇ ಸಂಸ್ಥಾಪನಾ ದಿನಾಚರಣೆಯ ಪ್ರಯುಕ್ತ ಕಾರ್ಯಕರ್ತರಿಗೆ ಶುಭಾಶಯಗಳನ್ನು ತಿಳಿಸುವುದರ ಜೊತೆಗೆ ಪ್ರಧಾನಿ ನರೇಂದ್ರ ಮೋದಿ ಅವರು ಐದು ಮನವಿಗಳನ್ನು ಮಾಡಿದ್ದಾರೆ.

ದೇಶಕ್ಕೆ ದೇಶವೇ ಕೊರೋನಾ ಮಹಾಮಾರಿಯ ಹಿಡಿತಕ್ಕೆ ನಲುಗಿದೆ. ಈ ಸಾಂಕ್ರಾಮಿಕ ರೋಗದ ವಿರುದ್ಧ ವಿಶ್ವವೇ ಹೋರಾಟಕ್ಕೆ ಸಜ್ಜಾಗಿದೆ. ಭಾರತದಲ್ಲಿಯೂ ಮೋದಿ ಜೊತೆ ನಾವಿದ್ದೇವೆ ಎಂಬಂತೆ ದೀಪಗಳನ್ನು ಉರಿಸುವ ಮೂಲಕ ಅಭೂತಪೂರ್ವ ಬೆಂಬಲವನ್ನೂ ಭಾರತೀಯರು ಘೋಷಿಸಿದ್ದಾರೆ. ಈ ಸೋಂಕನ್ನು ಬೇರು ಸಹಿತ ಕಿತ್ತು ಹಾಕುವಲ್ಲಿ ಜನರ ಸಹಕಾರ ಬೇಕಿದ್ದು, ಆ ಸಲುವಾಗಿ ಮೋದಿ ತಮ್ಮ ಪಕ್ಷದ ಕಾರ್ಯಕರ್ತರಿಗೂ ಸೂಚನೆಗಳನ್ನು ನೀಡಿದ್ದಾರೆ. ಇಂತಹ ಕಠಿಣ ಸ್ಥಿತಿಯಲ್ಲಿ ಬಡವರು ಹಸಿವಿನಲ್ಲಿ ಒದ್ದಾಡುತ್ತಿದ್ದರೆ ಅವರಿಗೆ ಆಹಾರ ಒದಗಿಸುವಂತೆಯೂ ಮನವಿ ಮಾಡಿದ್ದಾರೆ.

🔹 ಪಕ್ಷದ ಪ್ರತಿಯೊಬ್ಬ ಕಾರ್ಯಕರ್ತನೂ ಬಡವರ್ಗದ ಜನರಿಗೆ ಆಹಾರ, ಪಡಿತರವನ್ನು ವಿತರಿಸುವಂತೆ ಮೋದಿ ವಿನಂತಿಸಿದ್ದಾರೆ.

🔹 ಮಾಸ್ಕ್, ಬಟ್ಟೆ ಇತ್ಯಾದಿಗಳನ್ನು ಬಡವರಿಗೆ ವಿತರಿಸಲು ಮತ್ತು ಕಾರ್ಯಕರ್ತರೂ ಮಖ, ಕೈಗಳನ್ನು ಮುಚ್ಚಿಕೊಂಡು ಇತರರಿಗೆ ಸಹಾಯ ಮಾಡುವ ಮೂಲಕ ದೇಶವನ್ನು ಸೋಂಕು ಹರಡದಂತೆ ಕಾಪಾಡಿಕೊಳ್ಳಲು ಮೋದಿ ಮನವಿ ಮಾಡಿದ್ದಾರೆ.

🔹 ಕೊರೋನಾ ವಿರುದ್ಧ ಹೋರಾಡುತ್ತಿರುವ ವೈದ್ಯರು, ದಾದಿಯರು, ಪೊಲೀಸರು, ಪೌರ ಕಾರ್ಮಿಕರು, ಬ್ಯಾಂಕ್, ಪೋಸ್ಟ್ ಆಫೀಸ್ ನೌಕರರು ಸೇರಿದಂತೆ ಲಾಕ್ಡೌನ್ ಸಂದರ್ಭದಲ್ಲಿಯೂ ಸೇವೆ ಒದಗಿಸುತ್ತಿರುವವರಿಗೆ ಧನ್ಯವಾದ ಸಮರ್ಪಿಸುವುದು.

🔹ಕೊರೋನಾ ವಿರುದ್ಧ ಹೋರಾಟಕ್ಕಾಗಿ ಸಿದ್ಧ ಪಡಿಸಿರುವ ಆರೋಗ್ಯ ಸೇತು ಅಪ್ಲಿಕೇಶನ್ ಬಗ್ಗೆ ಜನಸಾಮಾನ್ಯರಿಗೆ ತಿಳಿಸುವುದು. ಈ ಅಪ್ಲಿಕೇಶನ್ ಅನ್ನು ಕಾರ್ಯಕರ್ತರೂ ಉಪಯೋಗಿಸುವುದು ಮತ್ತು ಇತರರಿಗೂ ಇದನ್ನು ಉಪಯೋಗಿಸುವಂತೆ ತಿಳುವಳಿಕೆ ನೀಡುವುದು.

🔹ಪಿಎಂ ಕೇರ್ಸ್ ಸಹಾಯನಿಧಿಗೆ ಧನ ಸಹಾಯ ನೀಡುವುದು ಜೊತೆಗೆ ಕನಿಷ್ಟ 40 ಮಂದಿಯಾದರೂ ದೇಣಿಗೆ ನೀಡುವಂತೆ ಪ್ರೇರೇಪಿಸುವುದು. ಆ ಮೂಲಕ ಕೊರೋನಾ ಹೋರಾಟಕ್ಕೆ ಸರ್ಕಾರಕ್ಕೆ ಆರ್ಥಿಕ ಬೆಂಬಲ ನೀಡುವುದು.

ಈ ಮೇಲೆ ತಿಳಿಸಿದ ಮನವಿಯನ್ನು ಬಿಜೆಪಿ ಕಾರ್ಯಕರ್ತರಲ್ಲಿ ಮೋದಿ ಮಾಡಿಕೊಂಡಿದ್ದು ಆ ಮೂಲಕ ಆರೋಗ್ಯಪೂರ್ಣ ದೇಶ ನಿರ್ಮಾಣದಲ್ಲಿ ತೊಡಗಿಕೊಳ್ಳುವಂತೆ ತಮ್ಮ ಪಕ್ಷದ ಬೆಂಬಲಿಗರಿಗೆ ತಿಳಿಸಿದ್ದಾರೆ. ಜೊತೆಗೆ ಇಂತಹ ಕಠಿಣ ಪರಿಸ್ಥಿತಿ ಯಲ್ಲಿ ಸಾಮಾಜಿಕ ಅಂತರವನ್ನು ಕಾಪಾಡಿಕೊಳ್ಳುವುದೇ ಮೂಲಮಂತ್ರವಾಗಿದ್ದು, ಅದನ್ನು ಕಾಯ್ದುಕೊಂಡು ಸೋಂಕು ಹರಡದಂತೆ ಎಚ್ಚರಿಕೆ ವಹಿಸಲು ಮೋದಿ ಸೂಚಿಸಿದ್ದಾರೆ.