ಆರ್ಯನ್ ಆಕ್ರಮಣ ಸಿದ್ಧಾಂತವನ್ನು ಅಲ್ಲಗೆಳೆದ ಹೊಸ ಸಂಶೋಧನೆ

5000 ವರ್ಷ ಹಳೆಯ ಮಹಿಳೆಯ ಅಸ್ಥಿಪಂಜರದಲ್ಲಿನ ವಂಶವಾಹಿಯು ಆರ್ಯನ್ ಆಕ್ರಮಣದ ಸಿದ್ಧಾಂತವನ್ನು ಸಂಪೂರ್ಣವಾಗಿ ಅಲ್ಲಗಳೆದಿದೆ. ಸಿಂಧೂ ಕಣಿವೆ ನಾಗರೀಕತೆಯ ಪ್ರಾಚೀನ ಡಿಎನ್‌ಎ ಭಾರತದ ರಾಖಿಗಾರ್ಹಿ ಪುರಾತತ್ವ ಸ್ಥಳದಲ್ಲಿ ಸಮಾಧಿ ಮಾಡಲಾದ ವ್ಯಕ್ತಿಯಲ್ಲಿ ಕಂಡುಬಂದಿದೆ. ಪ್ರಾಚೀನ ಮಾನವ ಅವಶೇಷಗಳ ಬಗ್ಗೆ ಇದುವರೆಗಿನ ಅತಿದೊಡ್ಡ ಅಧ್ಯಯನವು ಭಾರತದಲ್ಲಿ ಜನರು ವಿಶಾಲವಾದ ಸಿಂಧೂ ಕಣಿವೆ ನಾಗರಿಕತೆಯಿಂದ ಬಂದವರು ಎಂದು ಬಹಿರಂಗಪಡಿಸಿದೆ. ಪ್ರಾಚೀನ ಸಂಸ್ಕೃತಿಯ ರಾಜಧಾನಿಯಾದ ರಾಖಿಗರ್ಹಿ (ಹರಿಯಾಣದ ಹಿಸಾರ್ ಜಿಲ್ಲೆ) ನಲ್ಲಿ ಸಮಾಧಿಯಾದ ಮಹಿಳೆಯ ವಂಶವಾಹಿ ಭಾರತೀಯ ಜನರ ಮೂಲದ ಶ್ರೀಮಂತತೆಯನ್ನು ಬಿಂಬಿಸಿದೆ.

ಭಾರತದ ಡೆಕ್ಕನ್ ಕಾಲೇಜಿನ ಉಪ ಕುಲಪತಿಗಳಾದ ಫ್ರೊಫೆಸರ್ ವಸಂತ್ ಶಿಂಧೆ ಅವರು ಈ ಬಗ್ಗೆ ಸಂದರ್ಶನದಲ್ಲಿ ಮಾಹಿತಿಯನ್ನು ನೀಡಿದ್ದು, ಆರ್ಯನ್ ಆಕ್ರಮಣ ಸಿದ್ಧಾಂತ ತಪ್ಪು ಎಂದಿದ್ದಾರೆ. ಯಾವುದೇ ಆರ್ಯನ್ ಆಕ್ರಮಣ ಅಥವಾ ವಲಸೆಗಳು ನಡೆದಿಲ್ಲ ಎಂದು ಅವರು ಪ್ರತಿಪಾದಿಸಿದ್ದಾರೆ.

