ವಳಲಂಬೆ ದೇವಸ್ಥಾನದಲ್ಲಿ ವಿದ್ಯಾರ್ಥಿಗಳಿಂದ ಶ್ರಮಸೇವೆ

ಸುಬ್ರಹ್ಮಣ್ಯ : ವಳಲಂಬೆ ಶ್ರೀ ಶಂಖಪಾಲ ಸುಬ್ರಹ್ಮಣ್ಯ ದೇವಸ್ಥಾನದಲ್ಲಿ ಭಾನುವಾರ ವಿದ್ಯಾರ್ಥಿಗಳು ಶ್ರಮಸೇವೆಯಲ್ಲಿ ಭಾಗವಹಿಸಿದರು. ಪೆನ್ನು ಹಿಡಿಯುವ ಕೈಗಳಿಗೆ ಕತ್ತಿಯಿಂದ ಕೆಲಸ ಮಾಡಲೂ ತಿಳಿದಿದೆ ಎಂದು ತೋರಿಸಿಕೊಟ್ಟರು. ಜೊತೆಗೆ ಸಾಮಾಜಿಕ ಕಾಳಜಿ, ಬದ್ದತೆ ಇದೆ ಎಂಬುದನ್ನೂ ಸಾಬೀತುಪಡಿಸಿದರು.

ವಳಲಂಬೆ ಶ್ರೀ ಶಂಖಪಾಲ ಸುಬ್ರಹ್ಮಣ್ಯ ದೇವಸ್ಥಾನದ ಬ್ರಹ್ಮಕಲಶೋತ್ಸವ ಕಾರ್ಯಕ್ರಮ ಜ. 27 ರಿಂದ ಫೆ.2 ವರೆಗೆ ನಡೆಯಲಿದೆ.ಈ ಪ್ರಯುಕ್ತ ವಿವಿಧ ಸಂಘಸಂಸ್ಥೆಗಳಿಂದ 2 ತಿಂಗಳುಗಳ ಕಾಲ ನಿರಂತರ ಶ್ರಮಸೇವೆ ನಡೆಯಲಿದೆ. ಇದಕ್ಕಾಗಿ ಗುತ್ತಿಗಾರು, ನಾಲ್ಕೂರು, ಮಡಪ್ಪಾಡಿ, ದೇವಚಳ್ಳ ಸೇರಿದಂತೆ ವಿವಿಧ ಗ್ರಾಮಗಳ ಸಂಘಸಂಸ್ಥೆಗಳಿಗೆ ಶ್ರಮಸೇವೆಗೆ ದಿನ ನಿಗದಿ ಮಾಡಲಾಗಿತ್ತು. ಈ ಸಂದರ್ಭ ವಳಲಂಬೆಯ ವೀರ ಕೇಸರಿ ಎಂಬ ವಿದ್ಯಾರ್ಥಿಗಳ ತಂಡಕ್ಕೆ ಭಾನುವಾರ ಶ್ರಮಸೇವೆಗೆ ದಿನ ನಿಗದಿ ಮಾಡಲಾಗಿತ್ತು. ಇದರಲ್ಲಿನ ಎಲ್ಲಾ ವಿದ್ಯಾರ್ಥಿಗಳೂ ಅತ್ಯಂತ ಉತ್ಸಾಹದಿಂದ ಶ್ರಮಸೇವೆ ನಡೆಸಿದರು. ಪೆನ್ನು ಹಿಡಿಯಲು ಮಾತ್ರವಲ್ಲ ಕೆಲಸ ಮಾಡಲೂ ತಿಳಿದಿದೆ ಎಂದು ತೋರಿಸಿದರು.

ಸಾಮಾನ್ಯವಾಗಿ ಶಾಲೆ, ಕಾಲೇಜಿಗೆ ತೆರಳುವ ವಿದ್ಯಾರ್ಥಿಗಳಿಗೆ ಯಾವುದೇ ಕೆಲಸ ಮಾಡಲು ತಿಳಿದಿಲ್ಲ ಎಂದು ಹೇಳುವವರೇ ಇದ್ದಾರೆ. ಆದರೆ ವೀರಕೇಸರಿ ಬಳಗದ ಸದಸ್ಯರು ಇದಕ್ಕೆ ಅಪವಾದವಾದರು. ಧಾರ್ಮಿಕ ಕ್ಷೇತ್ರದಲ್ಲಿ ಅಲ್ಲಿನ ಸಂಪ್ರದಾಯ, ಕಟ್ಟುಪಾಡುಗಳಿಗೆ ಒಳಪಟ್ಟು ಉತ್ತಮ ಕೆಲಸ ಮಾಡುವ ಮೂಲಕ ಸಾಮಾಜಿಕ ಕಾಳಜಿ, ಬದ್ದತೆಯೂ ಇದೆ ಎಂಬುದನ್ನು ಸಮಾಜಕ್ಕೆ ತೋರಿಸಿದ್ದಾರೆ.

ಈ ಸಂದರ್ಭ ವಳಲಂಬೆ ಶ್ರೀ ಶಂಖಪಾಲ ಸುಬ್ರಹ್ಮಣ್ಯ ದೇವಸ್ಥಾನದ ಬ್ರಹ್ಮಕಲಶೋತ್ಸವ ಸಮಿತಿ ಪ್ರಧಾನ ಕಾರ್ಯದರ್ಶಿ ಬಿ.ಕೆ.ಬೆಳ್ಯಪ್ಪ ಗೌಡ ಹಾಗೂ ಮಾಧವ ಮೂಕಮಲೆ, ದೇವಸ್ಥಾನದ ಅರ್ಚಕ ಮಹಾಬಲೇಶ್ವರ ಭಟ್, ಸ್ವಯಂಸೇವಕರ ಸಮಿತಿ ಪ್ರಮುಖ್ ಲೋಕೇಶ್ವರ ಡಿಆರ್ ಸ್ಥಳದಲ್ಲಿದ್ದು ಶ್ಲಾಘಿಸಿದರು. ವಿದ್ಯಾರ್ಥಿಗಳ ಜೊತೆ ಮುತ್ಲಾಜೆ ಬೈಲಿನ ಭಕ್ತಾದಿಗಳು ಸಹಕರಿಸಿದರು.

ವಿದ್ಯಾರ್ಥಿಗಳ ಈ ಕಾರ್ಯಕ್ಕೆ ಶ್ರೀ ಶಂಖಪಾಲ ಸುಬ್ರಹ್ಮಣ್ಯ ದೇವಸ್ಥಾನದ ಬ್ರಹ್ಮಕಲಶೋತ್ಸವ ಸಮಿತಿ ಅಧ್ಯಕ್ಷ ಮುಳಿಯ ತಿಮ್ಮಪ್ಪಯ್ಯ, ಕಾರ್ಯಾಧ್ಕಕ್ಷ ಚಂದ್ರಶೇಖರ ತಳೂರು, ಜೀರ್ಣೋದ್ಧಾರ ಸಮಿತಿ ಅಧ್ಯಕ್ಷ ವೆಂಕಟ್ ದಂಬೆಕೋಡಿ, ಸಂಚಾಲಕ ವೆಂಕಟ್ ವಳಲಂಬೆ ಮೊದಲಾದವರು ಅಭಿನಂದಿಸಿದ್ದಾರೆ.