ಯಕ್ಷಗಾನಕ್ಕೆ ಪಠ್ಯಪುಸ್ತಕದಲ್ಲಿ ಸೂಕ್ತ ಸ್ಥಾನವಿದೆ : ಕಲ್ಚಾರ್

ಕಾಸರಗೋಡು : ಯಕ್ಷಗಾನ ಸಾಹಿತ್ಯಕ್ಕೆ ಶಾಲಾ ಪಠ್ಯಪುಸ್ತಕದಲ್ಲಿ ಸೂಕ್ತವಾದ ಸ್ಥಾನವಿದೆ,ಅದನ್ನು ಅರ್ಥೈಸಿಕೊಂಡು ಸ್ವತಃ ಆಸ್ವಾದಿಸಿ ಅಧ್ಯಾಪಕರು ಮಕ್ಕಳ ಮುಂದಿರಿಸಿದಲ್ಲಿ ಇತರ ಕಥೆ, ಕವನ, ಷಟ್ಪದಿ, ಸಾಂಗತ್ಯವೇ ಮೊದಲಾದ ಸಾಹಿತ್ಯ ಪ್ರಕಾರಗಳಂತೆ ಮಕ್ಕಳ ಮನಸ್ಸಿನಲ್ಲಿ ಆಳವಾಗಿ ಬೇರೂರುವುದರಲ್ಲಿ ಅನುಮಾನವಿಲ್ಲ ಎಂದು ಪ್ರಸಿದ್ದ ಯಕ್ಷಗಾನ ಕಲಾವಿದ, ನಿವೃತ್ತ ಪ್ರಾಧ್ಯಾಪಕ ಶ್ರೀ ರಾಧಾಕೃಷ್ಣ ಕಲ್ಪಾರ್ ಅವರು ಹೇಳಿದರು.

ಕುಂಬಳೆ ಸರಕಾರಿ ಹಿರಿಯ ಮಾಧ್ಯಮಿಕ ಶಾಲೆಯಲ್ಲಿ ಜರಗುತ್ತಿರುವ ಪ್ರೌಢಶಾಲಾ ಕನ್ನಡ ಭಾಷಾ ಅಧ್ಯಾಪಕರ ಸಮಗ್ರ ಪರಿವರ್ತನ ತರಬೇತಿ ಕಾರ್ಯಕ್ರಮದಲ್ಲಿ ವಿಶೇಷ ಉಪನ್ಯಾಸ ನೀಡುತ್ತಾ ಮಾತನಾಡಿದ ಶ್ರೀ ಕಲ್ಚಾರ್ ಅವರು ಯಕ್ಷಗಾನ ಸಾಹಿತ್ಯ. ಪಠ್ಯಪುಸ್ತಕದಲ್ಲಿ ಪ್ರಸ್ತುತವೇ ಎಂಬ ವಿಚಾರವಾಗಿ ವಿಶ್ಲೇಷಣೆ ನಡೆಸಿದರು. ಯಕ್ಷಗಾನ ಸಾಹಿತ್ಯದಲ್ಲಿ ಇತರ ಕವನಗಳ ಸಾಲುಗಳಲ್ಲಿರುವಂತೆಯೇ ವಿಭಿನ್ನ ಆಯಾಮಗಳಿರುವ ಪದಪ್ರಯೋಗಗಳಿರುತ್ತವೆ ಅದರ ವಿಶೇಷತೆಯನ್ನು ಗುರುತಿಸುವ, ಅದಕ್ಕಿಂತಲೂ ಭಿನ್ನವಾದುದನ್ನು ಮಕ್ಕಳು ಗುರುತಿಸುವ ದಾರಿಯನ್ನು ತೋರುವ ಹೊಣೆಗಾರಿಕೆ ಅಧ್ಯಾಪಕರಿಗೆ ಇದೆ, ಆಮೂಲಕ ಯಕ್ಷಗಾನ ಮುಂದಿನ ತಲೆಮಾರಿಗೆ ಪರಿಣಾಮಕಾರಿಯಾಗಿ ವರ್ಗಾವಣೆಯಗುವುದು ಎಂದರು.