ಆರ್ಯನ್ ಆಕ್ರಮಣದ ಸಿದ್ಧಾಂತವವನ್ನು ಆರಂಭದಲ್ಲಿ ಹೇಳಿದ್ದು ಕೆಲ ಸಂಶೋಧಕರು. ಕ್ರಿ.ಪೂ 1500ರಲ್ಲಿ ಆರ್ಯರು ಭಾರತಕ್ಕೆ ಬಂದರು ಎಂಬುದು ಇವರ ವಾದವಾಗಿದೆ. ಪುರಾತತ್ವಶಾಸ್ತ್ರಜ್ಞ ಮಾರ್ಟಿಮರ್ ವೀಲರ್ ವೈದಿಕ ಸಾಹಿತ್ಯದ ಕಲಾಕೃತಿ ಮತ್ತು ಸಹ-ಸಂಬಂಧವನ್ನು ನಿರ್ಲಕ್ಷಿಸಿ ಆರ್ಯನ್ ಆಕ್ರಮಣ ಭಾರತದಲ್ಲಿ ನಡೆದಿದೆ ಎಂದು ಪ್ರತಿಪಾದಿಸಿದ್ದಾರೆ. ಬರಹಗಾರ, ವಿದ್ವಾಂಸ ಮ್ಯಾಕ್ಸ್ ಮುಲ್ಲರ್ ಮತ್ತು ಭಾಷಾಶಾಸ್ತ್ರಜ್ಞ ಎಫ್. ಬಾಪ್ಸ್  ಭಾಷೆಯ ಹೋಲಿಕೆಯನ್ನು ಆಧರಿಸಿ ಮತ್ತು ಬೈಬಲ್ ಟೈಮ್‌ಲೈನ್ ಅನ್ನು ಪರಿಗಣಿಸಿ ಸಿದ್ಧಾಂತವನ್ನು ಪ್ರತಿಪಾದಿಸಿದ್ದಾರೆ.

ಡಿಸ್ಕವರಿ ಆಫ್ ಇಂಡಿಯಾದಲ್ಲಿ ಪಂಡಿತ್ ನೆಹರೂ ಕೂಡ ಸಿದ್ಧಾಂತವನ್ನು ಪ್ರತಿಪಾದಿಸಿದ್ದಾರೆ. ಲೋಕಮಾನ್ಯ ತಿಲಕ್ ಅವರೂ ಆರ್ಯರು ಆರ್ಕ್ಟಿಕ್ ಪ್ರದೇಶದಿಂದ ಬಂದಿರಬೇಕು ಎಂದು ಭಾವಿಸಿದ್ದರು.

“ಅಂಬೇಡ್ಕರ್ ಮಾತ್ರ ತಮ್ಮ“ ಹೂ ವರ್ ಶೂದ್ರಾಸ್ ”ಎಂಬ ಪುಸ್ತಕದಲ್ಲಿ ಈ ಸಿದ್ಧಾಂತವನ್ನು ನಿರಾಕರಿಸಿದರು.

ಡೆಕ್ಕನ್ ಕಾಲೇಜಿನ ಪುರಾತತ್ತ್ವಜ್ಞರು ಮತ್ತು ಹಾರ್ವರ್ಡ್­ನ ವಿಜ್ಞಾನಿಗಳು ಸೇರಿದಂತೆ ಸಂಶೋಧಕರ ತಂಡವು ಪತ್ತೆ ಮಾಡಿದ ಅಂಶವನ್ನು ವಸಂತ್ ಶಿಂಧೆ ಅವರು ವಿವರಿಸಿದ್ದಾರೆ.

ರಾಖಿಗರ್ಹಿಯಲ್ಲಿ 5000 ವರ್ಷಗಳಷ್ಟು ಹಳೆಯ ಮಹಿಳೆಯ ಅಸ್ಥಿಪಂಜರದಿಂದ ವಂಶವಾಹಿ ರೂಪ ಕಂಡುಹಿಡಿದಿದೆ. ಈಕೆಯ ಹರಪ್ಪನ್ ವಂಶವಾಹಿಯು ಸ್ಟೆಪ್ಪೆ ಪ್ಯಾಸ್ಟೋರಲಿಸ್ಟ್‌ಗಳು ಅಥವಾ ಇರಾನಿನ ರೈತರಿಂದ ಭಿನ್ನತೆಯನ್ನು ಹೊಂದಿದೆ ಎಂದಿದ್ದಾರೆ.

ಹರಪ್ಪನ್ ನಾಗರೀಕತೆಯ ನಗರವಾದ ರಾಖಿಗಾರ್ಹಿ ತನ್ನ ಜನರನ್ನು ಆಧುನಿಕ ದಕ್ಷಿಣ ಏಷ್ಯನ್ನರೊಂದಿಗೆ ಸಂಪರ್ಕಿಸುತ್ತದೆ (ಅಫ್ಘಾನಿಸ್ಥಾನ, ಬಾಂಗ್ಲಾದೇಶ, ಭೂತಾನ್, ಭಾರತ, ಮಾಲ್ಡೀವ್ಸ್, ನೇಪಾಳ, ಪಾಕಿಸ್ಥಾನ, ಶ್ರೀಲಂಕಾ). ಈ ಸಂಶೋಧನೆಯು ಯಾವುದೇ ಆರ್ಯರ ಆಕ್ರಮಣ / ವಲಸೆ ನಡೆದಿರುವುದನ್ನು ಬಹಿರಂಗವಾಗಿ  ತಿರಸ್ಕರಿಸಿದೆ  ಎಂದಿದ್ದಾರೆ.

