ಮಾನವ ಹಕ್ಕುಗಳಿಗೆ ಯಾರು ಬೆದರಿಕೆಯೊಡ್ಡುತ್ತಿದ್ದಾರೆ? ಲೇಖನದಲ್ಲಿ ವಾಸ್ತವ ಬಿಚ್ಚಿಟ್ಟ ಜೇಟ್ಲಿ

ಕೇಂದ್ರ ಸಚಿವ ಅರುಣ್ ಜೇಟ್ಲಿಯವರು ತಮ್ಮ ಫೇಸ್­ಬುಕ್­ನಲ್ಲಿ ’ಮಾನವ ಹಕ್ಕುಗಳಿಗೆ ಯಾರು ಬೆದರಿಯೊಡ್ಡುತ್ತಿದ್ದಾರೆ?’ ಎಂಬ ಬಗ್ಗೆ ಅರ್ಥಗರ್ಭಿತ, ವಾಸ್ತವಾಂಶಗಳನ್ನು ಒಳಗೊಂಡ ಸೊಗಸಾದ ಲೇಖನವನ್ನು ಬರೆದಿದ್ದಾರೆ. ಇದರ ಮೂಲಕ ಮಾನವ ಹಕ್ಕುಗಳ ಉಲ್ಲಂಘನೆ ಬಗ್ಗೆ ಬೊಬ್ಬೆ ಹೊಡೆಯುತ್ತಿರುವವರಿಗೆ ಪ್ರತ್ಯುತ್ತರ ನೀಡಿದ್ದಾರೆ.

ಮೂಲಭೂತ ಹಕ್ಕುಗಳು ಭಾರತ ಸಂವಿಧಾನದ ಮೂಲ ರಚನೆಯಲ್ಲೇ ಇದೆ ಎಂದು ಪ್ರತಿಪಾದಿಸಿರುವ ಅವರು, ಮಾನವನ ಮೂಲ ಹಕ್ಕುಗಳನ್ನು ಎಂದಿಗೂ ತಿದ್ದುಪಡಿ ಮಾಡಲು ಅಥವಾ ಬದಲಾವಣೆ ಮಾಡಲು ಸಾಧ್ಯವಿಲ್ಲ. ನೈಸರ್ಗಿಕ ಹಕ್ಕುಗಳು ಪ್ರತಿ ಜೀವಿಗೂ ಸಂಬಂಧಿಸಿದ್ದಾಗಿ ಎಂದಿದ್ದಾರೆ.

ಭಾರತದಲ್ಲಿ ಮಾನವ ಹಕ್ಕುಗಳಿಗೆ ಬೆದರಿಕೆಯಾಗಿರುವುದು ಜಿಹಾದಿಗಳು, ಪ್ರತ್ಯೇಕತಾವಾದಿಗಳು, ಮಾವೋವಾದಿ ಬಂಡುಕೋರರು. ನಮ್ಮ ಪಶ್ಚಿಮದ ನೆರೆ ರಾಷ್ಟ್ರಗಳು ಹಣ ಪೂರೈಸಿ ಇವುಗಳನ್ನು ಪೋಷಣೆ ಮಾಡುತ್ತಿವೆ. ಭಾರತವನ್ನು ಅಸ್ಥಿರಗೊಳಿಸುವುದೇ ಇವುಗಳ ಬಹುಮುಖ್ಯ ಗುರಿಯಾಗಿದೆ. ಇವರು ದೇಶದ ಕೆಲವು ಭಾಗಗಳಲ್ಲಿ ಮಾತ್ರ ಸಕ್ರಿಯರಾಗಿದ್ದಾರೆ. ಆದರೆ ಜಮ್ಮು ಕಾಶ್ಮೀರದಲ್ಲಿ ಜಿಹಾದಿಗಳತ್ತ ಯುವಕರು ಆಕರ್ಷಿತರಾಗುತ್ತಿರುವುದು ತೀವ್ರ ಆತಂಕಕಾರಿ ಬೆಳವಣಿಗೆ ಎಂದಿದ್ದಾರೆ.

ಮಾವೋವಾದಿ ಬಂಡುಕೋರರು ಮಧ್ಯಭಾರತದ ಬುಡಕಟ್ಟು ಪ್ರದೇಶದಲ್ಲಿ ಸಕ್ರಿಯವಾಗಿದ್ದಾರೆ. ಆದರೆ ಅವರ ನೈತಿಕ ಬೆಂಬಲಿಗರು ದೇಶದಾದ್ಯಂತ ಹರಡಿಕೊಂಡಿದ್ದಾರೆ. ಇವರು ಚುನಾಯಿತ ಸರ್ಕಾರವನ್ನು ಕಿತ್ತೊಗೆಯುವ ಪ್ರಯತ್ನವನ್ನು ನಿರಂತರ ಮಾಡುತ್ತಿದ್ದಾರೆ. ಪ್ರಜಾಪ್ರಭುತ್ವದಲ್ಲಿ ಅವರಿಗೆ ನಂಬಿಕೆ ಇಲ್ಲ. ರಾಜಕೀಯ ಬದಲಾವಣೆಯನ್ನು ಉತ್ತೇಜಿಸಲು ಹಿಂಸೆಯನ್ನು ಬಳಸುತ್ತಾರೆ. ಗನ್‌ನಿಂದಲೇ ಅಧಿಕಾರ ಬರುತ್ತದೆ ಎಂಬ ನಂಬಿಕೆ ಇವರದ್ದು ಎಂದಿದ್ದಾರೆ.

‘ನಮ್ಮ ಸರ್ಕಾರ ಪ್ರತಿಯೊಬ್ಬ ಭಾರತೀಯ ಮಾನವ ಹಕ್ಕುಗಳನ್ನು ರಕ್ಷಿಸಲು ಬದ್ಧವಾಗಿದೆ. ನಮ್ಮ ಮುಖ್ಯ ಧ್ಯೇಯವೇ ಅದು. ಅದು ಕಾಶ್ಮೀರವೇ ಇರಲಿ, ಬುಡಕಟ್ಟು ಪ್ರದೇಶವೇ ಇರಲಿ’ ಎಂದಿದ್ದಾರೆ.

ಬ್ಲಾಗ್‌ನ ಸಂಪೂರ್ಣ ವಿವರಗಳನ್ನು ಈ ಲಿಂಕ್­ನಲ್ಲಿ ಓದಬಹುದು. : https://www.facebook.com/notes/arun-jaitley/who-is-threatening-human-rights/805931829595367/