ಸಮಾಜ ಸೇವೆಯ ವಿರಾಟ ಸ್ವರೂಪಕ್ಕೆ ಸಜ್ಜಾಗುತ್ತಿದೆ ವಾಣಿಜ್ಯ ನಗರಿ

ಸೇವಾ ಸಂಗಮಕ್ಕೆ ಕ್ಷಣಗಣನೆ | ಭರದಿಂದ ನಡೆದಿವೆ ಸಿದ್ಧತೆ

ಹುಬ್ಬಳ್ಳಿ: ಇದೇ ಡಿಸೆಂಬರ್ 1, 2, 3 ರಂದು ಹುಬ್ಬಳ್ಳಿಯಲ್ಲಿ ನಡೆಯಲಿರುವ ಸೇವಾ ಸಂಗಮ 2017 ರ ಸಿದ್ಧತೆಗಳು ಪೂರ್ಣಗೊಳ್ಳುತ್ತಿದ್ದು, ಸಮಾಜಸೇವೆಯ ವಿರಾಟ ರೂಪದ ದರ್ಶನಕ್ಕೆ ಹುಬ್ಬಳ್ಳಿ ಸಿದ್ಧಗೊಳ್ಳುತ್ತಿದೆ ಎಂದು ಸೇವಾ ಸಂಗಮ 2017- ಸ್ವಾಗತ ಸಮಿತಿ ಕಾರ್ಯದರ್ಶಿ ವಾಣಿಜ್ಯ ತೆರಿಗೆ ನಿವೃತ್ತ ಉಪಆಯುಕ್ತ ಗೋವಿಂದಪ್ಪ ಗೌಡಪ್ಪಗೋಳ ಹೇಳಿದರು.

ಸೇವಾ ಸಂಗಮ ನಡೆಯಲಿರುವ ಗೋಕುಲ ಗಾರ್ಡ್­ನ್­ನಲ್ಲಿ ಇಂದು ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು ಡಿಸೆಂಬರ್ 1 ರಂದು ಮುಂಜಾನೆ 10.45 ಕ್ಕೆ ಪಾಂಡಿಚೆರಿಯ ಲೆಪ್ಟಿನೆಂಟ್ ಗೌವರ್ನರ್ ಡಾ. ಕಿರಣ್ ಬೇಡಿ ಸೇವಾ ಸಂಗಮವನ್ನು ಉದ್ಘಾಟಿಸಲಿದ್ದಾರೆ. ಸೇವಾಭಾರತಿಯ ರಾಷ್ಟ್ರೀಯ ಸಂಘಟನಾ ಕಾರ್ಯದರ್ಶಿ ರಾಕೇಶ್ ಜೈನ್ ಪ್ರಾಸ್ತಾವಿಕವಾಗಿ ಮಾತನಾಡಲಿದ್ದು ಆರೆಸ್ಸೆಸ್‌ನ ಅಖಿಲ ಭಾರತೀಯ ವ್ಯವಸ್ಥಾ ಪ್ರಮುಖರಾದ ಮಂಗೇಶ್ ಭೇಂಡೆ ಮುಖ್ಯ ಭಾಷಣ ಮಾಡಲಿದ್ದಾರೆ.

ಡಿಸೆಂಬರ್ 2 ರಂದು ಸಂಜೆ ನಡೆಯಲಿರುವ ಸಾರ್ವಜನಿಕ ಸಮಾರಂಭದಲ್ಲಿ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸರಕಾರ್ಯವಾಹ (ಕಾರ್ಯದರ್ಶಿ) ಸುರೇಶ ಜೋಶಿ (ಭಯ್ಯಾಜೀ ಜೋಶಿ) ಮುಖ್ಯ ಭಾಷಣ ಮಾಡಲಿದ್ದಾರೆ.