ಪುರಾತತ್ವ ದಾಖಲೆಯ ಅಂಶಗಳೆಂದರೆ,

ಬಲೂಚಿಸ್ತಾನ್, ಪಾಕಿಸ್ಥಾನ ಮತ್ತು ಭಿರಾನಾ, ಗಿರವಾಡ್, ಮಿತಾಥಾಲ್, ಫರ್ಮಾನಾ, ಕುನಾಲ್, ಮುಂತಾದ  ಭಾರತದ ಸರಸ್ವತಿ ಜಲಾನಯನ ಪ್ರದೇಶದಲ್ಲಿರುವ ಮೆಹರ್‌ಘರ್ ತಾಣಗಳು ಕ್ರಿ.ಪೂ 7000 ರಿಂದ ಪ್ರಾರಂಭವಾಗುವ ಸ್ಥಳೀಯ ಮೂಲದ ಬೆಳವಣಿಗೆಗೆ ಸಾಕಷ್ಟು ಪುರಾವೆಗಳನ್ನು ಒದಗಿಸುತ್ತವೆ.

ನವಶಿಲಾಯುಗದ ರೈತರು ಸಸ್ಯ ಮತ್ತು ಪ್ರಾಣಿಗಳ ಸಾಕಾಣಿಕೆಯ ಪ್ರಯೋಗವನ್ನು ಪ್ರಾರಂಭಿಸಿದರು. ಬೆಳೆಗಳಾದ ಗೋಧಿ, ಬಾರ್ಲಿ, ಬೇಳೆಕಾಳುಗಳು, ಎಣ್ಣೆ ಬೀಜಗಳ ಉತ್ಪಾದನೆಯನ್ನು ಆರಂಭಿಸಿದರು.  ದನ, ಕುರಿ ಮತ್ತು ಮೇಕೆಗಳ ಸಾಕಾಣಿಕೆಯನ್ನು ಆರಂಭಿಸಿದರು.

ಕ್ರಿ.ಪೂ 7000 ರಲ್ಲಿ ಮನೆಗಳನ್ನು ನಿರ್ಮಿಸಲು ಪ್ರಾರಂಭಿಸಿದರು, ಮೂಲ ಕರಕುಶಲ ವಸ್ತುಗಳಾದ ಮರಗೆಲಸ, ಕಲ್ಲಿನ ಕೆಲಸ ಇತ್ಯಾದಿಗಳನ್ನು ಆರಂಭಿಸಿದರು.

ಕ್ರಿ.ಪೂ 2500 ರ ಹೊತ್ತಿಗೆ – ಪಟ್ಟಣ ಯೋಜನೆ, ಕುಂಬಾರಿಕೆ, ಲೋಹಶಾಸ್ತ್ರ, ವ್ಯಾಪಾರ, ಉತ್ಪಾದನೆ ಮತ್ತು ಗುಂಡು ತಂತ್ರಜ್ಞಾನ ಇತ್ಯಾದಿಗಳಲ್ಲಿ ಪರಿಣತಿಯನ್ನು ಸಾಧಿಸಿದರು. ಹೀಗೆ “ಭಾರತೀಯ ಜ್ಞಾನ ವ್ಯವಸ್ಥೆ” ವಿಕಸನಗೊಂಡಿತು.

