ಸೇವೆಗಿಂತ ಮಿಗಿಲಾದ ಧರ್ಮವಿಲ್ಲ -ಪ್ರತೀಕ್ ಸಾಗರ್ ಜಿ ಮುನಿಮಹಾರಾಜ್

ಬೆಳ್ತಂಗಡಿ : ನಮ್ಮ ಮೇಲೆ ವಿಶ್ವಾಸವಿಟ್ಟು ಪ್ರತಿಕ್ಷಣವನ್ನೂ ಮಂಗಲಮಯವಾಗಿ ಕಳೆದರೆ ಇಡೀ ಜೀವನವೇ ಪಾವನವಾಗುತ್ತದೆ. ಮಂಗಲಯಮಯವಾಗುತ್ತದೆ. ಸೇವೆಗಿಂತ ಮಿಗಿಲಾದ ಧರ್ಮವಿಲ್ಲ. ಕರ್ತವ್ಯ, ನಿಷ್ಠೆ ಮತ್ತು ಧರ್ಮದ ಅನುಷ್ಠಾನದಿಂದ ಶ್ರೇಷ್ಠ ವ್ಯಕ್ತಿಯಾಗಲು ಸಾಧ್ಯ ಎಂದು ಪ್ರತೀಕ್ ಸಾಗರ್ ಜಿ ಮುನಿಮಹಾರಾಜ್ ಹೇಳಿದರು.ಧರ್ಮಸ್ಥಳದಲ್ಲಿ ಮಹೋತ್ಸವ ಸಭಾ ಭವನದಲ್ಲಿ ಮಂಗಳವಾರ ಅವರು ಮಂಗಲ ಪ್ರವಚನ ನೀಡಿದರು.

ಕ್ಷಣಿಕ ಸುಖ-ಭೋಗಕ್ಕಾಗಿ ಭೂತಕಾಲ ಮತ್ತು ಭವಿಷ್ಯದ ಬಗ್ಗೆ ನಾವು ಚಿಂತೆ ಮಾಡದೆ ದೃಢ ಸಂಕಲ್ಪದಿಂದ ಧನಾತ್ಮಕ ಚಿಂತನೆಯೊಂದಿಗೆ ಸಾರ್ಥಕ ಜೀವನ ನಡೆಸಬೇಕು. ಯಾವುದೇ ಕೆಲಸಕ್ಕೆ ಮುಹೂರ್ತ ನೀಡುವ ಅಗತ್ಯವಿಲ್ಲ. ಪ್ರತಿಕ್ಷಣವೂ ಮಂಗಲಮಯವಾಗಿದ್ದು ಶುಭ ಮುಹೂರ್ತವೇ ಆಗಿರುತ್ತದೆ. ನಮ್ಮ ಮನಸ್ಸೇ ಎಲ್ಲದಕ್ಕೂ ಮೂಲವಾಗಿದ್ದು ಪರಿಶುದ್ಧ ಮನಸ್ಸಿನಿಂದ ಶ್ರೇಷ್ಠ ವ್ಯಕ್ತಿಗಳ ಆದರ್ಶ ಗುಣಗಳನ್ನು ಅನುಸರಿಸಿದಾಗ ಜೀವನ ಪಾವನವಾಗಿ ಆನಂದಮಯವಾಗುತ್ತದೆ ಎಂದು ಮುನಿಗಳು ಅಭಿಪ್ರಾಯಪಟ್ಟರು.

ಮುನಿಮಹಾರಾಜರನ್ನು ಸ್ವಾಗತಿಸಿದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆಯವರು, ಗುರುಗಳು ಧರ್ಮದ ಮೂಲ ಸತ್ವ, ತತ್ವದ ಅರಿವಿನ ಬೆಳಕನ್ನು ನಮಗೆ ನೀಡುವ ಪೂಜ್ಯರು. ಅವರ ಸಂದೇಶ ಸರ್ವರಿಗೂ ಸಾರ್ವಕಾಲಿಕ ಮೌಲ್ಯ ಹಾಗೂ ಮಾನ್ಯತೆ ಹೊಂದಿದೆ ಎಂದರು.

ಹೇಮಾವತಿ ವಿ. ಹೆಗ್ಗಡೆಯವರು, ಡಿ. ಹರ್ಷೇಂದ್ರ ಕುಮಾರ್, ಸುಪ್ರಿಯಾ ಹರ್ಷೇಂದ್ರ ಕುಮಾರ್ ಮತ್ತು ಡಾ. ಬಿ. ಯಶೋವರ್ಮ ಉಪಸ್ಥಿತರಿದ್ದರು. ಶ್ರವಣಬೆಳಗೊಳದಿಂದ ಅಹಿಂಸಾ ಪಾದಯಾತ್ರೆ ಮೂಲಕ ಧರ್ಮಸ್ಥಳಕ್ಕೆ ಆಗಮಿಸಿದ ಮುನಿಗಳು ಮುಂದೆ ಮೂಡಬಿದ್ರೆ, ಕಾರ್ಕಳ ಮೂಲಕ ಹೊಂಬುಜಕ್ಕೆ ವಿಹಾರ ಮಾಡಲಿದ್ದಾರೆ.