ಸೇವಾ ಸಂಗಮದ ವಿಶೇಷತೆಗಳು:
ಸೇವಾ ಕ್ಷೇತ್ರದಲ್ಲಿ ಮಹಿಳಾ ನೇತೃತ್ವ ಬೆಳೆಸುವ ನಿಟ್ಟಿನಲ್ಲಿ ಮಹಿಳೆಯರಿಗಾಗಿ ಈಗಾಗಲೇ ಈ ಕ್ಷೇತ್ರದಲ್ಲಿ ಸಾಧನೆ ಮಾಡಿರುವ ಪ್ರಮುಖ ಮಹಿಳಾ ಸಾಧಕಿಯರ ಜೊತೆ ಸಂವಾದ, ಚರ್ಚೆ, ಮಾರ್ಗದರ್ಶನ ಹಾಗು ಮುಂದಿನ ಕಾರ್ಯಯೋಜನೆ ಬಗ್ಗೆ ಡಿಸೆಂಬರ್ 2 ರ ಶನಿವಾರ ಮಹಿಳಾ ಸಮಾವೇಶ ನಡೆಯಲಿದೆ.

ಯುವಜನತೆಯಲ್ಲಿ ಸೇವಾಭಾವ, ಸಾಮಾಜಿಕ ನೇತೃತ್ವ ಬೆಳೆಸಲು ವಿಶಿಷ್ಟವಾದ ಕಾರ್ಯಕ್ರಮ ಯುವ ಸಮಾವೇಶ ಡಿಸೆಂಬರ್ 2 ಶನಿವಾರ ನಡೆಯಲಿದೆ.

ಡಿಸೆಂಬರ್ 1 ರಂದು ರಾತ್ರಿ 9 ಗಂಟೆಗೆ ಹಾಗೂ ಡಿಸೆಂಬರ್ 2 ರಂದು ಸಂಜೆ 7.30 ಕ್ಕೆ ಸೇವಾ ಸಂಗಮದಲ್ಲಿ ಅತ್ಯಾಕರ್ಷಕ ಸಾಂಸ್ಕೃತಿಕ ಕಾರ್ಯಕ್ರಮ.

ಸಮಾಜ ಸೇವೆಗೆ ಪ್ರೇರಣೆ ನೀಡಬಲ್ಲ ಸೇವಾ ಕಾರ್ಯಗಳ ವೈವಿಧ್ಯಮಯ ಪ್ರದರ್ಶಿನಿ (exhibition) ಹಾಗೂ ಸಾಹಿತ್ಯ, ವಿಡಿಯೋಗಳ ಮಳಿಗೆ.

ಡಿಸೆಂಬರ್ 3 ರಂದು ಮುಂಜಾನೆ ವೈದ್ಯರ ಸಮಾವೇಶ ನಡೆಯಲಿದೆ.

ವಿವಿಧ ರೀತಿಯ ಸೇವಾ ಕಾರ್ಯಗಳಲ್ಲಿ ತೊಡಗಿರುವ ಸಂಘ ಸಂಸ್ಥೆಗಳಿಗೆ ತಮ್ಮ ಕಾರ್ಯಗಳ ಮಾಹಿತಿ ನೀಡಲು ಉಚಿತ ಸ್ಟಾಲ್ ವ್ಯವಸ್ಥೆ ಮಾಡಲಾಗಿದೆ. ಇದರಲ್ಲಿ ಸೇವಾ ಹಾಗು ಸ್ವಾವಲಂಬನ ದೃಷ್ಟಿಯಿಂದ ಸಂಸ್ಥೆಯವರೇ ತಯಾರು ಮಾಡಿರುವ ವಸ್ತುಗಳ ಮಾರಾಟಕ್ಕೆ ಅವಕಾಶವಿರುತ್ತದೆ.

ಸೇವಾ ಕ್ಷೇತ್ರದಲ್ಲಿ ವಿಶೇಷ ಸಾಧನೆ ಮಾಡಿರುವ ಸಾಧಕರಿಗೆ ಸನ್ಮಾನ ಮಾಡಲಾಗುವುದು.

ಪತ್ರಿಕಾಗೋಷ್ಠಿಯಲ್ಲಿ ಸೇವಾ ಭಾರತಿಯ ದಕ್ಷಿಣ ಕ್ಷೇತ್ರ ಸಂಘಟನಾ ಕಾರ್ಯದರ್ಶಿ ಶ್ರೀಧರ ಸಾಗರ್, ಡಾ.ರಘು ಅಕ್ಮಂಚಿ, ಶ್ರೀಧರ ನಾಡಗೀರ್, ಗೋವರ್ಧನರಾವ್ ಮುಂತಾದ ಪದಾಧಿಕಾರಿಗಳು ಉಪಸ್ಥಿತರಿದ್ದರು.