ಕಾಶ್ಮೀರ ಪಾಕಿಸ್ಥಾನದಲ್ಲಿರುವ ನಕ್ಷೆ ಹಂಚಿಕೊಂಡ ಕೇರಳ ಕಾಂಗ್ರೆಸ್:‌ ಬಿಜೆಪಿ ಕಿಡಿ

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿಯವರ ವಿದೇಶ ಪ್ರವಾಸಗಳನ್ನು ಟೀಕಿಸುವ ಭರದಲ್ಲಿ ಕಾಶ್ಮೀರವನ್ನು ಪಾಕಿಸ್ಥಾನದ ಭಾಗವೆಂದು ತೋರಿಸುವ ವಿಶ್ವ ನಕ್ಷೆಯನ್ನು ಕಾಂಗ್ರೆಸ್‌ನ ಕೇರಳದ X ಹ್ಯಾಂಡಲ್ ಹಂಚಿಕೊಂಡಿದ್ದು, ಮತ್ತೊಮ್ಮೆ ವಿವಾದಕ್ಕೆ ಸಿಲುಕಿದೆ. ಪ್ರತಸ್ತು ಕೇರಳ ಕಾಂಗ್ರೆಸ್ X ಹ್ಯಾಂಡಲ್ ಪೋಸ್ಟ್ ಅನ್ನು ಅಳಿಸಿಹಾಕಿದೆ ಮತ್ತು ನಿಖರವಾದ ನಕ್ಷೆಯನ್ನು ಹಾಕಿವೃತ್ತಿಯನ್ನು ಮರು ಪೋಸ್ಟ್‌ ಮಾಡಿದೆ.

ಈ ಬಗ್ಗೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿರುವ ಬಿಜೆಪಿ ಕಾಂಗ್ರೆಸ್ ಅನ್ನು ತರಾಟೆಗೆ ತೆಗೆದುಕೊಂಡಿದೆ, ಪಕ್ಷವು ಭಾರತದ ನಕ್ಷೆಯನ್ನು ಉದ್ದೇಶಪೂರ್ವಕವಾಗಿ ವಿರೂಪಗೊಳಿಸಿದೆ ಎಂದು ಆರೋಪಿಸಿದೆ.

ಅಧಿಕೃತ ಕೇರಳ ಕಾಂಗ್ರೆಸ್ ಹ್ಯಾಂಡಲ್‌ನಿಂದ X ನಲ್ಲಿ ಹಂಚಿಕೊಳ್ಳಲಾದ ಪೋಸ್ಟ್, ಪ್ರಧಾನಿ ಮೋದಿ ಭೇಟಿ ನೀಡಿದ ದೇಶಗಳನ್ನು ಕೆಂಪು ಬಣ್ಣದಲ್ಲಿ ಗುರುತಿಸುವ ಮೂಲಕ ಹೈಲೈಟ್ ಮಾಡಿದೆ ಮತ್ತು ಉಳಿದ ಬೂದು ಪ್ರದೇಶಗಳನ್ನು “ಬಕೆಟ್ ಲಿಸ್ಟ್” ದೇಶಗಳು ಎಂದು ಉಲ್ಲೇಖಿಸಿದೆ. ಆದರೆ ಗ್ರಾಫಿಕ್‌ಗಾಗಿ ಬಳಸಲಾದ ನಕ್ಷೆಯು ಭಾರತದ ಗಡಿಗಳ ವಿರೂಪಗೊಂಡ ಚಿತ್ರವನ್ನು ತೋರಿಸುತ್ತಿರುವುದು ಕಂಡುಬಂದ ನಂತರ ಟೀಕೆಗಳು ಕೇಳಿಬಂದರವು

ಇದಕ್ಕೆ ಬಲವಾಗಿ ಪ್ರತಿಕ್ರಿಯಿಸಿದ ಬಿಜೆಪಿ ವಕ್ತಾರ ಶೆಹಜಾದ್ ಪೂನವಲ್ಲ, ಕಾಂಗ್ರೆಸ್ ಭಾರತದ ವಿರೂಪಗೊಂಡ ನಕ್ಷೆಯನ್ನು ಹಂಚಿಕೊಂಡಿರುವುದು ಇದೇ ಮೊದಲಲ್ಲ ಎಂದು ಹೇಳಿದ್ದಾರೆ.

“ಕೇರಳ ಕಾಂಗ್ರೆಸ್ ಪಕ್ಷವು ಕಾಶ್ಮೀರವನ್ನು ಪಾಕಿಸ್ಥಾನದ ಭಾಗವೆಂದು ತೋರಿಸುವ ನಕ್ಷೆಯನ್ನು ಹಂಚಿಕೊಂಡಿದೆ. ಕೆಲವು ದಿನಗಳ ಹಿಂದೆ, ಕಾಂಗ್ರೆಸ್‌ನ ರಾಷ್ಟ್ರೀಯ ಹ್ಯಾಂಡಲ್‌ನಿಂದ ನಾವು ಇದೇ ರೀತಿಯ ಪೋಸ್ಟ್ ಅನ್ನು ನೋಡಿದ್ದೇವೆ. ಈಗ ಇದು ಕೇರಳದಿಂದ ಮತ್ತು ಮೊದಲು ತಮಿಳುನಾಡಿನಿಂದಲೂ ಈ  ರೀತಿ ಸಂಭವಿಸಿದೆ. ಇದು ಕಾಕತಾಳೀಯವಲ್ಲ, ಇದು ಚೆನ್ನಾಗಿ ಯೋಚಿಸಿದ ಮಾದರಿಯಾಗಿದೆ” ಎಂದು ಪೂನಾವಾಲಾ ಹೇಳಿದ್ದಾರೆ.

ಕಾಂಗ್ರೆಸ್ ಭಾರತವನ್ನು ವಿಭಜಿಸಲು ಪ್ರಯತ್ನಿಸುತ್ತಿದೆ ಎಂದು ಪೂನಾವಾಲಾ ಆರೋಪಿಸಿದ್ದಾರೆ.