ಬಾಯಾರು : ವಿವೇಕಾನಂದ ಸಾಂಸ್ಕೃತಿಕ ಕೇಂದ್ರದ ವತಿಯಿಂದ ಬಾಲಗೋಕುಲದ ಮಕ್ಕಳಿಗೆ ಕಲಿಕೋಪಕರಣಗಳ ವಿತರಣಾ ಸಮಾರಂಭ

ಬಾಯಾರು (ಪೆರ್ವೊಡಿ): ಶ್ರೀ ವಿವೇಕಾನಂದ ಸಾಂಸ್ಕೃತಿಕ ಕೇಂದ್ರ ( ರಿ) ಬಾಯಾರು ಪೆರ್ವೊಡಿ ಇದರ ವತಿಯಿಂದ ಸ್ವ-ಸಹಾಯ ಸಂಘಗಳು ಬಾಯಾರು- ಪೆರ್ವೊಡಿ ಗ್ರಾಮ ವಿಕಾಸ ಯೋಜನೆ ಇದರ ಸಹಭಾಗಿತ್ವದಲ್ಲಿ ಪುಸ್ತಕ ಪೂಜೆ ಹಾಗೂ ಬಾಲಗೋಕುಲದ ಮಕ್ಕಳಿಗೆ ಕಲಿಕೋಪಕರಣಗಳ ವಿತರಣಾ ಸಮಾರಂಭ ಪೆರ್ವೊಡಿ ವಿವೇಕಾನಂದ ಮೈದಾನದಲ್ಲಿ ನಡೆಯಿತು.

ಈ ಕಾರ್ಯಕ್ರಮದ ಉದ್ಘಾಟನೆಯನ್ನು ನಡೆಸಿದ ಶ್ರೀ ಆಲ್ಚಾರ್ ಉಮೇಶ ನಾಯಕ್, ಮೆನೇಜರ್, ಕರ್ನಾಟಕ ಬ್ಯಾಂಕ್ ಮಾಣಿಲ ಅವರು ಮಾತನಾಡುತ್ತ ಇಂತಹ ಪುಸ್ತಕ ವಿತರಣಾ ಕಾರ್ಯಕ್ರಮಗಳು ಮಕ್ಕಳಿಗೆ ಕೇವಲ ಕಲಿಕೋಪಕರಣಗಳ ವಿತರಣೆ ಮಕ್ಕಳು ಪಡೆದುಕೊಳ್ಳುವಲ್ಲಿಗೆ ಮುಕ್ತಾಯವಲ್ಲ, ಬದಲಾಗಿ ಇದರ ಪ್ರಯೋಜನ ಪಡೆದ ಮಕ್ಕಳು ವಿದ್ಯಾವಂತರಾಗಿ ಉತ್ತಮ ಸಮಾಜ ನಿರ್ಮಾಣಕ್ಕೆ ಮಾಡುವಂತಾಗಬೇಕು. ಇದರ ಪ್ರಯೋಜನ ಪಡೆದು ಉತ್ತಮ ಜೀವನ ರೂಪೀಕರಿಸಿದ ಮಕ್ಕಳು ಇಂತಹ ಸಂಘ ಸಂಸ್ಥೆಗಳ ಉತ್ತಮ ಕಾರ್ಯವನ್ನು ಸದಾ ಸ್ಮರಿಸಿ ಮುಂದಿನ ದಿನಗಳಲ್ಲಿ ಇಂತಹ ಸಮಾಜಮುಖಿ ಕೆಲಸವನ್ನು ಮಾಡುವಂತ ಮನೋಭಾವ ಬೆಳೆಸಿಕೊಳ್ಳುವಂತಾಗಬೇಕು ಎಂದರು. ಹಾಗೆಯೇ ಎಲ್ಲಾ ಸಂಘ ಸಂಸ್ಥೆಗಳು ಕೇವಲ ಮನೋರಂಜನೆಗೋಸ್ಕರ ಕಾರ್ಯಕ್ರಮ ಮಾಡುವ ಬದಲು ಇಂತಹ ಸೇವಾಕಾರ್ಯಗಳನ್ನು ಮಾಡುವಂತಾಗಬೇಕು ಮತ್ತು ಇಂತಹ ಸೇವಾಕಾರ್ಯಗಳಿಗೆ ಸಮಾಜವು ಉತ್ತಮ ಸ್ಪಂದನೆ ನೀಡುತ್ತದೆ ಎಂಬುದಾಗಿ ಹೇಳಿದರು.

ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಮಂಗಳೂರು ವಿಭಾಗ ಗ್ರಾಮ ವಿಕಾಸ ಪ್ರಮುಖ್ ಶ್ರೀ ಪ್ರವೀಣ ಸರಳಾಯ ಅವರು ಮಾತನಾಡಿ ಬಾಲಗೋಕುಲಗಳು ಮಕ್ಕಳ ಜ್ಞಾನಾರ್ಜನೆಗೆ ಹಾಗೂ ಭಾರತೀಯ ಸಂಸ್ಕೃತಿಯ ಬೆಳೆಸುವ ಕೆಲಸ ಮಾಡುತ್ತಿವೆ. ಜ್ಞಾನ ಹಾಗೂ ಸಂಸ್ಕಾರದ ಜೊತೆಯಲ್ಲಿ ವಿದ್ಯಾಭ್ಯಾಸವೂ ಕೂಡ ಪ್ರಾಮುಖ್ಯತೆ ಹೊಂದಿದೆ. ಮಕ್ಕಳಿಗೆ ಕಲಿಕೋಪಕರಣಗಳ ವಿತರಣೆ ಮಕ್ಕಳಿಗೆ ವಿದ್ಯಾಭ್ಯಾಸ ಪಡೆಯಲು ಪೂರಕವಾಗಿದೆ. ಈ ಸಂಸ್ಥೆಯು ನಡೆಸಿದ ಸೇವೆ ಅನುಕರಣೀಯವಾಗಿದೆ ಹಾಗೂ ಇಂತಹ ಉತ್ತಮ ಸೇವಾ ಕಾರ್ಯಗಳು ಪ್ರತಿ ಗ್ರಾಮಗಳಲ್ಲೂ ನಡೆಯುವಂತಾಗಬೇಕು ಎಂದರು.

ಈ ಸಂದರ್ಭದಲ್ಲಿ ಪೆರ್ವೊಡಿ, ಕೊಪಪ್ಪೆ, ಬೆರಿಪದವು ಹಾಗೂ ಬಳ್ಳೂರು ಇಲ್ಲಿನ ಬಾಲಗೋಕುಲಗಳ 120 ಮಕ್ಕಳಿಗೆ ಪುಸ್ತಕ ಹಾಗೂ ಕಲಿಕೋಪಕರಣಗಳ ವಿತರಣೆ ಮಾಡಲಾಯಿತು‌. ಗ್ರಾಮ ವಿಕಾಸ ವಿಭಾಗದ ವತಿಯಿಂದ ದಾನಿಗಳಿಂದ ಪಡೆದ ಶಾಲಾ ಬ್ಯಾಗ್ ಗಳನ್ನು ವಿಶೇಷವಾಗಿ ಗುರುತಿಸಲ್ಪಟ್ಟ 20 ಮಂದಿ ವಿದ್ಯಾರ್ಥಿಗಳಿಗೆ ವಿತರಿಸಲಾಯಿತು. ಈ ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಶ್ರೀ ಸದಾನಂದ ಆಳ್ವ ಪೆರ್ವೆಡಿಬೀಡು ಇವರು ವಹಿಸಿದ್ದರು. ವಿವೇಕಾನಂದ ಸಾಂಸ್ಕೃತಿಕ ಕೇಂದ್ರದ ಅಧ್ಯಕ್ಷರಾದ ಶ್ರೀ ರಾಧಾಕೃಷ್ಣ ರೈ ಅವರು ಉಪಸ್ಥಿತರಿದ್ದರು‌. ಶ್ರೀ ರಾಮ ಮಾಸ್ಟರ್ ಅವರು ಸ್ವಾಗತವನ್ನು ನಡೆಸಿ, ಶ್ರೀ ಕೇಶವ ನಾಯಕ್ ಧನ್ಯವಾದ ಸಮರ್ಪಣೆ ಮಾಡಿದರು.