ಬೆಳ್ತಂಗಡಿ : ಐತಿಹಾಸಿಕ ಗಡಾಯಿಕಲ್ಲಿನ ಮೂಲ ಹೆಸರು ನರಸಿಂಹ ಗಡ ಎಂಬುದನ್ನು ಉಳಿಸಿ ಅದನ್ನೇ ಹೆಸರಿಸುವಂತೆ ಒತ್ತಾಯಿಸಿ ಭಾನುವಾರ ಬೆಳ್ತಂಗಡಿಯಲ್ಲಿ ವಿಶ್ವ ಹಿಂದೂ ಪರಿಷತ್, ಬಜರಂಗ ದಳ ನೇತೃತ್ವದಲ್ಲಿ ಕುತ್ಯಾರು ಶ್ರೀ ಸೋಮನಾಥೇಶ್ವರ ದೇವಸ್ಥಾನದಿಂದ ಗಡಾಯಿಕಲ್ಲು ನರಸಿಂಹ ದೇವಸ್ಥಾನದ ವರೆಗೆ ಬೈಕ್ ರ್‍ಯಾಲಿ ನಡೆಯಿತು.
ರ್‍ಯಾಲಿಯನ್ನುದ್ದೇಶಿಸಿ ಮಾತನಾಡಿದ ಬಜರಂಗ ದಳ ಪ್ರಾಂತ ಸಂಚಾಲಕ ಶರಣ್ ಪಂಪ್‌ವೆಲ್ ಅವರು, ಕಂದಾಯ ಇಲಾಖೆಯ ದಾಖಲೆಗಳಲ್ಲಿ ಗಡಾಯಿಕಲ್ಲಿಗೆ ನರಸಿಂಹ ಗಡ ಎಂದೇ ನಮೂದಾಗಿದೆಯಲ್ಲದೆ ನರಸಿಂಹ ದೇವಸ್ಥಾನವಿರುವ ಬಗ್ಗೆ ಮಾಹಿತಿ ಇದೆ. ಅಂದು ಟಿಪುಸುಲ್ತಾನ್ ಗಡವನ್ನು ವಶಪಡಿಸಿಕೊಂಡು ಅದಕ್ಕೆ ಜಮಲಾಬಾದ್ ಕೋಟೆ ಎಂದು ನಾಮಕರಣ ಮಾಡಿದ್ದ. ಜಿಲ್ಲಾಡಳಿತ ಆ ಹೆಸರನ್ನೇ ಇಂದೂ ಮುಂದುವರಿಸಿಕೊಂಡು ಬರುತ್ತಿರುವುದು ದುರದೃಷ್ಟಕರ ಎಂದರು.
ಹಿಂದುಗಳ ಪುರಾತನ ಹೆಸರಿರುವ ಗಡಾಯಿಕಲ್ಲು ನರಸಿಂಹ ಗಡದಲ್ಲಿ ಸದ್ದಿಲ್ಲದೇ ಮಸೀದಿ ಕಟ್ಟುವ ಪಿತೂರಿ ನಡೆಯುತ್ತಿದೆ. ಸರಕಾರ ಕೂಡ ಈ ಕೆಟ್ಟಕಾರ್ಯಕ್ಕೆ ಕೈ ಜೋಡಿಸುತ್ತಿರುವುದು ಖಂಡನೀಯ. ಜಮಲಾಬಾದ್ ಕೋಟೆ ಎಂದು ಹಾಕಲಾಗಿರುವ ಬೋರ್ಡ್‌ನ್ನು ಜಿಲ್ಲಾಡಳಿತ ತೆಗೆಯದಿದ್ದಲ್ಲಿ ಮುಂದಿನ ದಿನಗಳಲ್ಲಿ ನಾವೇ ಕಿತ್ತೆಯೆಸುತ್ತೇವೆ ಎಂದು ಶರಣ್ ಎಚ್ಚರಿಸಿದರು.
ಅಧ್ಯಕ್ಷತೆಯನ್ನು ಧರ್ಮ ಜಾಗರಣದ ನಿಧಿ ಪ್ರಮುಖ್ ವಕೀಲ ಹರೀಶ್ ಪೂಂಜ ವಹಿಸಿದ್ದರು. ತಾಲೂಕಿನ 81 ಗ್ರಾಮಗಳಿಂದ ಕಾರ್ಯಕರ್ತರು ಭಾಗವಹಿಸಿದ್ದರು. ನರಸಿಂಹ ಜಯಂತಿಯಿಂದ ಈ ಹೋರಾಟ ಆರಂಭವಾಗಿದ್ದು ಗುರಿ ಮುಟ್ಟುವ ತನಕ ಹೋರಾಟ ಮುಂದುವರಿಯಲಿದೆ ಎಂದು ಸಂಘಟನೆ ತಿಳಿಸಿದೆ. ಬಜರಂಗ ದಳ ವಿಭಾಗ ಸಂಚಾಲಕ ಮುರಳಿಕೃಷ್ಣ ಹಂಸತಡ್ಕ, ಜಿಲ್ಲಾ ಸಂಚಾಲಕ ಭಾಸ್ಕರ ಧರ್ಮಸ್ಥಳ, ವಿಹಿಂಪ ಜಿಲ್ಲಾಧ್ಯಕ್ಷ ಡೀಕಯ್ಯ ಪೆರುವೋಡಿ, ನಡ ಗ್ರಾಮ ಕಾರ್ಯದರ್ಶಿ ದಾಸಪ್ಪ ಗೌಡ, ಮತ್ತಿತರರು ಉಪಸ್ಥಿತರಿದ್ದರು.
ನರಸಿಂಹ ಗಡ ಎಂಬ ಹೆಸರನ್ನು ಮರುನಾಮಕರಣದ ಬಗ್ಗೆ ಪ್ರಸ್ತುತ ತಾಲೂಕು ಮಟ್ಟದಲ್ಲಿ ಮಾತ್ರ ಪ್ರತಿಭಟನೆ ಹಮ್ಮಿಕೊಳ್ಳಲಾಗಿದೆ. ಜಿಲ್ಲಾಡಳಿತ ಮಧ್ಯಪ್ರವೇಶಿಸಿ ನರಸಿಂಹ ಗಡ ಎಂದು ನಾಮಕರಣ ಮಾಡದಿದ್ದಲ್ಲಿ ಜಿಲ್ಲೆಯಾದ್ಯಂತ ನರಸಿಂಹ ಗಡ ಚಲೋ ಎಂಬ ಕಾರ್ಯಕ್ರಮವನ್ನು ಹಮ್ಮಿ ಉಗ್ರವಾದ ಪ್ರತಿಭಟನೆ ಹಮ್ಮಿಕೊಳ್ಳಲಾಗುವುದು. ಗಲಭೆಗೆ ಅವಕಾಶ ಕೊಡದೆ ಜಿಲ್ಲಾಡಳಿತ ಶೀಘ್ರವಾಗಿ ಎಚ್ಚೆತ್ತುಕೊಳ್ಳಬೇಕು- ಶರಣ್ ಪಂಪ್‌ವೆಲ್
News13
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
