ಸೆ. 3 ರಂದು ಪಠಾಣ್‌ಕೋಟ್­ನಲ್ಲಿ ವಾಯುಸೇನೆ ಸೇರಲಿವೆ ಅಪಾಚೆ ಎಹೆಚ್-64 ಹೆಲಿಕಾಪ್ಟರ್‌ಗಳು

ನವದೆಹಲಿ: ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಮತ್ತು ಪಂಜಾಬ್ ಮುಖ್ಯಮಂತ್ರಿ ಕ್ಯಾಪ್ಟನ್ ಅಮರೇಂದರ್ ಸಿಂಗ್ ಅವರು ಸೆಪ್ಟೆಂಬರ್ 3 ರಂದು ಅಮೆರಿಕಾ ನಿರ್ಮಿತ ಅಪಾಚೆ ಎಹೆಚ್-64 ಇ (ಐ) ಹೆಲಿಕಾಪ್ಟರ್‌ಗಳನ್ನು ಭಾರತೀಯ ವಾಯುಸೇನೆಗೆ ಸೇರ್ಪಡೆಗೊಳಿಸಲಿದ್ದಾರೆ. ವಾಯುಸೇನೆಯನ್ನು ಆಧುನೀಕರಣಗೊಳಿಸುವ ನಿಟ್ಟಿನಲ್ಲಿ ಇಡಲಾದ ಮಹತ್ವದ ಹೆಜ್ಜೆ ಇದಾಗಿದೆ.

4 ಅಪಾಚೆ ಹೆಲಿಕಾಪ್ಟರ್‌ಗಳನ್ನು ನೆರೆಯ ಪಾಕಿಸ್ಥಾನದ ಗಡಿಯಿಂದ ಕೆಲವೇ ಮೈಲುಗಳಷ್ಟು ದೂರದಲ್ಲಿರುವ ಪ್ರಧಾನ ವಾಯುನೆಲೆ ಎಂದೇ ಪರಿಗಣಿಸಲಾಗಿರುವ ಪಠಾಣ್‌ಕೋಟ್ ವಾಯುಪಡೆ ನೆಲೆಯಲ್ಲಿ ನಿಯೋಜನೆಗೊಳಿಸಲಾಗುತ್ತಿದೆ. 370ನೇ ವಿಧಿ ಬಳಿಕ ಉಭಯ ದೇಶಗಳ ನಡುವೆ ಉದ್ವಿಗ್ನತೆ ಹೆಚ್ಚಾಗಿರುವ ಸಂದರ್ಭದಲ್ಲಿ ಈ ಬೆಳವಣಿಗೆ ನಡೆಯುತ್ತಿರುವುದು ಮಹತ್ವ ಪಡೆದುಕೊಂಡಿದೆ.

ವಾಯುಸೇನೆ ವಕ್ತಾರರ ಪ್ರಕಾರ, 2015ರ ಸೆಪ್ಟೆಂಬರ್ ತಿಂಗಳಿನಲ್ಲಿ ಯುಎಸ್ ರಕ್ಷಣಾ ದೈತ್ಯ ಬೋಯಿಂಗ್ ಜೊತೆ ಭಾರತವು 22 ಅಪಾಚೆ ಹೆಲಿಕಾಫ್ಟರ್­ಗಳಿಗಾಗಿ 1.1 ಬಿಲಿಯನ್ ಡಾಲರ್ ಒಪ್ಪಂದವನ್ನು ಮಾಡಿಕೊಂಡಿದೆ. ತನ್ನ ದಾಳಿ ಸಾಮರ್ಥ್ಯವನ್ನು ತೀಕ್ಷ್ಣಗೊಳಿಸುವ ಉದ್ದೇಶದಿಂದ ಭಾರತ ಈ ಒಪ್ಪಂದವನ್ನು ಮಾಡಿಕೊಂಡಿದೆ. ಈಗಾಗಲೇ ಬೋಯಿಂಗ್ ಸರಬರಾಜು ಮಾಡಿರುವ 8 ಹೆಲಿಕಾಫ್ಟರ್­ಗಳೊಂದಿಗೆ ಮೊದಲ ಅಪಾಚೆ ಸ್ಕ್ರಾಡ್ರನ್ ಅನ್ನು ರಚನೆ ಮಾಡಲಾಗುತ್ತದೆ ಎಂದು ಅಧಿಕಾರಿಯೊಬ್ಬರು ಹೇಳಿದ್ದಾರೆ. ಬೋಯಿಂಗ್ ಭಾರತದ ವಾಯುಸೇನೆಗೆ ಅನುಗುಣವಾಗಿ ತಯಾರು ಮಾಡಿರುವ ಎಲ್ಲಾ 22 ಅಪಾಚೆ ಹೆಲಿಕಾಪ್ಟರ್‌ಗಳನ್ನು 2020 ರೊಳಗೆ ಪೂರೈಕೆ ಮಾಡುವ ಸಾಧ್ಯತೆಯಿದೆ.

ವಾಯುಸೇನೆ ಪ್ರಸ್ತುತ ಸೋವಿಯತ್ ಮೂಲದ ಮಿ -25 ಮತ್ತು ಮಿ -35 ಹೆಲಿಕಾಪ್ಟರ್ ಗನ್‌ಶಿಪ್‌ಗಳನ್ನು ನಿರ್ವಹಿಸುತ್ತಿದೆ.

ಫೈಯರ್ ಆ್ಯಂಡ್ ಪಾರ್ಗೆಟ್ ಹೆಲ್ಫೈರ್ ಕ್ಷಿಪಣಿಗಳೊಂದಿಗೆ ಶಸ್ತ್ರಸಜ್ಜಿತವಾಗಿರುವ ಅಪಾಚೆ ಅಟ್ಯಾಕ್ ಹೆಲಿಕಾಫ್ಟರ್­ಗಳು ಒಂದು ನಿಮಿಷದಲ್ಲಿ 128 ಗುರಿಗಳನ್ನು ಪತ್ತೆಹಚ್ಚಬಲ್ಲದು ಮತ್ತು ಬೆದರಿಕೆಗಳಿಗೆ ಸವಾಲೊಡ್ಡಬಲ್ಲದು. ಈ ಕ್ಷಿಪಣಿಗಳು ಗನ್‌ಶಿಪ್‌ಗಳನ್ನು ಭಾರೀ ಶಸ್ತ್ರಾಸ್ತ್ರ ವಿರೋಧಿ ಸಾಮರ್ಥ್ಯಗಳೊಂದಿಗೆ ಸಜ್ಜುಗೊಳಿಸುತ್ತವೆ.

ವಿಂಗ್ ಕಮಾಂಡರ್ ಅಭಿನಂದನ್ ಅವರು ಸೆ. 3 ರಂದೇ ಪಠಾಣ್‌ಕೋಟ್­ ವಾಯುಪಡೆ ನೆಲೆಯಿಂದ ಮಿಗ್ ವಿಮಾನವನ್ನು ಹಾರಿಸಬಹುದು ಎಂಬ ಬಗ್ಗೆ ಮಾತುಗಳೂ ಕೇಳಿ ಬರುತ್ತಿವೆ.