ಜನರು ಮಧ್ಯಪ್ರಾಚ್ಯ ಅಥವಾ ಮಧ್ಯ ಏಷ್ಯಾದಂತಹ ಇತರ ಪ್ರದೇಶಗಳಿಂದ ವಲಸೆ ಬಂದಿದ್ದರೆ, ಮೂಲ ಅಥವಾ ಸಾಂಸ್ಕೃತಿಕ ಬೆಳವಣಿಗೆಯ ಪುರಾವೆಗಳು ನಮಗೆ ಸಿಗುತ್ತಿರಲಿಲ್ಲ. ಅಂತೆಯೇ, ವಲಸಿಗರು ತಮ್ಮ ಸಾಂಸ್ಕೃತಿಕ ಸಂಪ್ರದಾಯಗಳನ್ನು ತಮ್ಮೊಂದಿಗೆ ತಂದು ದಕ್ಷಿಣ ಏಷ್ಯಾದಲ್ಲಿ ಅಳವಡಿಸಬಹುದಿತ್ತು ಮತ್ತು ಇಲ್ಲಿ ಅವರು ಸಂಪೂರ್ಣವಾಗಿ ಹೊಸ ಸಾಂಸ್ಕೃತಿಕ ಅಂಶಗಳನ್ನು ಆವಿಷ್ಕರಿಸಿ ತಮ್ಮ ಸಮಯವನ್ನು ವ್ಯರ್ಥ ಮಾಡುತ್ತಿರಲಿಲ್ಲ.

ವಿಶಿಷ್ಟವಾದ ಹರಪ್ಪನ್ ಇಟ್ಟಿಗೆಗಳನ್ನು ಸರಿಯಾದ ಅನುಪಾತದಲ್ಲಿ ಪರಿಚಯಿಸಿದರು ಮತ್ತು ಹೆಚ್ಚಿನ ವೈಜ್ಞಾನಿಕ ನಿರ್ಮಾಣ ವಿಧಾನವನ್ನು ಅಳವಡಿಸಿಕೊಂಡರು (ಇಂದು ಇದನ್ನು ಇಂಗ್ಲಿಷ್ ಬ್ಯಾಂಡ್ ಎಂದು ಕರೆಯಲಾಗುತ್ತದೆ).

ಹರಪ್ಪನ್ ನಾಗರಿಕತೆ (ಕ್ರಿ.ಪೂ. 2500-1900) ಮೆಸೊಪೊಟಮಿಯನ್ ಮತ್ತು ಈಜಿಪ್ಟಿನ ನಾಗರಿಕತೆಗಳಿಗೆ ಸಮಕಾಲೀನವಾಗಿತ್ತು ಮತ್ತು ಅವರು ಪರಸ್ಪರ ವ್ಯಾಪಾರ ಸಂಪರ್ಕವನ್ನು ಹೊಂದಿದ್ದರು.

ಹರಪ್ಪನ್ನರು ವಿಶ್ವದ ಇತಿಹಾಸಕ್ಕೆ ಅಪಾರ ಕೊಡುಗೆ ನೀಡಿದ್ದಾರೆ; ವೈಜ್ಞಾನಿಕ ನಿರ್ಮಾಣ ವಿಧಾನಗಳು, ಜವಳಿ ಮತ್ತು ರೇಷ್ಮೆ ಉದ್ಯಮ, ಆಯುರ್ವೇದ ಮತ್ತು ಯೋಗ ವಿಜ್ಞಾನ, ವೈಜ್ಞಾನಿಕ ಕೃಷಿ ವ್ಯವಸ್ಥೆ ಮತ್ತು ಉಪಕರಣಗಳು ಇತ್ಯಾದಿಗಳನ್ನು ಈ ವೇಳೆಯಲ್ಲಿ ಪರಿಚಯಿಸಲಾಗಿತ್ತು.

ಲೋಥಲ್ ಉತ್ಖನನದಲ್ಲಿ ಬೆಂಕಿಯ ಬಲಿಪೀಠಗಳು (ಯಜ್ಞವೇದಿ) ಕಂಡುಬರುತ್ತವೆ.

ಅನುವಂಶಿಕ ದಾಖಲೆಯ ಅಂಶಗಳೆಂದರೆ,

ರಾಖಿಗರ್ಹಿಯಲ್ಲಿ ಹರಪ್ಪನ್ ಸ್ಮಶಾನ ಕಂಡುಬಂದಿದೆ.

ಹಾರ್ವರ್ಡ್ ವೈದ್ಯಕೀಯ ಶಾಲೆಯ ಡಾ. ಡೇವಿಡ್ ರೀಚ್ ಕೆಲವು ಅಸ್ಥಿಪಂಜರದ ಅವಶೇಷಗಳಿಂದ ಡಿಎನ್‌ಎ ಸಂಕೇತ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ.

ರಾಖಿಗರ್ಹಿ ಮಾದರಿಗಳ ಡಿಎನ್‌ಎ ಫಲಿತಾಂಶಗಳನ್ನು ದಕ್ಷಿಣ ಏಷ್ಯಾದ ಆಧುನಿಕ ಜನಸಂಖ್ಯೆಯೊಂದಿಗೆ ಹೋಲಿಸಲಾಗಿದೆ.

ಹರಪ್ಪನ್ ಜನರು ತಮ್ಮ ಸಮಕಾಲೀನರಾದ ಸ್ಟೆಪ್ಪೆ ಪ್ರದೇಶ ಮತ್ತು ಇರಾನ್ ಜನರೊಂದಿಗೆ ಸಂಬಂಧ ಹೊಂದಿದ್ದರೇ ಎಂಬುದನ್ನು ಪರಿಶೀಲಿಸಲು ತುಲನಾತ್ಮಕ ಡಿಎನ್‌ಎ ವಿಶ್ಲೇಷಣೆಯನ್ನು ಮಾಡಲಾಗಿದೆ. ಇದಕ್ಕೆ ಮಧ್ಯ ಏಷ್ಯಾದ ಗೊನೂರ್ ಮತ್ತು ಇರಾನ್‌ನ ಸಹರ್-ಇ-ಸೊಕ್ತಾ ಎಂಬ ಎರಡು ಪ್ರಮುಖ ಪುರಾತತ್ತ್ವ ಶಾಸ್ತ್ರದ ಮಾದರಿಗಳೊಂದಿಗೆ ವಿಶ್ಲೇಷಣೆ ಮಾಡಲಾಗಿದೆ.

ಈ ವಂಶವಾಹಿ ಸಾಕ್ಷ್ಯವು ಜನಸಂಖ್ಯೆಗೆ ಸಂಬಂಧಿಸಿದ ಪುರಾತತ್ವ ಸಾಕ್ಷ್ಯಗಳಿಗೆ ಸಂಪೂರ್ಣವಾಗಿ ಪೂರಕವಾಗಿದೆ.

ಅಂತಿಮವಾಗಿ,

ಹರಪ್ಪನ್ ಜನಸಂಖ್ಯೆಗೆ ಪೂರ್ವಜರ ಆರ್ಯನ್ ವಲಸೆಯೇ ಕಾರಣ ಎಂಬ ಸಿದ್ಧಾಂತವನ್ನು ಪ್ರಾಚೀನ ಡಿಎನ್‌ಎ ಫಲಿತಾಂಶಗಳು ಸಂಪೂರ್ಣವಾಗಿ ತಿರಸ್ಕರಿಸುತ್ತವೆ.

ಭಾರತದಾದ್ಯಂತ ವಲಸೆ ಹೋಗುವ ಬೇಟೆಗಾರರು ಆರಂಭಿಕ ಹರಪ್ಪನ್ ನಾಗರಿಕತೆಯನ್ನು ರಚಿಸಿದ್ದಾರೆ / ಸ್ಥಾಪಿಸಿದ್ದಾರೆ. (ಕ್ರಿ.ಪೂ 7000 ಅಥವಾ ಹೆಚ್ಚಿನದು)

ಅನುವಂಶಿಕ ಗುರುತು ಎಲ್ಲ ಕಡೆ ಒಂದೇ ಆಗಿರುತ್ತದೆ ಆದರೆ ವಸ್ತು ಸಂಸ್ಕೃತಿಯಲ್ಲಿನ ಬೆಳವಣಿಗೆ ನಿರಂತರ ಪ್ರಕ್ರಿಯೆಯಾಗಿ ಉಳಿದಿದೆ, ಹೀಗಾಗಿ ನಗರ ಹರಪ್ಪನ್ ನಾಗರಿಕತೆ ಅಸ್ತಿತ್ವಕ್ಕೆ ಬಂದಿತು.

ಮೊಹೆಂಜೊದಾರೊದ ಸಿಟಾಡೆಲ್ ಪ್ರದೇಶದ ಮೇಲಿನ ಭಾಗದಲ್ಲಿ ಕಂಡುಬರುವ ಅಸ್ಥಿಪಂಜರದ ಅವಶೇಷಗಳು ಪ್ರವಾಹದಿಂದ ಸಾವನ್ನಪ್ಪಿದವರಿಗೆ ಸೇರಿವೆ ಮತ್ತು ಸರ್ ಮಾರ್ಟಿಮರ್ ವೀಲರ್ ಊಹಿಸಿದಂತೆ ಆರ್ಯರು ಹತ್ಯಾಕಾಂಡ ಮಾಡಲಿಲ್ಲ.

ಈ ಸಂಶೋಧನೆಯು ವೈದಿಕ ಸಂಸ್ಕೃತಿಯನ್ನು ದಕ್ಷಿಣ ಏಷ್ಯಾದ ಮೂಲನಿವಾಸಿಗಳು ಅಭಿವೃದ್ಧಿಪಡಿಸಿದ್ದಾರೆ ಎಂಬ ಅಂಶವನ್ನು ಸಹ ಪ್ರತಿಪಾದಿಸುತ್ತದೆ. ಹರಪ್ಪನ್ನರು ವೈದಿಕ ಜನರಾಗಿದ್ದರು ಆದ್ದರಿಂದ ಪ್ರಾಚೀನ ಡಿಎನ್‌ಎ ಅಧ್ಯಯನಗಳ ಆಧಾರದ ಮೇಲೆ ಬಲವಾದ ದೃಢೀಕರಣ ವೈಜ್ಞಾನಿಕ ಪುರಾವೆಗಳನ್ನು ಪಡೆದಿದ್ದಾರೆ.

ಈ ಸಂಶೋಧನೆಯು ಮೊದಲ ಬಾರಿಗೆ ಹರಪ್ಪನ್ ನಾಗರಿಕತೆಯ ಜನರು ದಕ್ಷಿಣ ಏಷ್ಯಾದ ಇಡೀ ಜನಸಂಖ್ಯೆಯ ಪೂರ್ವಜರು ಎಂಬ ಅಂಶವನ್ನು  ಪುನಃಸ್ಥಾಪಿಸಿದೆ.

ಇದೇ ಮೊದಲ ಬಾರಿಗೆ ಅಧ್ಯಯನವೊಂದು ಪೂರ್ವದಿಂದ ಪಶ್ಚಿಮಕ್ಕೆ ಜನರ ಚಲನೆ ಇತ್ತು ಎಂಬುದನ್ನು ಸೂಚಿಸಿದೆ. ಹರಪ್ಪನ್ನರು ಮೆಸೊಪಟೊಮಿಯಾ, ಈಜಿಪ್ಟ್, ಪರ್ಷಿಯನ್ ಕೊಲ್ಲಿ ಮತ್ತು ಬಹುತೇಕ ದಕ್ಷಿಣ ಏಷ್ಯಾದಾದ್ಯಂತ ವ್ಯಾಪಾರ ಮಾಡುತ್ತಿದ್ದಂತೆ, ಜನರ ಚಲನವಲನ ಮಿಶ್ರ ಆನುವಂಶಿಕ ಇತಿಹಾಸಕ್ಕೆ ಕಾರಣವಾಗುತ್ತದೆ.

ಒಟ್ಟಿನಲ್ಲಿ ಡೆಕ್ಕನ್ ಕಾಲೇಜಿನ  ಪುರಾತತ್ತ್ವಜ್ಞರು ಮತ್ತು ಹಾರ್ವರ್ಡ್­ನ ವಿಜ್ಞಾನಿಗಳು ಸೇರಿದಂತೆ ಸಂಶೋಧಕರ ತಂಡವು ಪತ್ತೆ ಮಾಡಿದ ಹೊಸ ಅಧ್ಯಯನವು ಆರ್ಯನ್ ಆಕ್ರಮಣದ ಸಿದ್ಧಾಂತವನ್ನು ಸಂಪೂರ್ಣವಾಗಿ ತಿರಸ್ಕರಿಸಿದೆ. ಭಾರತದಲ್ಲಿರುವ ಎಲ್ಲರೂ ಸಿಂಧೂ ಕಣಿವೆಯವರೇ ಆಗಿದ್ದಾರೆ ಹೊರತು ಎಲ್ಲಿಂದಲೋ ಬಂದವರಲ್ಲ ಎಂಬುದನ್ನು ಸ್ಪಷ್ಟಪಡಿಸಿದೆ.

ಅವರ ಸಂದರ್ಶನದ ವೀಡಿಯೋ ವೀಕ್ಷಿಸಿ.